សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានអគ្គិភ័យមួយបានឆាបឆេះឃ្លាំងសិប្បកម្ម ធ្វើស្លាកយីហោមួយកន្លែង ក្បែរបុរី៩៩៩ ផ្លូវ៨៩BT ក្រុម៤ ភូមិត្នោតជ្រុំ៥ សង្កាត់បឹងទំពន់២ ខណ្ឌមានជ័យ យ៉ាងសន្ធោសន្ធៅ និងបណ្ដាលឲ្យរងការខូចខាតសម្ភារមួយចំនួនធំ កាលពីវេលាម៉ោង៨យប់ ថ្ងៃអង្គារ ៧កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១២ ខែមីនា ឆ្នាំ២០១៩ ។
យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ នៅសិប្បកម្មធ្វើស្លាកយីហោខាងលើ គឺមានជាងកំពុងតែផ្សាដែក លុះពេលកំពុងតែផ្សាដែកនោះ ស្រាប់តែខ្ទាតកម្ទេចផ្សាទៅប៉ះនឹងកំប៉ុងសាំងក្រអូប បណ្ដាលឲ្យចេញជាផ្កាភ្លើងយ៉ាងសន្ធោសន្ធៅ ហុយផ្សែងខ្មួលខ្មាញ់តែម្តង។
ភ្លាមៗនោះដែរ បងប្អូនប្រជាពលរដ្ឋ ព្រមទាំងជាងៗ ដែលនៅក្នុងសិប្បកម្មនោះ បាននាំគ្នាយកបំពង់ពន្លត់អគ្គិភ័យ និងទឹកមកជួយពន្លត់យ៉ាងញាប់ដៃញាប់ជើង ទើបភ្លើងរលត់ទៅវិញនៅវេលាម៉ោង៨៖៣០នាទីយប់ថ្ងៃដដែល ។
ក្រោយកើតហេតុ គេឃើញមានសមត្ថកិច្ចមូលដ្ឋានបានចុះទៅកន្លែងដើម្បីសាកសួរពីករណីកើតហេតុខាងលើ ហើយក៍បានឲ្យដឹងថា ការចាប់ឆាបឆេះនេះគឺមិនបណ្តាលឲ្យមានគ្រោះថ្នាក់ដល់មនុស្សនោះទេ គ្រាន់តែរងការខូចខាតម៉ូតូម៉ាកហុងដាគុបជ្រុងមួយគ្រឿង, សម្ភារសម្រាប់កែច្នៃស្លាកយីហោ និងតុ ទូអស់បន្តិចបន្ទួចតែប៉ុណ្ណោះ ៕ ភារ៉ា ដង្កោ
