សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រោងភាពយន្តលេជេន ដែលគេស្គាល់ថា ជារោងភាពយន្តទំនើបដំបូងគេនៅកម្ពុជានោះបានប្រកាសអំពីគម្រោងលេចវត្តមានថ្មីបន្តទៀតក្នុងអាគារ Price International Plaza ដែលជាអាគារពាណិជ្ជកម្មទំនើបសម្បើមមួយ ដែលនឹងលេចរូបរាងនៅរាជធានីភ្នំពេញក្នុងពេលខាងមុខ ។ ការប្រកាស ត្រូវបានធ្វើឡើងនៅក្នុងពិធីសន្និសិទកាសែតនិង ចុះហត្ថលេខានៃហាងសំខាន់ៗរបស់ព្រីនអ៊ិនធើណាសិនណល ផ្លាសា ដែលរៀបចំឡើងនាព្រឹកថ្ងៃទី២២ ខែមីនាឆ្នាំ២០១៩នេះ នៅក្នុងអាគារPrince Plaza ។
វត្តមានរោងភាពយន្តជាច្រើននេះ នឹងក្លាយជាសក្កដានុពលយ៉ាងសំខាន់ និងចូលរួមចំណែកពង្រីកទីផ្សារភាពយន្តក្នុងស្រុកផងដែរ ។ គិតត្រឹមដើមឆ្នាំ ២០១៩ រោងភាពយន្តលេជេន មានសរុប ៦ទីតាំងដូចជា លេជេនស៊ីធីម៉ល លេជេនធីឃេ លេជេនមានជ័យ លេជេនព្រីមមៀម លេជេនអេដិន និង លេជេនហេរីថេក វ៉ក (សៀមរាប) ដែលទើបតែសម្ពោធដាក់ដំណើរការជាផ្លូវការនៅដើមខែកុម្ភៈនេះ ។ ការប្រកាសអំពីវត្តមានរបស់រោងភាពយន្តលេជេននេះបានធ្វើឲ្យមានការចាប់អារម្មណ៍យ៉ាងខ្លាំងពីសំណាក់អ្នក ដែលនិយមគាំទ្ររោងភាពយន្តលេជេន ដែលបានពង្រីកខ្លួនជាបន្តបន្ទាប់ ហើយឆាប់ៗនេះ រោងភាពយន្តលេជេន មីតថោន ដែលមានទីតាំងនៅតាមបណ្តោយផ្លូវ២០០៤ ជាទីតាំងថ្មីរបស់រោងភាពយន្តលេជេនរំពឹងថានឹងដាក់ឲ្យដំណើរការនៅពាក់កណ្តាលឆ្នាំ២០១៩នេះ ។ នេះបើតាមប្រសាសន៍លោក តែ សុង ដែលជានាយកប្រត្តិបតរបស់រោងភាពយន្តលេជេនបានបញ្ជាក់ ។
លោកថា រោងភាពយន្តលេជេននឹងមានទីតាំងសរុបរហូតទៅដល់១០ ទីតាំងនៅត្រឹមចុងឆ្នាំ២០១៩នេះ និង១១ទីតាំងក្នុងឆ្នាំ២០២០ដោយបូកបញ្ចូលគម្រោងអាគារព្រីនអ៊ិនធឺណាស៊ិណលផ្លាសា ។ ការប្រកាសបើកគម្រោងសាខាថ្មីៗរបស់រោងភាពលេជេន គឺជាកត្តាមិនអាចប្រកែកក្នុងការជម្រុញឲ្យមានភាពរីកចម្រើនរបស់វិស័យភាពយន្តក្នុងស្រុក ។ គួរបញ្ជាក់ថាគម្រោងអាគារព្រីនអ៊ិនធឺណាស៊ិណលផ្លាសាមានទីតាំងស្ថិតនៅតាមបណ្តោយផ្លូវសហព័ន្ធរិស្ស៊ី ការវិនិយោគនេះគឺជាគម្រោងមួយក្នុងចំណោមធំៗដទៃទៀតរបស់ក្រុមហ៊ុនអចលនទ្រព្យព្រីន ដែលជាក្រុមហ៊ុនអចលនទ្រព្យយក្សមកពីប្រទេសចិន ។ បើមិនមានការផ្លាស់ប្តូរទេ រោងភាពយន្តលេជេន ដែលមានទីតាំងនៅអាគារព្រីនអ៊ិនធើណាសិនណលផ្លាសា នឹងមានបើកដំណើរបម្រើអតិថិជនចាប់ពីដើមឆ្នាំ២០២០នេះតទៅ ។
គួរបញ្ជាក់ដែរថាក្រៅពីការចុះហត្ថលេខាជាមួយរោងភាពយន្តលេជេន ក្រុមហ៊ុនអចលនទ្រព្យព្រីនបានរៀបចំឲ្យមានការ ចុះហត្ថលេខានៃហាងសំខាន់ៗរបស់ ព្រីនអ៊ិនធើណាសិនណល ផ្លាសាផងដែរ ដែលកម្មវិធីនេះបានបង្ហាញឲ្យសារធារណជនជាពិសេសវិនិយោគិនដទៃទៀតឲ្យឃើញពីសក្តានុពលរបស់អាគារព្រីនអ៊ិនធឺណាស៊ិណលផ្លាសា ដែលមានលទ្ធភាពក្នុងការស្រូបទាញយកក្រុមហ៊ុនស្លាយីហោជាតិនិងអន្តរជាតិល្បីនិងធំៗ ដូចជា រោងភាពយន្តលេជេន, KFC, Domino’s, LOTTERIA, TOUR les jours, Burger Kings, Pizza Company, T&C, G2000, Brown Coffee, Croc PENSHOPPE, Swatch, ផ្សារទំនើបព្រីន, ភោជនីយដ្ឋាន ព្រីនស៊ុប, ហាងលក់សម្លៀកបំពាក់ ជាដើម៕ វឌ្ឍនា
