រថយន្ដឡិចស៊ីសបើកល្បឿនលឿនបុកម៉ូតូមួយគ្រឿងច្រាស់ទិសគ្នា បណ្ដាលឲ្យយុវជនម្នាក់ស្លាប់

ខេត្តកណ្ដាល៖ យុវជនម្នាក់ស្លាប់ភ្លាមៗនៅកន្លែងកើតហេតុ ខណៈកំពុងជិះម៉ូតូត្រូវរថយន្ដឡិចស៊ីមួយគ្រឿងបើកបរដោយល្បឿនលឿន បានបុកម៉ូតូយុវជនរងគ្រោះចំពីមុខពេញមួយទំហឹង នៅវេលាម៉ោង១៩ និង២៥នាទី ថ្ងៃទី២៥ ខែមីនា ឆ្នាំ២០១៩ លើចំណុចផ្លូវលេខ១២១០ ស្ថិតក្នុងភូមិដំរីឆ្លង ឃុំស្អាងភ្នំ ស្រុកស្អាង ខេត្តកណ្ដាល ។

មន្រ្ដីនគរបាលចរាចរណ៍ស្រុកស្អាងបានឲ្យដឹងថា រថយន្ដបង្កម៉ាក ឡិចស៊ីស៣៥០ ពណ៌ត្រីអ៊ី ពាក់ស្លាកលេខ ខេមរភូមិន្ទ02 2-2416 បើកបរដោយឈ្មោះ ឌិន ស៊ីដេត ភេទប្រុស អាយុ៣៤ឆ្នាំ មុខរបរយោធា មានទីលំនៅភូមិត្នោតមួយដើម ឃុំបែ្កចាន ស្រុកអង្គស្នួ ខេត្តកណ្ដាល ។ ចំណែកយុវជនរងគ្រោះស្លាប់បាត់បង់ជីវិតឈ្មោះ ម៉ុន វីរៈ ភេទប្រុស អាយុ១៨ឆ្នាំ មុខរបរជាងជួលជុលរថយន្ដ មានទីលំនៅព្រែកខ្មែរ ឃុំស្អាងភ្នំ ស្រុកស្អាង ខេត្ដកណ្ដាល បើកបរម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ កណ្ដាល1P-8626 ។

ប្រភពដដែលបន្ដថា នៅមុនពេលកើតហេតុ សាក្សីបានឃើញរថយន្ដបង្កខាងលើ បានធ្វើដំណើរតាមបណ្ដោយផ្លូវលេខ១២១០ ក្នុងទិសដៅពីលិចទៅកើត លុះបើកមកដល់ចំណុចកើតហេតុ រថយន្ដខាងលើ ក៏បានបុកម៉ូតូជនរងគ្រោះចំពីមុខពេញមួយទំហឹង បណ្ដាលឲ្យជនរងគ្រោះដួលបោកទៅនឹងផ្លូវស្លាប់ភ្លាមៗនៅកន្លែងកើតហេតុ ។ ក្រោយពីមានហេតុការណ៍កើតឡើង នគរបាលជំនាញចរាចរណ៍ស្រុកបានចុះមកកន្លែងកើតហេតុធ្វើការពិនិត្យវាស់វែង រួចឃាត់ខ្លួនអ្នកបើកបររថយន្ដនិងមធ្យោបាយពាក់ព័ន្ធយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមនីតិវិធីច្បាប់ រីឯសាកសពយុវជនរងគ្រោះ ត្រូវបាននគរបាលជំនាញប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ។

តាមការសន្និដ្ឋានរបស់សមត្ថកិច្ចបញ្ជាក់ថា ករណីនេះបង្កឡើងដោយអ្នកបើកបររថយន្ត បើកបរធ្វេសប្រហែស ខ្ជីខ្ជារ ខ្វះការប្រុងប្រយ័ត្ន ទើបបង្កអោយមានគ្រោះថ្នាក់ចរាចរណ៍កើតឡើង ។

គួរបញ្ជាក់ផងដែរថា ក្រោយពីការឃាត់ខ្លួនបុរសជាអ្នកបើកបររថយន្ដ សមត្ថកិច្ច បានរកឃើញអាវុធខ្លីចំនួន១ដើម នៅជាប់ខ្លួន ម៉ាកNP34 លេខBO-18287 និងបង់ចំនួន១មានគ្រាប់ចំនួន២គ្រាប់ ៕ ស្អាងជ័យ