សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បានឱកាសចេញទៅច្រៀងរាំរកលុយលើទឹកដី នៃសហរដ្ឋអាមេរិកជាលើកដំបូង តារាចម្រៀងប្រចាំផលិតកម្មថោន កញ្ញា ស៊ូ ស៊ីរីកា បានថ្លែងទៅកាន់អ្នករិះគន់មួយចំនួន ដែលពេបជ្រាយ និងរូបសម្បត្តិរបស់នាងថា នាងលក់តែសំឡេង មិនលក់ខ្លួនទេ ។ ការថ្លែងបែបនេះ ក្រោយពីទស្សនិកជនមួយចំនួនតូចបានបន្ទោសបង្អាប់ថា តារាស្រីរូបនេះមានរូបរាងមិនស្រស់សោភានោះ ។
ម្ចាស់បទ ទាសករស្នេហ៍ ស៊ូ ស៊ីរីកាបានបញ្ចេញសារតបតអ្នករិះគន់ក្រោយពីសម្តី និងសាររិះគន់រូបសម្បត្តិរបស់ នាង និងអ្នកចម្រៀងមួយចំនួនទៀត បានបន្តហើរមកប៉ះត្រចៀក និងឃើញផ្ទាល់ភ្នែក ។ ការបញ្ចេញសារនេះត្រូវបាននាងថ្លែងសារពីសហរដ្ឋអាមេរិក ដែលជាទីកន្លែងដែលនាងបានចេញទៅសម្តែងជាលើកដំបូង ។
តារាស្រីរូបនេះបញ្ជាក់ថា “មុនពេលសម្រេចចិត្តចូលប្រឡូកក្នុងអាជីពសិល្បៈគឺនាងបានត្រៀមចិត្តរួចមកហើយថានឹងត្រូវប្រឈមមុនទៅនឹងការរិះគន់ ។ នាងដឹងដែរថា នាងមានខ្លួនតែមួយក៏មិនអាចទៅផ្គាប់ចិត្តមនុស្សរាប់លាននាក់បានអស់នោះដែរ ហើយក៏មិនដឹងដែរថាអ្នកខ្លះស្រលាញ់ចូលចិត្ត និងស្អប់មកលើនាង ។ អ្វីដែលនាងអរគុណគឺការស្រលាញ់ចូលចិត្តពីសំណាក់ទស្សនិកជន និងអ្នកគាំទ្រមកលើរូបនាង ប៉ុន្តែនាងសុំនិយាយបន្តិចជុំវិញការរិះគន់មកលើរូបសម្បត្តិថាអ្នកនេះមិនស្អាតអ្នកនោះមិនស្អាត ប៉ុន្តែនាងចង់បញ្ជាក់ថា អ្នកណាក៏ចង់កើតមកមានរូបសម្បត្តិស្រស់ស្អាតដែរ ។
ទោះជាយ៉ាងណានាងបញ្ជាក់ថាពិតជាពេញចិត្តសម្រាប់សម្រស់ដែលនាងទទួលបាន និងពេញចិត្តនូវអ្វីដែលខ្លួននាងមាន ហើយអ្វីដែលនាងកាន់តែពេញចិត្តនោះគឺសមត្ថភាពច្រៀងជាចម្បង ដែលរូបសម្បត្តិគ្រាន់តែជារឿងបន្ទាប់បន្សំប៉ុណ្ណោះ ព្រោះនាងលក់សំឡេង មិនមែនលក់ខ្លួនទេ ។
នាងក៏បានអរគុណដល់ព្រហ្មលិខិតដែលកំណត់ឲ្យម្តាយរបស់នាងបង្កើតរូបនាងមកឲ្យមាត់ចេះប្រើក្នុងការនិយាយស្តី និងសំឡេងដែលអាចច្រៀងបាន តិចតួច និងចេះប្រើភាសាមនុស្ស មិនមែនជាភាសាសត្វធាតុ ។ មុននឹងសម្រេចចិត្តរៀបរាប់យ៉ាងច្រើននៅលើបណ្ដាញសង្គម គេដឹងយ៉ាងជាក់ច្បាស់រួចទៅហើយថា កន្លងមក កញ្ញា ស៊ូ ស៊ីរីកា ធ្លាប់រងនូវពាក្យរិះគន់លើស ញយដងពេកណាស់ទៅហើយ ពីបុគ្គលមួយក្ដាប់តូចដែលបញ្ចេញការរិះគន់ហួសព្រំដែនការស្ថាបនា ទើបនាងសម្រេចចិត្តទម្លាយអារម្មណ៍ពិតចេញម្ដង ដើម្បីឲ្យបានធូរទ្រូងមួយគ្រា ។
គួរបញ្ជាក់ដែរថា តារាចម្រៀង សំឡេងធ្ងន់ស៊ូ ស៊ីរីកា បានចេញទៅច្រៀងលើកដំបូងលើទឹកដីសហរដ្ឋអាមេរិកកាលពីអំឡុង ខែកុម្ភៈ ឆ្នាំ២០១៩មកម្ល៉េះ ជាមួយតារាចម្រៀង លោក យឹង យន តាមរយៈការរៀបចំរបស់អង្គការ IKARE ។ នាងនឹងត្រូវចំណាយពេលច្រៀងរាំនៅទីនេះប្រមាណជារយៈពេល២ខែពោលគឺនាងនឹងវិលមកកម្ពុជាវិញ ក្រោយពីពិធីបុណ្យចូលឆ្នាំថ្មីប្រពៃណីជាតិចប់សប់គ្រប់ ។ រយៈពេលជាមួយខែនៅទីនោះនាងទទួលបានការគាំទ្រច្រើនពីទស្សនិកជនព្រោះតែតារាចម្រៀតរូបនេះ អាចច្រៀងបទចម្រៀងបានគ្រប់ទម្រង់ពិសេសបទចម្រៀងមរតកដើម និងចង្វាក់ប្រជាប្រិយខ្មែរ ៕ វឌ្ឍនា
