សារព័ត៌មាន នគរវត្ត តែងតែនាំមុខគេជានិច្ច
នៅមុនជំនួបកំពូលជាមួយ ប្រធានាធិបតីអាមេរិកដូណាល់ ត្រាំ នៅប្រទេសវៀតណាម លោក គីម ជុងអ៊ុន បានប្រកាសអាសន្ន ពីកង្វះស្បៀងអាហារ នៅក្នុងប្រទេសយ៉ាងខ្លាំង ។ ទាំងនោះ ជាសារមួយដើម្បីអំពាវដល់ លោកត្រាំ លុបទណ្ឌកម្ម ដល់ប្រទេសនេះ ជាការបើកផ្លូវ និងជាទំនុកចិត្ត ឲ្យទីក្រុងព្យុងយ៉ាងបោះបង់បរមាណូ ។
នៅពេលនេះដែរ ប្រសិនបើ កិច្ចពិភាក្សាលើកទីពីរនៅវៀតណាម រីកចំរើន ជឿទុកចិត្តគ្នានោះ ក្រុមហ៊ុនជាច្រើន នឹងទៅវិនិយោគក្នុងប្រទេសកូរ៉េខាងត្បូង ជាមិនខាង ក្នុងនោះមានតំបន់ឧស្សាហកម្ម កេស៊ុង ដែលស្ថិតនៅក្នុងទឹកដីកូរ៉េខាងជើង ។
កន្លងមកបណ្តាក្រុមហ៊ុនធំៗរបស់ប្រទេសដែលមានសេដ្ឋកិច្ចលំដាប់ទី៤នៅក្នុងទ្វីបអាស៊ីកំពុងប្រឈមនឹង បញ្ហាចំណាយខ្ពស់ ទៅលើសេវាពលកម្ម ក៏ដូចជាកំណើនសេដ្ឋកិច្ចយឺត ។ ដូច្នេះនៅកូរ៉េខាងជើង មានតម្លៃពលកម្មទាប និងសម្បូរទៅដោយធនធានធម្មជាតិ ជាឱកាសដល់ក្រុមហ៊ុនកូរ៉េខាងត្បូង។
សារព័ត៌មាន Pakistan Today បានផ្សាយថា ដើមឆ្នាំ២០១៦ លោក Choi Dong Jin រួមជាមួយ ម្ចាស់ក្រុមហ៊ុនជាង១២០ក្រុមហ៊ុន របស់កូរ៉េខាងត្បូង បានបង្ខំចិត្ត បិទ រោងចក្រ នៅតំបន់ឧស្សាហកម្មរួម នៅកូរ៉េខាងជើង ក្រោយរដ្ឋាភិបាលទីក្រុងសេអ៊ូលបានបង្ខំចិត្ត បិទទ្វាររោងចក្រ ដើម្បីប្រឆាំងនឹង ការសាកល្បងមីស៊ីលនិងបរមាណូរបស់កូរ៉េខាងជើង ។
ដើម្បីស្វែងរកទីតាំងដែលមានពលកម្ម ប្រាក់ខែទាប លោក Choi Dong Jin បានសម្រេច ងាកទៅវិនិយោគនៅក្នុងប្រទេសវៀតណាម ។ ក្នុងចំណោមក្រុមហ៊ុន ដែលបានដកចេញពីតំបន់កេស៊ុង ដល់ទៅ១ភាគ៤ ងាកទៅវិនិយោគកម្ពុជា និងវៀតណាម។
នៅពេលនេះដែរ ក្តីសង្ឃឹមរបស់បណ្តាក្រុមហ៊ុន កូរ៉េខាងត្បូង ក្នុងការវិលត្រឡប់ទៅកាន់កូរ៉េខាងជើង វិញ គឺស្ថិតនៅលើជំនួបកំពូលលើកទីពីរ នៅប្រទេសវៀតណាម ។ កន្លងមកកូរ៉េខាងជើងក៏បានអំពាវនាវ ឲ្យបណ្តាក្រុមហ៊ុនកូរ៉េខាងត្បូង វិលត្រឡប់ទៅកាន់ តំបន់ឧស្សាហកម្មកេស៊ុងវិញ ៕
