សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ដែលតាំងខ្លួន ជានគរបាលខណ្ឌពោធិ៍សែនជ័យ ហើយបានបោកប្រាស់នារីរោងចក្រម្នាក់ យកម៉ូតូអស់ទាំងទូរស័ព្ទនោះ ត្រូវបានលោកយឹម សារ៉ាន់ អធិការនគរបាលខណ្ឌពោធិ៍សែនជ័យ បដិសេធន៍ថា មិនមែនកម្លាំងរបស់លោកទេ ។
នារីរងគ្រោះជាម្ចាស់ម៉ូតូឈ្មោះ អាន ស្រីលីន អាយុ១៩ឆ្នាំ ជាកម្មការិនីរោងចក្រ ស្នាក់នៅបន្ទប់ជួលក្នុងភូមិក្បាលដំរី សង្កាត់កាកាប២ ខណ្ឌពោធិ៍សែនជ័យ ។ ចំណែកប្រុសស្នេហ៍ដែលឆបោកយកម៉ូតូ ហើយគេចខ្លួនបាត់នោះ ត្រូវបានប្រាប់ថា ឈ្មោះ ណាក់ ភារៈ អាយុ៣២ឆ្នាំ ជាមន្ត្រីនគរបាល តែមិនស្គាល់អសយដ្ឋានទេ ។
ប្រភពពីនារីរងគ្រោះឲ្យដឹងទៀតថា នាងបានស្គាល់គ្នាជាមួយបុរសខាងលើ តាមរយៈហ្វេសបុ៊ក ប្រហែលជាង២ខែ ។
គួរបញ្ជាក់ថា ហេតុការណ៍នេះ បានកើតឡើងកាលពីរសៀលថ្ងៃទី១៥ ខែកុម្ភៈ ឆ្នាំ២០១៩ នៅមុខផ្សារស៊ិនជូរីផ្លាហ្សា តាមមហាវិថីសហព័ន្ធរុស្សុី ក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ ខណះដែលពួកគេទាំងពីរនាក់បានមកពីស្រុកកំណើតខាងស្រីក្រោយមកបុរសខាងលើបានប្រាប់នាងឲ្យចាំនៅមុខផ្សារមួយភ្លែត រូបគេជិះម៉ូតូម៉ាក់ឌ្រីមសេ១២៥ ពណ៌ខ្មៅ ស៊េរីឆ្នាំ២០១៨ពាក់ផ្លាកលេខ ភ្នំពេញ ១NT-២៩៤៣ ទៅយកកូនសោចូលផ្ទះដែលផ្ញើ នឹងមិត្តភក្តិ នៅអធិការដ្ឋាននគរបាលខណ្ឌពោធិ៍សែនជ័យ ព្រមទាំងយកទូរស័ព្ទដៃនាងម៉ាកហូវៃមួយគ្រឿងទៅជាមួយផង ងាយស្រួលទូរស័ព្ទរកមិត្តភក្តិ ក្រែងទៅរកមិនជួប ហើយក៏ទៅបាត់រហូតតែម្តង ។
ដោយចាំបាត់ៗ ហើយទូរស័ព្ទទៅមិនចូល និងសូម្បីអាខោនហ្វេសបុ៊កក៏ប្លុកចោលទៀត ទើបនាង និងបងប្អូនសម្រេចចិត្តមកប៉ុស្តិ៍នគរបាលរដ្ឋបាលកាកាប១ ដើម្បីដាក់ពាក្យបណ្តឹងដោយកាន់រូបថតបុរសខាងលើមកជាមួយផង ។ សមត្ថកិច្ចនិយាយថា ទោះបីជាស្ត្រីម្ចាស់បណ្តឹងថា ជននោះជានគរបាលក្តី ក៏មិនទាន់អាចនិយាយឲ្យច្បាស់លាស់នៅឡើយទេថា ជានគរបាល ព្រោះជនខិលខូចអាចប្រើល្បិចបោកក៏ថាបាន ។
រហូតមកដល់រសៀលថ្ងៃទី១៩ ខែកុម្ភៈនេះ ភ្នាក់ងារការសែតនគរវត្ត បានទាក់ទងទៅលោកវីរះសេនីយ៍ឯក យឹម សារ៉ាន់ អធិការនគរបាលខណ្ឌពោធិ៍សែនជ័យ លោកបានបញ្ជាក់ថា បុរសខាងលើមិនមែនជាមន្ត្រីរបស់លោកទេ។
ជនរងគ្រោះបានស្នើដល់សមត្ថកិច្ចមេត្តាជួយរកយុត្តិធម៌ ឲ្យរូបនាងផង និងតាមចាប់ជននោះយកមកផ្តន្ទាទោសតាមច្បាប់ ជៀសវាងជននោះនៅតែបន្តការប្រើរូបភាពជាកម្លាំងនគរបាលដើរបោកប្រាស់គេទៀត ៕ សុខាសែនជ័យ
