សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ ត្រូវបានមេការសំណង់ឃាត់ខ្លួនរួចប្រគល់ឲ្យសមត្ថកិច្ចចាត់ការតាមច្បាប់បន្ទាប់ពីជិះម៉ូតូសណ្តោងរ៉ឺម៉ក ដើរធ្វើសកម្មភាពលួចយកដែក សម្ភារការដ្ឋានសំណង់កំពុងធ្វើផ្លូវ កាលពីវេលាម៉ោង៣ទៀបភ្លឺ ឈានចូលថ្ងៃទី១១ ខែមីនា ឆ្នាំ២០១៩ ស្ថិតនៅក្នុងភូមិព្រៃព្រីងជើង សង្កាត់ចោមចៅ៣ ខណ្ឌពោធិ៍សែនជ័យ ។
ជនសង្ស័យទាំង២នាក់ ឃាត់ខ្លួនបាន ទី១ ឈ្មោះ ចាន់ សុផានិត ភេទប្រុស អាយុ២១ឆ្នាំ មុខរបរ មិនពិតប្រាកដ ស្នាក់នៅផ្ទះជួល ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ មានស្រុកកំណើត ភូមិស្រែព្រីង សង្កាត់ផ្សារឆ្នាំង ខេត្តកំពង់ឆ្នាំង ។ ទី២ ឈ្មោះ ចេង ប៉ា ភេទប្រុស អាយុ២៦ឆ្នាំ មុខរបរមិនពិតប្រាដ ស្នាក់នៅ ភូមិព្រៃទា សង្កាត់ចោមចៅ៣ មានស្រុកកំណើត ភូមិផ្អេរ ឃុំផ្អេរ ស្រុករលៀប្អៀរ ខេត្តកំពង់ឆ្នាំង ។
តាមសម្តីបុរសឈ្មោះ ស៊ឹម វុទ្ធី អាយុ៣៨ឆ្នាំ ជាមេការសំណង់ខាងលើ បានឲ្យដឹងថាកន្លងមកធ្លាប់ បាត់ដែកពុម្ព អស់៨ដើម និងម៉ាស៊ីន សម្រាប់វីបេតុង ម្តងហើយ ស្រាប់តែមកដល់វេលាម៉ោងខាងលើនេះ ក៏ឃើញជនសង្ស័យ២នាក់ ជិះម៉ូតូសណ្តោងរ៉ឺម៉កមកធ្វើសកម្មភាពលើកដែកពុម្ព ខណ:ដែលកំពុងលើក គាត់ឃើញទាន់ ក៏ចាប់ឃាត់ខ្លួនតែម្តង ។
តាមសម្តីជនសង្ស័យ បានឲ្យដឹងថា ពួកគេពិតជាលួចយកដែកនៅចំណុចខាងលើមែន ហើយកាលពីថ្ងៃទី០៩ កន្លងទៅពួកគេលួចបានតែម៉ាស៊ីន វីបេតុងទេ ។
ស្របពេលដែលឃាត់ខ្លួនជនសង្ស័យ២នាក់ លួចដែក ស្រាប់តែ មានបុរសម្នាក់ផ្សេងទៀត អូសរទេះអេតចាយ ដឹកដែក ច្រងែងច្រង៉ាង កាត់តាមចំណុចក្នុងភូមិខាងលើ ដោយសង្ស័យ ក៏ចាប់ឃាត់ ប្រគល់ឲ្យប៉ូលិសសាកសួររួមជាមួយដែរ។
បុរសអូសរទេះ ឈ្មោះ ថេ ដេត អាយុ២១ឆ្នាំ មុខរបរ មិនពិតប្រាកដ ស្នាក់នៅ ផ្ទះជួលភូមិព្រៃទា សង្កាត់ចោមចៅ៣ មានស្រុកកំណើត ខេត្តត្បូងឃ្មុំ ។
ជនសង្ស័យ២នាក់ និងបុរសម្នាក់ទៀត សរុប៣នាក់ ត្រូវបានឃាត់ខ្លួន នាំទៅសាកសួរនៅប៉ុស្តិ៍ចោមចៅ៣ ដើម្បីចាត់ការតាមនីតិវិធី ៕ សុខាសែនជ័យ
