សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដីស្នាក់ការប៉ុស្តិ៍នគរបាលរដ្ឋបាលទឹកថ្លា ខណ្ឌសែនសុខមានតម្លៃប្រមាណជិត២លានដុល្លារ ត្រូវបានគេរត់ការលក់បាត់ទៅហើយក្រោមរូបភាពដោះដូរ «យកឆ្នាំមាសដូរយកឆ្នាំងដី» ហើយសល់លុយចែកគ្នា ហើយ គ្រោង នឹងដេញមន្រ្តីនគរបាលចេញពីទីតាំងនោះទៅនៅទីតាំងថ្មី ដែលបានធ្វើរួចរាល់ហើយនោះ ។ មិនថា តែនគរបាលនោះទេ សូម្បីតែតែខ្មោច ជីដូនជីតាម្ចាស់ដីចាស់ ដែលកប់នៅក្នុងបរិវេណដីស្នាក់ការប៉ុស្តិ៍ នោះ ក៏អ្នកទិញដីនោះបានគាស់កកាយនិងសូត្រមន្តបណ្តេញចេញហើយយកសពទៅដាក់ក្នុងដីសមាគមនៅក្នុងពោធិ៍សែនសែនរួចទៅហើយដែរ។
ដីស្នាក់ការនគរបាល នោះ ត្រូវបានគេដឹងថា ក្បាលមានទំហំប្រមាណ២៥ម៉ែត្រ គុណ៣០ម៉ែត្រ ស្ថិតនៅតាមផ្លូវ ភ្នំពេញហាណូយ ខាងជើង ស្ពានអាកាសផ្សារដីហុយ ប្រមាណជាង២០០ម៉ែត្រ ។ ដីនេះ ត្រូវគេដឹងថា ជាដីត្រូវប៉ាន់នៅផ្លូវធំ មានតម្លៃ ប្រមាណជិត២លាន់ដុល្លារ ដែល ក្រុមហ៊ុន និងអ្នកមានទ្រព្យស្តុកស្តម្ភបានព្យាយាមរកខ្សែពួររត់ការលេបត្របាក់យកជាយូរមកហើយ តែមិនបានសម្រេច តែនេះ ប្រហែលជាមានខ្នងក្រាស់ៗហើយមើលទៅ ។
ការលក់ស្នាក់ការប៉ុស្តិ៍នគរបាលរដ្ឋបាលទឹកថ្លានេះ ធ្វើឲ្យមន្រ្តីនគរបាលប៉ុស្តិ៍ ក៏មានប្រតិកម្មផងដែរតែហាក់មិនហ៊ានចេញស្តី ព្រោះបើមិនមានភ្លើងខៀវពីមេៗឬថ្នាក់ក្រសួងនោះទេប្រហែលជាមិនអាចទៅរួចនោះទេ។
តាមនគរបាលម្នាក់បានលួចបង្ហើបឲ្យដឹងថា ស្នាក់ការប៉ុស្តិ៍ទឹកថ្លានេះ ត្រូវបានគេចរចារគ្នាត្រូវរួចហើយ ដោយខាងក្រុមហ៊ុន ក៏បានទំលាក់លុយ ទិញដីថ្មី ទំហំប្រមាណ១០ម៉ែត្រគុណ២០ម៉ែត្រ ក្នុងតម្លៃប្រមាណជា១០ម៉ឺនដុល្លារនៅក្រលៀតផ្លូវទល់មួយកន្លែងស្ថិតផ្ទះលេខ៣៣៨ផ្លូវលំភូមិចុងថ្នល់ខាលិច ហើយ បានធ្វើអគារស្នាក់ការថ្មី រួចរាល់ហើយ ។ចំណែក ផ្នូរខ្មោច នៅក្នុងប៉ុស្តិ៍ ទឹកថ្លាក៏ត្រូវបានកកាយយកចេញអស់ហើយដែរ ។ ទោះបីជាយ៉ាងណា គេពុំដឹងថា អ្នកដែលមានសំណាងឈ្មោះអ្វីនោះទេ ។
តាមព័ត៌មានបានឲ្យដឹងទៀតថា ដីប៉ុស្តិ៍ចាស់មានតម្លៃប្រមាណជិត២លានដុល្លារ តែទិញដីថ្មីធ្វើស្នាក់ការអស់ប្រមាណជិត២០ម៉ឺនដុល្លារ នៅសល់អាចធ្លាក់ទៅលើបុគ្គល តែរហូតមកដល់ពេលនោះ មន្រ្តីនគរបាល នៅប៉ុស្តិ៍ទឹកថ្លាមិនទាន់បានចំណែកនៅឡើយនោះទេ ។ ការដោះដូរស្នាក់ការ នេះត្រូវបានគេអះអាងថា ថ្នាក់លើរត់ការលក់ចែកគ្នា ក្រោមរូបភាពដោះដូរឆ្នាំងមាសដូរយកឆ្នាំដី។
តាម មន្រ្តីសង្កាត់ទឹកថ្លា បានឲ្យដឹងថា ដីស្នាក់ប៉ុស្តិ៍នគរបាលរដ្ឋបាលទឹកថា ដើមឡើយ ជាដីស្នាក់ការភូមិ ទឹកថ្លា ។នៅកំឡុងឆ្នាំ ១៩៨០ជាងលោកប៊ី សំហេង ដែលជាអតីតមេប៉ុស្តិ៍ទឹកថ្លា គាត់ក៏បានសុំទៅស្នាក់នៅបណ្តោះអាសន្នក្រោយមកអតីតមេប៉ុស្តិ៍ក៏បានធ្វើបញ្ជីទៅក្រសួងដាក់ដីនោះជាទ្រព្យសម្បត្តិក្រសួង ។ កាលនោះ លោកណុប ណន អតីតមេភូមិ ក៏បានតវ៉ា ទាមទារមកវិញបានមួយចំណែកទំហំក្បាល៥ម៉ែត្រ តែគាត់បានស្លាប់ទៅដីនោះក៏ធ្លាក់ទៅជាដីរបស់ប៉ុស្តិ៍ ទឹកថ្លារហូតមក តែពេលនេះត្រូវបានគេរត់ការលក់បាត់ហើយ និងគ្រោងដេញមន្រ្តីនគរបាលប៉ុស្តិ៍ ទៅនៅទីតាំងថ្មីដែលធ្វើរួចហើយ ។
លោកវរះសេនីយ៍ឯក ហួរ ម៉េង វ៉ាងអធិការនគរបាលខណ្ឌសែនសុខ បានឲ្យដឹងថា ការដោះដូរ ស្នាក់ការប៉ុស្តិ៍នគរបាលរដ្ឋបាលទឹកថ្លានេះ គឺមានលិខិតពីក្រសួង ហើយលោកពុំបានដឹងថា ថ្នាក់លើ បានឲ្យនគរបាលប៉ុស្តិ៍ ទៅនៅស្នាក់ការថ្មីនៅពេលណានោះទេ ។
លោក អធិការក៏បានបញ្ជាក់ថា មិនមែនលក់ទេ គីដោះដូរហើយ ទីតាំងថ្មីជាទីតាំងគំរូរសម្រាប់ប៉ុស្តិ៍ផ្សេងៗទៀតផងដែរ ។ ទោះបីជាយ៉ាងណា គេរិះគន់ថា នាំគ្នា រត់ការលក់ដីមាស ដីពេជចែកគ្នា បែជាទីទៅដីថោកផ្លូវទល់កៀនកោះប្រជាពលរដ្ឋរកមិនឃើញ ហើយ ប្រើពាក្យដោះដូរ ដើម្បីយកលាភសក្ការ ហាហា? ៕ តុងសីហា
