យុវជន២នាក់ជិះម៉ូតូល្បឿនលឿនរេចង្កូតដួលបោកក្បាលរងរបួសធ្ងន់ ស្រាល

ខេត្តស្វាយរៀង៖ យុវជនសិស្សសាលា២នាក់ បានរងរបួសធ្ងន់ ស្រាល ដោយសារករណីគ្រោះថ្នាក់ចរាចរណ៍ជិះម៉ូតូប្រើប្រាស់ល្បឿនលឿន មិនប្រយត្ន័រេចង្កូតដួលបោក នឹងថ្នល់កាលពីថ្ងៃ ព្រហស្បតិ៍ ០៩ កើត ខែ ផល្គុន ឆ្នាំ ច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១៤ ខែមីនា ឆ្នាំ ២០១៩ វេលាម៉ោង ៣:១៥ នាទីរសៀល លើផ្លូវជាតិលេខ ០១ ចន្លោះគីឡូម៉ែតលេខ ១២៧និង១២៨ ស្ថិតក្នុងភូមិ បាក់រនាស់ សង្កាត់ សង្ឃ័រ ក្រុង ស្វាយរៀង ។

បើតាមសមត្ថកិច្ចនគរបាលក្រុងស្វាយរៀងបានឲ្យដឹងថា យុវជនដែលរងរបួសមានឈ្មោះសំណាង វិសាល អាយុ ១៣ ឆ្នាំ មុខរបរ សិស្ស រស់នៅភូមិ ភ្លៅ ឃុំ តាសួស ស្រុក ស្វាយជ្រំ ខេត្ត ស្វាយរៀង និងអ្នករួមដំណើរឈ្មោះស៊ែម ដេវិត អាយុ ១៤ ឆ្នាំ មុខរបរ សិស្ស រស់នៅភូមិ ធ្មល់ សង្កាត់ ចេក ក្រុង ស្វាយរៀង ខេត្ត ស្វាយរៀង ខណះជិះម៉ូតូម៉ាក ហុងដាសេ ១២៥ ពណ៌ខ្មៅ ពាក់ស្លាកលេខ ស្វាយរៀង ១K ៣៤៦១ ។

តាមសាក្សីបានឲ្យដឹងថា មុនកើតហេតុមានយុវជនជាសិស្សសាលា២នាក់បានជិះម៉ូតូមួយគ្រឿង ម៉ាក ហុងដាសេ ១២៥ ពណ៌ ខ្មៅ ពាក់ស្លាកលេខ ស្វាយរៀង ១K ៣៤៦១ លើផ្លូវជាតិលេខ ០១ ពីកើតទៅលិច មិនពាក់មួកសុវត្ថិភាព ដោយប្រើប្រាស់ល្បឿនលឿន មិនប្រយត្ន័រេចង្កូតដួលបោកនឹងថ្នល់បង្កការភ្ញាក់ផ្អើល ដល់អ្នកភូមិចោមរោមមើល និងរាយការណ៍សមត្ថកិច្ចមូលដ្ឋានមកអន្តរាគមន៍ ជួយសង្គ្រោះដឹកមកកាន់មន្ទីរពេទ្យបង្អែកខេត្តស្វាយរៀង និងវាស់វែង និងអូសយកមករក្សាទុកនៅអធិការដ្ឋាននគរបាលក្រុងស្វាយរៀង ៕ យឹម សុថាន