សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានហេតុការណ៍ដ៏ភ្ញាក់ផ្អើលមួយបានកើតឡើង ខណៈបុរសម្នាក់អង្គុយស្លាប់លើកៅអី ក្នុងហាងការហ្វេយីហោ «លុយហុង កាហ្វេ១៦៨» ជាប់ផ្លូវបេតុង (ជិតសាលាបារាំង) ក្នុងភូមិទ្រា១ សង្កាត់ស្ទឹងមានជ័យ១ ខណ្ឌមានជ័យ កាលពីវេលាម៉ោង០៧យប់ ថ្ងៃទី២៤ ខែកុម្ភៈ ឆ្នាំ២០១៩ ។
តាមប្រភពពីសតម្ថកិច្ចបានឲ្យដឹងថា ជនរងគ្រោះ(ស្លាប់)មានឈ្មោះ សាត សុខា ភេទប្រុស អាយុ៤៨ឆ្នាំ មុខរបររត់ម៉ូតូឌុប ស្នាក់នៅផ្ទះជួល គ្មានលេខ ក្រោយផ្ទះលក់កាហ្វេកើតហេតុខាងលើ មានស្រុកកំណើតនៅភូមិចា ឃុំរំលេច ស្រុកស៊ីធរកណ្ដាល ខេត្តព្រៃវែង។
តាមសម្ដីរបស់សាច់ញាតិជនរងគ្រោះបានឲ្យដឹងថា មុនថ្ងៃកើតហេតុ ជនរងគ្រោះតែងតែផឹកស្រាស្រវឹង និងមិនសូវហូបបាយទៀងទាត់នោះទេ ស្រាប់តែនៅយប់ថ្ងៃកើតហេតុក៏លឺដំណឹងថា ជនរងគ្រោះអង្គុយស្លាប់ក្នុងរោងកាហ្វេ ។
តាមការបំភ្លឺរបស់អ្នកលក់កាហ្វេ ស្ថិតនៅផ្ទះកើតហេតុខាងលើបានឲ្យដឹងថា នៅមុនកើតហេតុ កាលពីព្រឹកថ្ងៃកើតហេតុ ជនរងគ្រោះបានជិះម៉ូតូមួយគ្រឿង ម៉ាក Honda Dream ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ 1GC-3856 មកចូលហាងកាហ្វេ រួចសំរាលលក់លើកៅអីអង្គុយហើយ លុះដល់ម៉ោងបាយ ជនរងគ្រោះក៏ងើបចេញទៅបាត់ រហូតរសៀលបន្តិច ជនរងគ្រោះក៏បានត្រលប់មកហាងកាហ្វេវិញ រួចហៅការហ្វេមួយកែវអង្គុយផឹកទៀត បន្ទាប់មកជនរងគ្រោះអង្គុយផឹកការហ្វេបណ្តើរ និងមើលរឿងវីដេអូបណ្តើរ រហូតដល់ម៉ោងប្រហែលជិត០៦យប់ថ្ងៃខែដដែល ម្ចាស់ហាង ក៏រៀបចំកៅអីតុ បិទហាង ហើយក៏បានឃើញជនរងគ្រោះដេកនៅកន្លែង បានដាស់ជនរងគ្រោះមិនភ្ញាក់ បាននាំគ្នាមកដាស់ទៀតតែមិនភ្ញាក់ ទើបដឹងថាគាត់បានស្លាប់បាត់ទៅហើយ តែមិនដឹងថា ស្លាប់ដោយសារមូលហេតុអ្វីនោះទេ ទើបប្រញាប់រាយការណ៍ទៅប្តឹងសមត្ថកិច្ចមូលដ្ឋាន ចុះមកពិនិត្យមើលភ្លាមៗផងដែរ ។
តាមការពិនិត្យរបស់សមត្ថកិច្ចជំនាញកោសល្យវិច័យ និងអាជ្ញាធរមូលដ្ឋានបានឲ្យដឹងថា នៅលើដងខ្លួនសព មិនមានស្នាកស្នាមអ្វីគួរឲ្យកត់សម្គាល់ឡើយ ហើយជនរងគ្រោះពិតជាស្លាប់ដោយសារ គាំងបេះដូង ពិតប្រាកដមែន ។
ក្រោយការពិនិត្យបានចប់សព្វគ្រប់ សពត្រូវបានប្រគល់ជូនសាច់ញាតិក្រុមគ្រួសារដឹកយកទៅធ្វើបុណ្យតាមប្រពៃណីនៅឯស្រុកកំណើត ៕ ភារ៉ា ដង្កោ
