បុរសម្នាក់ ស្រវឹងស្រា ជិះម៉ូតូទៅបុកស្ត្រីដើរតាមផ្លូវ របួសធ្ងន់ នៅព្រៃឆ្លាក់

ខេត្តស្វាយរៀង៖ មានករណីគ្រោះថ្នាក់ចរាចរណ៍ បន្ទាប់ពីស្ត្រីអ្នកលក់ដូរម្នាក់ ខណៈកំពុងដើរថ្មើរជើងតាមផ្លូវស្រាប់តែមានបុរសទំនងស្រវឹងស្រាជិះម៉ូតូក្នុងល្បឿនលឿនបុកពេញ ទំហឹងកាលពីថ្ងៃ ព្រហស្បតិ៍ ០២ កើត ខែ ផល្គុន ឆ្នាំ ច សំរឹទ្ធិស័ក ព.ស ២៥៦២ ត្រូវ នឹងថ្ងៃទី ៧ ខែមីនា ឆ្នាំ២០១៩ វេលាម៉ោង ៨យប់ លើផ្លូវលេខ៣១៥ ស្ថិតក្នុងភូមិ ព្រៃឆ្លាក់ សង្កាត់ ព្រៃឆ្លាក់ ក្រុង ស្វាយរៀង ។

យោងតាមសមត្ថកិច្ចនគរបាលក្រុងស្វាយរៀងបានឲ្យដឹងថា ស្ត្រីដែលរងរបួសធ្ងន់មាន ឈ្មោះ យួ ណារែន អាយុ ៥២ ឆ្នាំ មុខរបរ លក់ដូរ រស់នៅភូមិ សាលាស្រុកចាស់ សង្កាត់ ព្រៃឆ្លាក់ ក្រុង ស្វាយរៀង។

ប្រភពបន្តថា ចំណែកអ្នកជិះម៉ូតូបង្កហេតុមានឈ្មោះ ព្រាប សុភារ៉ា ភេទ ប្រុស អាយុ ៥៦ ឆ្នាំ មុខរបរ កម្មករសំណង់ រស់នៅភូមិ ព្រះទន្លេ សង្កាត់ សង្ឃ័រ ក្រុង ស្វាយរៀង ខេត្ត ស្វាយរៀង ខណៈជិះ ម៉ូតូម៉ាក ហុងដាសេ ១២៥ ពណ៌ ខ្មៅ ពាក់ផ្លាកលេខ ស្វាយរៀង ១C ០៧៧៤ ។

តាមសាក្សីបានឲ្យដឹងថា មុនកើតហេតុមានស្ត្រីចំណាស់ម្នាក់បានដើរថ្មើជើង លើផ្លូវលេខ៣១៥ ក្នុងទិសដៅពីជើងទៅត្បូង ខណៈនោះស្រាប់តែមានបុរសម្នាក់បានជិះម៉ូតូមួយគ្រឿងម៉ាកហុងដាសេ ១២៥ ទិសដៅស្របគ្នាពីជើងមកត្បូងទំនងស្រវឹងស្រា ក៏រេចង្កូតទៅបុកយ៉ាងពេញទំហឹងបង្កការភ្ញាក់ផ្អើលដល់អ្នកភូមិចេញមកមើល និងរាយការណ៍ មកសមត្ថកិច្ចមូលដ្ឋាន និងឃាត់ខ្លួនម្ចាស់ម៉ូតូមកសាកសួរផងដែរ ។

ក្រោយមក ស្ត្រីដែលរងរបួសធ្ងន់ ត្រូវបានដឹកមកសង្គ្រោះនៅមន្ទីរពេទ្យបង្អែកខេត្តស្វាយរៀង និងវាស់វែងអូសមកប៉ុស្តិ៍រដ្ឋបាល ខណៈសមត្ថកិច្ចបានវាស់ជាតិស្រវឹងមាន (០,៨៦ mg/L)ផងដែរ ៕