សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចតេជោហ៊ុន សែន នាយករដ្ឋមន្ត្រីនៃកម្ពុជាបានថ្លែងថា ទស្សនកិច្ចផ្លូវរដ្ឋរបស់ លោក មូន ចេអ៊ិន (Moon Jae-in) ប្រធានាធិបតីកូរ៉េខាងត្បូង នៅកម្ពុជានាពេលនេះ គឺបានលើកកម្ពស់នូវចំណងមិត្តភាព និងកិច្ចសហប្រតិបត្តិការគ្រប់ជ្រុងជ្រោយ និងកាន់តែទូលំទូលាយរវាងប្រទេសទាំងពីរ ។
សម្តេចបានបង្ហោះនៅលើបណ្តាញសង្គមមុននេះបន្តិចថា ៖
«ទស្សនកិច្ចផ្លូវរដ្ឋរបស់ លោក មូន ចេអ៊ិន (Moon Jae-in) ប្រធានាធិបតីកូរ៉េខាងត្បូង នៅកម្ពុជានាពេលនេះ គឺបានលើកកម្ពស់នូវចំណងមិត្តភាព និងកិច្ចសហប្រតិបត្តិការគ្រប់ជ្រុងជ្រោយ និងកាន់តែទូលំទូលាយរវាងប្រទេសទាំងពីរ។ វេទិកាធុរកិច្ចកម្ពុជា និង សាធារណរដ្ឋកូរ៉េ គឺបានផ្តល់នូវទំនុកចិត្ត និងភាពកក់ក្តៅកាន់តែរឹងមាំដល់ទេសចរ និងវិនិយោគគិនកូរ៉េ រហូតដល់យើងសម្រេចបាននូវការចុះហត្ថលេខាឯកសារអនុស្សារណៈ និងកិច្ចព្រមព្រៀងសំខាន់ៗចំនួន៥ ទៀតផង។
កម្ពុជាអរគុណរដ្ឋាភិបាលកូរ៉េខាងត្បូង ដែលបានផ្តល់នូវឥណទានសម្បទាន ៧០០ លានដុល្លារ សម្រាប់យកមកអភិវឌ្ឍន៍ប្រទេសកម្ពុជាអោយកាន់តែរីកចម្រើន (ឆ្នាំ ២០១៩-២០២៣) ។
សូមជូនពរលោកប្រធានាធិបតី និងលោកជំទាវ បានសប្បាយរីករាយនៅក្នុងដំណើរទស្សនៈកិច្ចទៅកាន់ទីក្រុងសៀមរាបអង្គរថ្ងៃនេះ និងសូមជូនពរបងប្អូនជនរួមជាតិជួបតែសេចក្តីសុខគ្រប់ទីកន្លែង» ៕
