សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ទន្ទឹមគ្នានឹងជំងឺឆ្កែឆ្កួតកំពុងតែធ្វើឲ្យមហាជនមួយចំនួន មានការចាប់អារម្មណ៍នោះ ស្រាប់តែតារាសម្តែង និងពិធីករ ម៉ឺន ឯកសុភារិទ្ធ បានបង្ហាញពីក្តីព្រួយបារម្ភ កាន់តែខ្លាំង ពីសុខភាពរបស់ខ្លួន ។ បារម្ភ ព្រោះតែលោកនៅឈឺក្បាល វិលមុខ មិនបាត់ បើទោះបីជាទៅជួបគ្រូពេទ្យចាក់ថ្នាំហើយក៏ដោយ ។
ក្នុងរយៈពេលប៉ុន្មានថ្ងៃមកនេះ មានប្រជាពលរដ្ឋជាច្រើនបានសម្រុកចេញទៅមន្ទីរពេទ្យ ឯកជន និងមណ្ឌលសុខភាពរដ្ឋ បន្ទាប់ពីមានករណីមានមនុស្សស្លាប់ព្រោះជំងឺឆ្កែឆ្កួត ។ ស្របគ្នានេះដែរ តារាសម្តែងរូបសង្ហារូបនេះបានបង្ហាញរូបថតជាច្រើនសន្លឹកដែលមានទាំងស្នាមបួសដែលត្រូវបានឆ្កែខាំពេលដែលលោកទៅសម្តែងនៅទឹកដីនៃខេត្តកំពង់ឆ្នាំង ។ ក្នុងនោះ ម៉ឺន ឯកសុភារិទ្ធ បានបង្ហោះសារថា «ឆ្កែខាំខ្ញុំពិបាកចិត្តណាស់ មិនដឹងម៉េចម៉ាទេ» ។ ការលើកឡើងរបស់តារាសម្តែងរូបនេះត្រូវបានមិត្តភក្តិក៏ដូចជាអ្នកគាំទ្រជាច្រើនបានសួរនាំ និងដេញឲ្យលោកស្វែងរកការចាក់ថ្នាំ និងជួបគ្រូពេទ្យជំនាញ ជៀសវាងការប៉ះពាល់សុខភាពធ្ងន់ធ្ងរបន្ទាប់ពីលោកត្រូវបានឆ្កែខាំចំនួន២ថ្ងៃមកហើយនោះ ។ ទោះជាយ៉ាងណាក្រោយចាក់ថ្នាំបង្ការរួចរាល់តារាប្រុសរូបនេះនៅតែ មានអារម្មណ៍ឈឺក្បាល និង វិលមុខ ដដែល ។
គួរបញ្ជាក់ដែរថាជំងឺឆ្កែឆ្កួត (Rabies) គឺជាជម្ងឺឆ្លងដែលបណ្ដាលឲ្យមានការរលាកខួរក្បាលយ៉ាងធ្ងន់ធ្ងរដល់មនុស្ស និងពពួកសត្វដែលមានឈាមក្ដៅផ្សេងៗទៀត ។ ជំងឺឆ្កែឆ្កួត (Rabies) មានការចម្លងទៅមនុស្សតាមរយៈសត្វ ។ ជំងឺឆ្កែឆ្កួត (Rabies) អាចមានការចម្លងទៅបាននៅពេលដែលសត្វដែលមានផ្ទុកមេរោគនោះអេះ ឬខាំសត្វមួយផ្សេងទៀត ឬមនុស្ស ។ លើសពីនេះ ទឹកមាត់ដែលចេញពីសត្វមានផ្ទុកមេរោគនេះអាចចម្លងរោគឆ្កែឆ្កួតបាន បើទឹកមាត់ជ្រាបចូលទៅប៉ះនឹងភ្នាសសើមផ្នែកខាងក្នុងសត្វមួយផ្សេងទៀត ឬមនុស្ស ។ អការរោគដំបូងៗអាចមានជាអាទិ៍ៈ ក្ដៅខ្លួន និងឈឺឆៀបៗនៅត្រង់កន្លែងដែលមុត ។ អការរោគទាំងនេះមានបន្តដោយអាការៈរោគមួយ ឬច្រើនដូចជាធ្វើ ចលនាដោយបង្ខំ, ឥរិយាបទសប្បាយលីលា, ខ្លាចទឹក, មិនអាចកម្រើកផ្នែកណាមួយនៃរាងកាយបាន, វង្វេងវង្វាន់, និងការបាត់បង់ស្មារតី (ឡប់ៗលែងដឹងខុសត្រូវ) ។
បន្ទាប់ពីរោគសញ្ញានានាបានលេចឡើងហើយនោះ ជានិច្ចកាល ភាគច្រើននៃជំងឺឆ្កែឆ្កួតបណ្ដាលឲ្យស្លាប់បាត់បង់អាយុជីវិត ។ រយៈពេលនៃការកកើតជម្ងឺ និងការចាប់ផ្ដើមចេញរោគសញ្ញា តាមធម្មតាគឺមានចាប់ពីមួយទៅបីខែ ។ ម្យ៉ាងវិញទៀត រយៈពេលនេះអាចប្រែប្រួលពីក្រោមមួយសប្ដាហ៍រហូតដល់ជាងមួយឆ្នាំ៕ វឌ្ឍនា
