សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីចំណាស់ម្នាក់ រត់ទៅប្តឹងនគរបាល ខណ្ឌពោធិសែនជ័យ ថា ចោរលួចម៉ូតូ ខណៈដែលម៉ូតូមានភ្ជាប់ប្រព័ន្ធ GPS ផង កម្លាំងសមត្ថកិច្ច ឮថាចោរលួចម៉ូតូ ស្រែកតាមវិទ្យុទាក់ទង ផ្អើលកម្លាំងសមត្ថកិច្ចអស់មួយចំហៀងក្រុងភ្នំពេញ មានខណ្ឌពោធិសែនជ័យ ដង្កោ អង្គស្នួល កណ្តាលស្ទឹង ប្រុងជើងការ ចាំស្ទាក់ បង្ក្រាបតែពេលឃាត់បាន គឺប្តីក្មេងរបស់គាត់យកម៉ូតូទៅឌុបស្រីថ្មីសោះ ។
ហេតុការណ៍នេះបង្កឲ្យភ្ញាក់ផ្អើល កាលពីវេលាម៉ោង៤និង១៥នាទីរសៀល ថ្ងៃទី១៩ ខែមីនា ឆ្នាំ២០១៩ ។
សម្រែក តាមបណ្តឹង របស់ភាគីស្រីចាស់ ជាប្រពន្ធ ចង់មិនចង់ ប៉ះចំដៃប្រជាពលរដ្ឋ ច្បាស់ហើយថាទក់សាច់ នេះប៉ះចំកម្លាំងប៉ូលិស ចាប់ហើយ សួរសិន ទើបដឹងរឿង កុំអីមិនដឹងថា ទ្រមខ្លួនយ៉ាងណានោះទេ រឿងចោរលួចម៉ូតូនេះ ។
តាមសមត្ថកិច្ច បានឲ្យដឹងថា កាលពីវេលាម៉ោងខាងលើ ស្រ្តីចំណាស់ម្នាក់ រាយការណ៍តាមប្រព័ន្ធវិទ្យុ ក្នុងស្រុក ស្នើសុំឲ្យកម្លាំងប៉ូលិស ក្នុងរាជធានីភ្នំពេញ ជួយអន្តរាគមន៍ ឃាត់ចាប់ម៉ូតូ មួយគ្រឿងម៉ាក ហុងដា សេ១២៥ ស៊េរី២០១៩ ពណ៌ខ្មៅ 1Hk-4937 ជិះសំដៅចូលរាជធានីភ្នំពេញ ហើយគ្រាន់តែបានទទួលព័ត៌មានខាងលើនេះភ្លាម កម្លាំងនគរបាលខណ្ឌពោធិ៍សែនជ័យ ប្រទះជួប ឃើញម៉ូតូខាងលើ ត្រូវបានប្រុសក្មេងម្នាក់ជិះ ឆ្លងកាត់រត់ចូលទឹកដី ភូមិសាស្រ្តខណ្ឌដង្កោ ស្រែកតាមប្រព័ន្ធវិទ្យុទាក់ទង ទូទាំងក្រុងភ្នំពេញ ខេត្តកណ្តាល ជាប់ព្រំប្រទល់គ្នា ចាំឃ្លាំមើល ដោយម៉ូតូមានភ្ជាប់GPSផង រត់រហូតដល់ ផ្លូវ៥០ម៉ែត្រ ភូមិព្រែកថ្លឹង សង្កាត់ដង្កោ ត្រូវបានកម្លាំងនគរបាលខណ្ឌ ដង្កោ លឿនដូចចិត្ត បង្ក្រាបចាប់ឃាត់បានទាំង ម៉ូតូ ទាំងមនុស្ស លុះដើមបណ្តឹង អ្នកស្រែក ទៅដល់ ទើបដឹងថា រឿងស្នេហាទៅវិញ ។
តាមប្រភព ពីស្រ្តីចំណាស់ ជាប្រពន្ធ ប្រាប់ដូចលាក់លៀម ថា ក្រោយពីប្តីចាស់ស្លាប់ទៅ គាត់បានយក ប្តីក្មេង ម្នាក់ខាងលើ មកស្អំបេះដូងបន្ត តែមិនបានដូចចិត្ត ប្តីក្មេង ដឹងតែចាយលុយ ជិតមួយឆ្នាំហើយ ចុងក្រោយ លួចមានស្រីថ្មី ចង់សុីឡាក់ ស្រីចាស់ ដឹងរឿង ម៉ូតូទើបទិញឲ្យជិះថ្មីសន្លាង បែរជាយកទៅឌុបតែស្រីក្មេង ទុកស្រីចាស់ ធីបចោលនៅផ្ទះ ខឹងពេក នៅវេលាម៉ោងខាងលើ បន្ទាប់ពីលោកប្តីក្មេងយកម៉ូតូជិះគេចចេញមក ស្រែកប្តឹងប៉ូលិសឲ្យជួយចាប់ឃាត់តែម្តង ។
រឿងរ៉ាវ ខាងលើ ក្រោយពីកម្លាំងសមត្ថកិច្ចខណ្ឌ ដង្កោចាប់ឃាត់បានទាំងម៉ូតូ ទាំងមនុស្ស ហើយមកបំភ្លឺ ដូចលេងសើច ប៉ូលិសមួយចំហៀងក្រុងភ្នំពេញ ទាំងស្រុកក្នុងខេត្តកណ្តាលផង ជនខាងលើត្រូវបានសមត្ថកិច្ច ឃាត់សិនយកទៅសាកសួរនៅប៉ុស្តិ៍ចោមចៅ៣ ខណ្ឌពោធិសែនជ័យ រង់ចាំបាត់ហត់ទើបសាកសួរបន្តទៀត ៕ សុខាសែនជ័យ
