រថយន្តម៉ាកLEXUS RX300 បុកហុងដាសេ១២៥បញ្ច្រាសគ្នារបួសធ្ងន់ស្រាល២នាក់

ខេត្តស្វាយរៀង៖ បុរស២នាក់បានរងរបួសធ្ងន់ ស្រាល ដោយសារករណីគ្រោះថ្នាក់ចរាចរណ៍ គួរឲ្យរន្ធត់ ខណៈកំពុងជិះម៉ូតូត្រូវរថយន្តម៉ាកLEXUS RX300 ពណ៌ខ្មៅ ទិសដៅបញ្ច្រាសគ្នា ប្រើប្រាស់ល្បឿនលឿន មិនប្រកាន់ស្ដាំបុកយ៉ាងពេញទំហឹងលាន់ដូចរន្ទះបង្កការភ្ញាក់ផ្អើលដល់អ្នកភូមិកំពុងដេកលង់លក់ចេញមកមើល និងរាយការណ៍មកសមត្ថកិច្ចភ្លាមៗកាលពីថ្ងៃព្រហស្បតិ៍ខែផល្គុនឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី០៧ខែមីនាឆ្នាំ២០១៩ វេលាម៉ោង០៣:១៥នាទីទាបភ្លឺ នៅលើផ្លូវជាតិលេខ០១ត្រង់ចំណុចគីឡូម៉ែត្រលេខ១៦៦ និង១៦៧ស្ថិតក្នុងភូមិបាវិតកណ្តាលសង្កាត់បាវិតក្រុងបាវិត ខេត្តស្វាយរៀង ។

យោងតាមសមត្ថកិច្ចនគរបាលក្រុងបាវិតបានឲ្យដឹងថា បុរសដែលរងរបួសធ្ងន់បាក់កជើងខាងឆ្វេង មានឈ្មោះ ស្រីម សាវឿន អាយុ ៣៤ឆ្នាំជនជាតិខ្មែរមុខរបរបុគ្គលិកហាងចិន និងអ្នករួមដំណើរឈ្មោះ លី មករា ភេទប្រុស អាយុ១៧ឆ្នាំ ជនជាតិខ្មែរ មុខរបរបុគ្គលិកហាងចិន អ្នកទាំង២ មានទីលំនៅភូមិទួលទ្រាត្បួង ឃុំជប់ ស្រុកត្បូងឃ្មុំ ខេត្តត្បូងឃ្មុំ ។

ចំណែកអ្នកបើកបរបង្កហេតុ ដែលសមត្ថកិច្ចឃាត់ខ្លួនបានមកសាកសួរមានឈ្មោះ អឿន ភេទប្រុស អាយុ២៧ឆ្នាំ ជនជាតិខ្មែរ មុខរបរបើកបររត់តាក់ស៊ី រស់នៅភូមិស្វាយ ឃុំសំរោង ស្រុករោងទង ខេត្តតាកែវ ។

បើតាមសាក្សីបានឲ្យដឹងថា មុនកើតហេតុ មានរថយន្តមួយគ្រឿង ម៉ាកLEXUS RX300 ពណ៌ខ្មៅ ពាក់ស្លាកលេខ ភ្នំពេញ 2AT.7881 បើកបរដោយបុរសម្នាក់ ក្នុងទិសដៅពីលិចទៅកើត ប្រើប្រាស់ល្បឿនលឿន មិនប្រកាន់ស្ដាំ ស្រាប់តែទៅបុកប៉ះ នឹងម៉ូតូមួយគ្រឿង ម៉ាកហុងដា C110 ពណ៌ព្រីងទុំគ្មានស្លាកលេខ ជិះគ្នា២នាក់ទិសដៅបញ្ច្រាសគ្នា បណ្តាលឲ្យរងរបួសធ្ងន់បាក់កជើងខាងឆ្វេងបញ្ជូនទៅព្យាបាលនៅមន្ទីរពេទ្យបង្អែកខេត្តស្វាយរៀង មិនពាក់មួកសុវត្ថិភាពម៉ូតូគ្មានកញ្ចក់មើលក្រោយ និងអ្នករួមដំណើរម្នាក់ទៀតទៅព្យាបាលមន្ទីរពេទ្យផាសុខភាព២បាវិត ។

ក្រោយមក អ្នកភូមិបានរាយការណ៍មកសមត្ថកិច្ចមូលដ្ឋាន និងវាស់វែង និងអូសយកវត្ថុតាងមធ្យោបាយរថយន្ត និងម៉ូតូទាំង២គ្រឿង យកមករក្សាទុកនៅអធិការដ្ឋាននគរបាលក្រុងបាវិតដើម្បីបំពេញសំណុំរឿងតាមច្បាប់ ៕ យឹមសុថាន