សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្តីប្រពន្ធ២នាក់ បានជិះម៉ូតូមួយគ្រឿង ក្នុងល្បឿនលឿន ឃើញបាវច្រកអង្ករធ្លាក់នៅកណ្ដាលផ្លូវ ក៏ចាប់ហ្វ្រាំងទាំងបង្ខំ ធ្វើឲ្យដួលបោកទាំងម៉ូតូទាំងមនុស្សរងរបួសធ្ងន់ ដេកស្ដូកស្ដឹងទាំង២នាក់ ប្តីប្រពន្ធត្រូវបានបងប្អូនប្រជាពលរដ្ឋ នាំគ្នាជួយសង្គ្រោះ និងរថយន្តសង្គ្រោះបន្ទាន់ដឹកទៅសង្គ្រោះនៅមន្ទីរពេទ្យ ។
ករណីគ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង៧៖៣០នាទីយប់ ថ្ងៃអាទិត្យ ៧រោច ខែបុស្ស ឆ្នាំច សំរឹទ្ធស័ក ពស២៥៦២ ត្រូវនឹងថ្ងៃទី២៧ ខែមករា ឆ្នាំ២០១៩ ស្ថិតនៅតាមបណ្ដោយផ្លូវជាតិលេខថៃហ្គ័រ ភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។
អ្នកឃើញហេតុការណ៍ បានប្រាប់ថា មុនពេលគ្រោះថ្នាក់ បុរសស្ត្រី២នាក់ ជិះម៉ូតូមួយគ្រឿងម៉ាក Suzuki Nex ពណ៌សលាយខ្មៅ ពាក់ស្លាកលេខភ្នំពេញ 1B-1792 ធ្វើដំណើតាម បណ្ដោយផ្លូវផ្លូវអាស៊ានថៃហ្គ័រ ទិសដៅពីកើតទៅលិច ក្នុងល្បឿនលឿន ខណៈមកដល់ចំណុច កើតហេតុ បានវ៉ាជែង រថយន្តមួយគ្រឿង មិនចាំម៉ាក ស្របពេលនោះ ក៏មានបាវអង្ករទទេស្អាតមួយនៅ កណ្ដាលផ្លូវ ទើបជនរងគ្រោះ ចាប់ហ្វ្រាំងម៉ូតូទាំងបង្ខំធ្វើអោយរអិលដួល បោកនឹងថ្នល់ បណ្ដាលឲ្យស្ត្រីជាប្រពន្ធរងរបួសបែកក្បាល បែកមាត់ ហូរឈាមពេញផ្លូវ ចំណែកបុរសជាប្តីបាក់ឆ្អឹងជំនីរបួសធ្ងន់សន្លប់ស្ដូកស្ដឹង ត្រូវបានរថយន្តសង្គ្រោះ បន្ទាន់មន្ទីរពេទ្យបង្អែកមានជ័យ បានមកដឹកជនរងគ្រោះទាំងពីរនាក់ប្ដីប្រពន្ធបញ្ជូនទៅសង្គ្រោះនៅឯមន្ទីរពេទ្យរុស្សី ។
ក្រោយកើតហេតុ កម្លាំងសមត្ថកិច្ចប៉ុស្តិ៍បានយកម៉ូតូរងគ្រោះទៅរក្សាទុកបណ្តោះអាសន្ន ដើម្បីរង់ចាំក្រុមគ្រួសារ យកឯកសារដែលពាក់ព័ន្ធ មកទទួលត្រឡប់ទៅវិញ៕ សណ្តោស
