សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ម៉ូតូស៊ុយហ្ស៊ូគីស្មាស់មួយគ្រឿងបុកម៉ូតូសង់កូរ៉េពេញមួយទំហឹង បណ្ដាលឲ្យបុរសជាអ្នកបើកបរម៉ូតូសង់កូរ៉េរងរបួសធ្ងន់ និងដាច់ខ្យល់ស្លាប់ ខណៈបញ្ជូនដល់មន្ទីរពេទ្យ រីអ្នកបើកបរម៉ូតូស្មាស់រងរបួសធ្ងន់ ។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង២៣ និង១៥នាទី ថ្ងៃទី១៨ ខែមិនា ឆ្នាំ២០១៩ ស្ថិតក្នុងភូមិភ្នំ ឃុំ ផ្សារដែក ស្រុកពញាឮ ខេត្តកណ្តាល ។
មន្រ្ដីនគរបាលចរាចរណ៍ស្រុកពញាឮបានឲ្យដឹងថា ជនរងគ្រោះស្លាប់បាត់បង់ជីវិតឈ្មោះ សុង ភាជ ភេទប្រុស អាយុ៤២ឆ្នាំ មានទីលំនៅភូមិម្លូម៉ឺន ឃុំផ្សារដែក ស្រុកពញាឮ ខេត្តកណ្តាល បើកបរម៉ូតូម៉ាកសង់កូរ៉េ ធុនសេ១០០ ពណ៌ក្រហម គ្មានស្លាកលេខ រីឯជនរងគ្រើរងរបួសធ្ងន់ឈ្មោះ វ៉ាត ថៃ ភេទប្រុស អាយុ៣៣ឆ្នាំ មានទីលំនៅភូមិផ្សារដែកក្រោម ឃុំផ្សារដែក ស្រុកពញាឮ បើកបរម៉ូតូម៉ាកស៊ុយហ្ស៊ូគីស្មាស់ ពណ៌ខ្មៅ ពាក់ស្លាកលេខ ភ្នំពេញ1AV-7461 ។
ប្រភពដដែលបន្ដថា នៅមុនពេលកើតហេតុ សាក្សីបានឃើញជនរងគ្រោះជាអ្នកបើកបរម៉ូតូស្មាស់ ធ្វើដំណើរតាមបណ្ដោយផ្លូវ ក្នុងទិសដៅពីត្បូងទៅជើង លុះបើកមកដល់ចំណុចកើតហេតុ ក៏មានម៉ូតូសង់កូរ៉េមួយគ្រឿងបើកចេញពីផ្ទះ ភ្លាមនោះអ្នកបើកបរម៉ូតូស្មាស់ក៏ឈប់មិនទាន់ បានបុកម៉ូតូសង់កូរ៉េពេញមួយទំហឹង បណ្ដាលឲ្យជនរងគ្រោះជាអ្នកបើកបរម៉ូតូទាំងសងខាង ទទួលរងរបួសធ្ងន់ ។
ក្រោយពីមានហេតុការណ៍កើតឡើង ជនរងគ្រោះទាំង២នាក់ត្រូវបានរថយន្ដសាមុយដឹកបញ្ជូនទៅសង្រ្គោះនៅមន្ទីរពេទ្យរាជធានីភ្នំពេញ តែជាអ្នកកុសលជនរងគ្រោះជាអ្នកបើកបរម៉ូតូសង់កូរ៉េបានដាច់ខ្យល់ស្លាប់ ខណះបញ្ជូនដល់មន្ទីរពេទ្យ ។ ដោយឡែកមធ្យោបាយពាក់ព័ន្ធត្រូវបានមន្រ្ដីនគរបាលចរាចរណ៍ស្រុក ចុះធ្វើការពិនិត្យវាស់វែង រួចកសាងឯកសារដកហូតយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធី ៕ស្អាងជ័យ
