សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្ត ម៉ាស្តាលឿន រេចង្កូតចូលផ្លូវខាងឆ្វេង ហើយបានជ្រុលទៅបុក និងរថយន្ត សណ្តោងដឹកទំនិញមួយគ្រឿងទៀត បណ្តាលឲ្យ រងការខូចខាតរថយន្តទាំងសងខាង ។
ហេតុការណ៍នេះ បានកើតឡើងនៅវេលាម៉ោងរំលងអធ្រាត្រឈានចូល ថ្ងៃទី២០ ខែមីនា ឆ្នាំ២០១៩ ចំណុចការដ្ឋានចិន ផ្លូវ៦០ម៉ែត្រ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ ។ រថយន្តបង្ក ម៉ាក ម៉ាស្តា ពណ៌ត្រេអ៊ី ពាក់ស្លាកលេខ ខេមរភូមិន្ទ 02 .2.9863 បើកបរដោយបុរសម្នាក់ស្រវឹងជោក ។ ចំណែករថយន្តសណ្តោងដឹកទំនិញមួយគ្រឿង ម៉ាក់ ហ៊ីយ៉ានដាយ ពណ៌ស ពាក់ស្លាកលេខ ស្វាយរៀង 3B 0567 ។
តាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តហ៊ីយ៉ានដាយ បានធ្វើដំណើរតាម ៦០ម៉ែត្រ ក្នុងទិសដៅ ពីជើងទៅត្បូង ខណះមកដល់ចំនុចកើតហេតុ ក៏ស្រាប់តែ មានបុរសម្នាក់ ស្រវឹងបើករថយន្តធ្វើដំណើរតាមផ្លូវ ៦០ម៉ែត្រ ក្នុងទិសដៅ បញ្ច្រាស់គ្នា ពីត្បូងទៅជើង ក្នុងល្បឿនលឿន ក៏បានរេចង្កូតទៅគន្លងផ្លូវម្ខាងទៀតមកខាងឆ្វេងដៃហើយជ្រុលទៅបុក និងរថយន្ត ហ៊ីយ៉ានដាយ ដឹកទំនិញ ចំពីមុខពេញទំហឹង បណ្តាលឲ្យ រថយន្ត ម៉ាស្តា ខ្ទេចមួយចំហៀងខាងឆ្វេង បត់ក្បាលត្រលប់ក្រោយ តែសំណាងល្អមិនគ្រោះថ្នាក់ដល់អ្នកបើកបង្ករ ។
ដោយឡែករថយន្ត ដឹកទំនិញវិញ រងការខូចខាត ខ្ទេចផ្នែកខាងមុខ ចំហៀងខាងឆ្វេង ព្រមទាំងបែកកង់មុខ តែសំណាងល្អមិនមានគ្រោះថ្នាក់ដល់មនុស្សនោះទេដូចគ្នា ហើយភ្លាមៗនោះដែរ អ្នកបើក រថយន្តសណ្តោង បានរត់គេចខ្លួន ដោយបន្សល់ទុករថយន្តនៅកន្លែងកើតហេតុ ។
ក្រោយពេលកើតហេតុ រថយន្តទាំង២គ្រឿង ត្រូវបានសមត្ថកិច្ចជំនាញចុះទៅវាស់វែងយកទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញ រងចាំដោះស្រាយពេលក្រោយ ៕ សុខាសែនជ័យ
