សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ សមាជិកសហភាពសហព័ន្ធយុវជនកម្ពុជា(ស.ស.យ.ក) ដឹកនាំដោយ លោក សេន ណាស៊ី និងលោក កៅ អ៊ីមរ៉ន បាននាំយកថវិកាសប្បុរសធម៌ ឧបត្ថម្ភ ចំនួន ១៦លានរៀល របស់ ស.ស.យ.ក ប្រគល់ជូនប្រជាពលរដ្ឋរងគ្រោះខ្មែរឥស្លាម ១៦គ្រួសារ ដែលត្រូវបានអគ្គិភ័យឆេះផ្ទះអស់ចំនួន ១៦ខ្នង ក្នុងមួយគ្រួសារទទួលបានថវិកា ១លានរៀល ដើម្បីយកដោះស្រាយក្នុងជីវភាពបានមួយគ្រា តាមវប្បធម៌ចែករំលែក ក្នុងគ្រាមានអាសន្ន ។ អំណោយនេះ ត្រូវបានប្រគល់ជូនដល់ដៃបងប្អូនប្រជាពលរដ្ឋរងគ្រោះ កាលពីថ្ងៃអាទិត្យ១២ រោច ខែមាឃ ឆ្នាំចសំរឹទ្ធស័ក ព.ស ២៥៦២ ត្រូវនឹងថ្ងៃទី៣ មីនា ឆ្នាំ២០១៩ ។
លោក កៅ អ៊ីមរ៉ន អនុរដ្ឋលេខាធិការក្រសួងព័ត៌មាន និងជាសមាជិកសហភាពសហព័ន្ធយុវជនកម្ពុជា បានបញ្ជាក់ថា៖ កាលពីថ្ងៃទី០១ ខែមីនា ឆ្នាំ២០១៩ កន្លងទៅនេះ នៅវេលាប្រមាណ ម៉ោង ៣រសៀល មានគ្រោះអគ្គិភ័យមួយបានកើតឡើង នៅភូមិ ស្វាយតាណន់(ខ) ឃុំព្រែករំដេង ស្រុកស្រីសន្ធរ ខេត្តកំពង់ចាម ដែលបានឆេះផ្ទះរបស់ប្រជាពលរដ្ឋខ្មែរឥស្លាមអស់ចំនួន ១៦ខ្នង ព្រមទាំងខាតបង់ទ្រព្យសម្បត្តិ និងថវិកា យ៉ាងច្រើនសន្ធឹកសន្ធាប់ ។
អគ្គិភ័យនេះ ត្រូវបានរលត់ទៅវិញនៅ រសៀល ម៉ោងប្រមាណ ៥:១៥នាទី ដោយមានការ ជួយ អន្តរាគមន៍ពីកងកម្លាំងជាមួយរថយន្តពន្លត់អគ្គិភ័យរបស់ស្នងការខេត្តកំពង់ចាម១គ្រឿង នគរបាលស្រុកស្រីសន្ធរ២គ្រឿង ស្រុកកងមាស ១គ្រឿង និងស្រុកខ្សាច់កណ្តាលខេត្តកណ្តាល ១គ្រឿងផងដែរ ៕ សំរិត
