សារព័ត៌មាន នគរវត្ត តែងតែនាំមុខគេជានិច្ច
ពួកអ្នករកស៊ីដាក់បទល្មើសនេសាទនៅក្នុងបឹងទន្លេសាប ដូចជាដាក់ឆ្នុក ដាក់អំពូលភ្លើង ក៏ដូចជារបាំង ណរ៉ាវ នៅចំណុចឃុំផាត់សណ្តាយ ស្រុកកំពង់ស្វាយ និងឃុំពាមបាង ស្រុកស្ទោង បានបង្ហើបថា ពួកគេបានចំណាយប្រាក់រាប់ម៉ឺនដុល្លារឲ្យមន្ត្រីជំនាញរដ្ឋបាលជលផល និងបរិស្ថាន ។ ប្រភពបានឲ្យដឹងថា សកម្មភាពបទល្មើសនេសាទទាំងនេះ កើតមានយ៉ាងគំហុក ក្នុងរយៈពេលប៉ុន្មានថ្ងៃនេះ ដោយសារតែការឃុបឃិតជាប្រព័ន្ធពីសំណាក់មន្ត្រីជំនាញរដ្ឋបាលជលផល និងបរិស្ថានខេត្តកំពង់ធំ ។ អាជ្ញាធរ និងថ្នាក់ដឹកនាំខេត្ត នៅតែបន្តធ្វើមិនដឹងមិនឮចំពោះបញ្ហាបទល្មើសនេសាទនេះ បើទោះបីជាថ្នាក់ដឹកនាំក្រសួងមហាផ្ទៃបានព្រមានច្រើនលើកច្រើនសារហើយក៏ដោយ ។
ប្រភពបានឲ្យដឹងថា លោក ហួន ផល នាយសង្កាត់ពាមបាង ស្ថិតក្នុងស្រុកស្ទោង បានដើរប្រមូលប្រាក់ពីប្រជានេសាទឆ្នុក បានលុយប្រមាណ៣ម៉ឺនដុល្លារ និងទទួលបាន២ម៉ឺនដុល្លារផ្សេងទៀតពីអ្នកប្រព្រឹត្តល្មើសរបាំងណរ៉ាវ និងយ៉ាំងកាវ ។ ក្រៅពីនោះ លោក តុប កក្កដា ប្រធានមន្ទីរបរិស្ថានខេត្តកំពង់ធំទទួលបាន១ម៉ឺនដុល្លារ ។ ចំណែកមន្ត្រីប្រចាំស្នាក់ការនៅឃុំផាត់សណ្តាយ ទទួលបាន៦៧លានរៀល ។ ប្រភពបានបន្ថែមថា ដោយសារការចែករំលែកជាប្រព័ន្ធបែបនេះ ទើបអ្នកនេសាទអាចបន្តសកម្មភាពបានដោយសេរី ។ បើមិនដូច្នោះទេ មុខជាត្រូវសមត្ថកិច្ចខាងណេះ ឬខាងណោះ ដែលមិនទទួលបានលាភសក្ការចុះទៅចាប់បំផ្លាញកម្ទេចឧបករណ៍នេសាទល្មើសច្បាប់ទាំងនោះជាមិនខានឡើយ ។ លោក ហួន ផល ត្រូវគេអះអាងថា ជាអ្នកដែលទទួលបានផលប្រយោជន៍ច្រើនជាងគេ ហើយក៏បានចែករំលែកប្រយោជន៍នោះឲ្យទៅលោក ប៉ែន វណ្ណរិទ្ធ នាយខណ្ឌរដ្ឋបាលជលផលកំពង់ធំនោះផងដែរ ។
ប្រជានេសាទបានអះអាងថា ពួកគេបានប្រមូលលុយគ្នាដើម្បីជូនទៅជំនាញទាំងឡាយខាងលើនេះកុំឲ្យមករញ៉េរញ៉ៃកន្លែងប្រព្រឹត្តល្មើសរបស់ពួកគេ ។ ហេតុដូច្នេះហើយបានជាគេមិនដែលឃើញពួកមន្ត្រីជលផល ក៏ដូចជាខាងបរិស្ថានចុះបង្ក្រាបបទល្មើសនេសាទម្តងណាឡើយ ។ បទល្មើសនេសាទបានកើតឡើងព្រោងព្រាត មិនថារដូវបិទនេសាទ ឬរដូវបើកនេសាទនោះឡើយ ។ ជាក់ស្តែងពេលនេះ នៅពេលដែលទឹកបឹងទន្លេសាបកាន់តែរីងរាក់ បទល្មើសនេសាទកាន់តែកើតឡើងខ្លាំងជាងពេលណាៗទាំងអស់ ។ ប្រជាពលរដ្ឋស្នើឲ្យអាជ្ញាធរខេត្តកំពង់ធំ ចាត់វិធានការបង្ក្រាបបទល្មើសនេសាទផង ពីព្រោះថា ពួកមន្ត្រីជំនាញ ដូចជារដ្ឋបាលជលផល និងបរិស្ថានជាដើមនោះ ត្រូវរ៉ូវជាមួយអ្នកនេសាទល្មើសច្បាប់អស់ទៅហើយ ៕
