សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្តីកង្វល់របស់ផលិតករជុំវិញការប្រឈមនឹងការបង់ពន្ធលើការផលិតភាពយន្តនោះ ត្រូវបានបញ្ចប់ហើយ ក្រោយពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណជាចក្រកម្ពុជាបានប្រកាសសម្រេចសម្រួល និងអនុគ្រោះខាងផ្នែកពន្ធដារ សម្រាប់វិស័យភាពយន្តរយៈពេល៥ឆ្នាំបន្ថែមទៀត រហូតដល់ដំណាច់ឆ្នាំ ២០២៣ ដើម្បីជាការលើកទឹកចិត្ត និងលើកស្ទួយវិស័យសិល្បៈ និងការផលិតភាពយន្តខ្មែរ ។
ការប្រកាសនេះធ្វើឡើងក្នុងឱកាសដែលសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន អញ្ជើញចូលរួមទិវា «វប្បធម៌ជាតិ ៣មីនា» លើកទី២១នៅរសៀលថ្ងៃពុធ ១កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៦ ខែមីនា ឆ្នាំ២០១៩នៅមជ្ឈមណ្ឌលកោះពេជ្រ ។ ពិធីបិទមហោស្រពសិល្បៈយុវជនទូទាំងប្រទេសថ្ងៃនេះគឺមានការជួបជុំសំណេះសំណាល និងពិសារអាហារសាមគ្គីរួមគ្នាជាមួយថ្នាក់ដឹកនាំក្រសួងវប្បធម៌ និងវិចិត្រសិល្បៈ រួមទាំងសិល្បករ សិល្បការិនី ដែលមានចំនួនប្រមាណ ៤ពាន់នាក់ ។
នៅក្នុងឱកាសនោះ សម្តេចតេជោ ហ៊ុន សែននាយករដ្ឋមន្ត្រី បានផ្តល់មតិណែនាំ និងអនុសាសន៍ចំនួន៧ចំនុច សំខាន់ៗក្នុងចំណោមនោះដែរទាក់ទងនឹងវិស័យភាពយន្តដោយកន្លងមក ដោយពិនិត្យឃើញពីភាពចាំបាច់ក្នុងការជំរុញ និងលើកស្ទួយ វិស័យភាពយន្តខ្មែរ ដែលប្រឈមនឹងការប្រកួតប្រជែងដ៏ស្រួចស្រាល់ទៅនឹងការហូរចូលនៃភាពយន្តបរទេស រាជរដ្ឋាភិបាលបានសម្រេចអនុញ្ញាតសម្រួលផ្នែកពន្ធដារដល់សហគ្រាសផលិតភាពយន្តក្នុងស្រុករយៈពេល ៣ឆ្នាំ រហូតដល់ ឆ្នាំ ២០១៨ ។
ដើម្បីជាការលើកទឹកចិត្ត និងលើកស្ទួយវិស័យ សិល្បៈ និងការផលិតភាពយន្តខ្មែរ រាជរដ្ឋាភិបាលសម្រេចសម្រួល និងអនុគ្រោះខាងផ្នែកពន្ធដារសម្រាប់រយៈពេល៥ឆ្នាំ បន្ថែមទៀត រហូតដល់ដំណាច់ឆ្នាំ ២០២៣ ដូចជាអនុញ្ញាតឲ្យព្យួរទុកការអនុវត្តពន្ធកាត់ទុក (១៥%) លើ សួយសារនៃទ្រព្យអរូបិយ (ការផ្តល់សិទ្ធិបញ្ចាំងខ្សែភាពយន្តផលិតក្នុងស្រុក) ។
អនុញ្ញាតឲ្យព្យួរពន្ធលើប្រាក់ចំណូលជូនក្រុមហ៊ុនផលិតកម្មភាពយន្តខ្មែរ ។ អនុញ្ញាតព្យួរទុកការអនុវត្តឤករ ពិសេសលើសេវាលំហែកំសាន្ត (១០%) ជូនដល់សិល្បៈសៀកនៃក្រុមហ្វាពន្លឺសិល្បៈខេត្តសៀមរាប ។ សហគ្រាសផលិតភាពយន្ត និងសៀកត្រូវបំពេញកាតព្វកិច្ចចុះបញ្ជីពន្ធដារកត់ត្រា និងកាន់កាប់បញ្ជីការគណនេយ្យ ដាក់លិខិតប្រកាសពន្ធប្រចាំខែ និងប្រចាំឆ្នាំ ព្រមទាំងបំពេញកាតព្វកិច្ចពន្ធដារផ្សេងទៀត ឲ្យបានត្រឹមត្រូវដូចក្រុមហ៊ុនឤជីវកម្មដទៃទៀត ដើម្បីជាការចូលរួមចំណែកពង្រឹងអនុលោមភាពសារពើពន្ធ និងវប្បធម៌ពន្ធនៅកម្ពុជា ។
សិល្បករ និងផលិតករថាថ្លែងសាទរ និងអគុណយ៉ាងខ្លាំងចំពោះសម្តេចតេជោដែលតែងយល់សុខទុក្ខរបស់ប្រជាពលរដ្ឋកម្ពុជារួមទាំងសិល្បករ និងផលិតករ ។ លោក ហ៊ុយ យ៉ាឡេង ចាងហ្វាងផលិតកម្ម មាតុចក្រ បានបញ្ជាក់ថា លោក សូមលើកម្រាមដៃ១០ថ្លែងអំណរគុណដល់រាជរដ្ឋាភិបាលកម្ពុជាក្នុងការអនុគ្រោះលើកលែងពន្ធដារក្នុងរយៈពេល៥ឆ្នាំ ។ លោកចាត់ទុកថាជាក្តីសង្ឃឹមសម្រាប់ភាពយន្តខ្មែរដែលកំពុងដើរទៅមុខហើយនោះដែរ៕ វឌ្ឍនា
