សារព័ត៌មាន នគរវត្ត តែងតែនាំមុខគេជានិច្ច
គ្មានការបង្ក្រាបទាល់ទេសោះចំពោះសកម្មភាពកាប់បំផ្លាញព្រៃឈើទាំងតូច ទាំងធំ នៅក្នុងភូមិសាស្ត្រស្រុកភ្នំក្រវាញ ខេត្តពោធិ៍សាត់ ។ មន្ត្រីរដ្ឋបាលព្រៃឈើបានដាក់កម្លាំងចាំយកលុយពីរថយន្តកែច្នៃ ឬគោយន្ត ដឹកឈើមូលទាំងនោះជាចំហរ ។ អ្នករកស៊ីដឹកឈើចាំបាច់ត្រូវតែបង់ប្រាក់ឲ្យមន្ត្រីរដ្ឋបាលព្រៃឈើ លោក សួស សុផានិត នាយផ្នែករដ្ឋបាលព្រៃឈើក្រវាញ ដោយខានមិនបាន ។ បណ្តាជនដែលរកស៊ីដឹកឈើដូចក្នុងរូបភាពនេះ ប្រសិនបើមិនបង់ប្រាក់ទេ មុខជាត្រូវចាប់ បង្ក្រាបយកស្នាដៃ ហើយថ្ងៃក្រោយគ្រាន់តែឮឈ្មោះ លោកមេព្រៃ សួស សុផានិត គឺញាក់សាច់តែម្តង ។
ប្រភពបានរាយការណ៍ថា ឈើមូលដែលមានទំហំតូចៗល្មម ត្រូវបានគេកាប់បំផ្លាញយ៉ាងរាលដាលនៅក្នុងស្រុកភ្នំក្រវាញ នៃដែនសមត្ថកិច្ចបរិស្ថាន ។ មួយថ្ងៃៗ មានរថយន្តកែច្នៃ ឬគោយន្តរាប់សិបគ្រឿង ដឹកឈើមូលចេញពីតំបន់ព្រៃនៃស្រុកភ្នំក្រវាញ ឆ្ពោះមកស្រុកក្រគរ បន្តមកខេត្តកំពង់ឆ្នាំង ។ ពួកអ្នករកស៊ីឈើមូលទាំងនេះ អះអាងថា យ៉ាងណាក៏ត្រូវទូរស័ព្ទប្រាប់លោក សួស សុផានិត មុនពេលចេញដំណើរមកដល់ដែនសមត្ថកិច្ចរបស់លោក ។ ប្រសិនជាមិនប្រាប់មុន ឬមិនព្រមបង់ប្រាក់ មុខជាត្រូវបង្ក្រាបចាប់ជាមិនខានឡើយ ។ ចាប់តែមួយគឺរញ្ជួយគ្រប់ទិស ដូច្នេះគ្មាននរណាហ៊ានរំលងលោក សួស សុផានិត នាយផ្នែករដ្ឋបាលព្រៃឈើក្រវាញ នោះបានឡើយ ។ នៅពេលឆ្លងចូលដល់ស្រុកក្រគរ ក៏ត្រូវបង់ជូនលោក ប៊ុល ចន្ថា នាយផ្នែករដ្ឋបាលព្រៃឈើក្រគរមួយទៀត ។
ក្រុមអ្នករកស៊ីដឹកឈើមូលទាំងនោះអះអាងថា សកម្មភាពកាប់ឈើតូចៗនៅក្នុងព្រៃកំពុងប្រជែងគ្នា ។ ការកាប់ឈើចេញពីតំបន់ការពារ ក្នុងដែនសមត្ថកិច្ចបរិស្ថាន ក៏ត្រូវបង់ប្រាក់ជូនមន្ត្រីបរិស្ថានប្រចាំការនៅទីនោះដែរ ។ ស្ថានភាពបែបនេះ ប្រសិនបើមិនទប់ស្កាត់ទេនោះ ព្រៃឈើនៅតំបន់ការពារក្នុងស្រុកភ្នំក្រវាញ នឹងត្រូវរលាយក្នុងពេលឆាប់ៗ ។ ពួកមន្ត្រីមានសមត្ថកិច្ច ទាំងបរិស្ថាន និងមេព្រៃនៅខេត្តពោធិ៍សាត់មិនដែលខ្វល់ថា ត្រូវបង្ក្រាបបទល្មើសឬត្រូវការពារព្រៃឈើអ្វីនោះឡើយ ។ ផ្ទុយទៅវិញ ពួកគេបន់ឲ្យតែមានបទល្មើស ដើម្បីបានលាភសក្ការតែប៉ុណ្ណោះ ។ ប្រសិនបើគ្មានបទល្មើស ក៏គ្មានលាភសក្ការចូលហោប៉ៅនោះដែរ ។
លោក សួស សុផានិត ត្រូវគេរាយការណ៍ថា ជាអ្នកដែលមិនខ្វល់ចំពោះការរិះគន់ ឬក៏ត្រូវចាត់វិធានការបង្ក្រាបបទល្មើសអ្វីម្តងណាឡើយ ។ យ៉ាងដូច្នេះ ក៏ព្រោះតែថ្នាក់ដឹកនាំខេត្ត ជាពិសេសស្ថាប័នរដ្ឋបាលព្រៃឈើផ្ទាល់ ពោលគឺមន្ទីរកសិកម្មខេត្តពោធិ៍សាត់ផ្តេកផ្តួលក្នុងរឿងផលប្រយោជន៍នេះជាមួយមន្ត្រីនៅមូលដ្ឋាននោះដែរ ។ ដូច្នេះ បានជាមិនមានការបង្ក្រាបណាមួយឡើយនៅក្នុងដែនសមត្ថកិច្ចរបស់លោក សួស សុផានិត ។ យូរៗម្តងគេឃើញសមត្ថកិច្ចដទៃចុះទៅបង្ក្រាបបទល្មើសនៅក្នុងដែនសមត្ថកិច្ចរបស់លោកសួស សុផានិត នោះដែរ ។ គេរំពឹងថា អគ្គនាយកដ្ឋានរដ្ឋបាលព្រៃឈើដឹកនាំដោយលោក កែវ អូម៉ាលីស្ស នឹងចាត់វិធានការ ចំពោះមន្ត្រីខិលខូច ដូចយ៉ាងលោកសួស សុផានិត នេះផង ៕
