សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសម្នាក់ទទួល រងរបួសយ៉ាងដំណំ ខណៈកំពុងដេកយោលអង្រឹងលេងខាងមុខផ្ទះ ត្រូវជនសង្ស័យម្នាក់យកដំបងមកវាយ បណ្ដាលឲ្យរងរបួសថ្ងាស់ យ៉ាងដំណំ កាលពីវេលាម៉ោង១៩និង០៥នាទី ថ្ងៃទី១៣ ខែកុម្ភៈ ឆ្នាំ២០១៩ ស្ថិតក្នុងភូមិបារ៉ែនលើ ឃុំស្វាយប្រទាលស្រុកស្អាង ខេត្តកណ្ដាល ។
លោកវរសេនីយ៍ឯក សេង សុជាតិ អធិការនគរបាលស្រុកស្អាងបានឲ្យដឹងថា បុរសជាជនរងគ្រោះឈ្មោះ នី វណ្ណះ ហៅខ្មៅ ភេទប្រុស អាយុ២៩ឆ្នាំ ជនជាតិខ្មែរ មុខរបរ មិនពិតប្រាកដ (មានស្នាមមុតចំកណ្តាលថ្ងាសចំនួនមួយកន្លែង ) ។ ចំណែកជនសង្ស័យឈ្មោះ ហេង ឆៃហ៊ាង ហៅហើម ភេទប្រុស អាយុ៣០ឆ្នាំ ជនជាតិខ្មែរ មុខរបរមិនពិតប្រាកដ (គេចខ្លួន) ។ ជនរងគ្រោះ និងជនសង្ស័យមានទីលំនៅភូមិបារ៉ែនលើ ឃុំស្វាយប្រទាល ស្រុកស្អាង ខេត្តកណ្តាល ។
លោកអធិការបន្ដថា នៅមុនពេលកើតហេតុ ថ្ងៃទី១៣ ខែកុម្ភះ ឆ្នាំ២០១៩ វេលាម៉ោង១៩ ជនរងគ្រោះ និងម្នាក់ទៀតឈ្មោះ តន ប៊ុនអាង បានដេកអង្រឹងលេងម្នាក់មួយ នៅមុខផ្ទះរបស់ឈ្មោះ ហ៊ាង ខណៈកំពុងតែដេកក៏ស្រាប់តែជនសង្ស័យបានកាន់ដំបងបួនជ្រុងវាយទៅលើឈ្មោះ នីវណ្ណះ ហៅខ្មៅ ចំនួនពីរដំបងដោយពុំដឹងមូលហេតុ បណ្តាលឲ្យមុតចំកណ្តាលថ្ងាសចំនួនមួយកន្លែង បន្ទាប់ពីជនសង្ស័យធ្វើសកម្មភាពរួច ភ្លាមនោះក៏រត់គេចខ្លួនស្រមោល ។
ក្រោយពីមានហេតុការណ៍កើតឡើង ជនរងគ្រោះត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យជ័យជំនះក្រុងតាខ្មៅ ដោយឡែកជនសង្ស័យដែលរត់គេចខ្លួន ត្រូវបាននគរបាលជំនាញកសាងសំណុំរឿង ដើម្បីធ្វើការស្រាវជ្រាវចាប់ខ្លួនចាត់ការតាមច្បាប់ ៕ ស្អាងជ័យ
