ពលរដ្នថា ស្ទឹងសៀមរាបប្រែពណ៌ខ្មៅ មានក្លិនស្អុយ ប្រហែលជាគ្មានអ្នកខ្វាយខ្វល់ទេ

ខេត្តសៀមរាប៖ ក្រោយពីមានការរិះគន់ពីពលរដ្នថា ទឹកស្ទឹងសៀមរាបដែលមានប្រភពហូរធ្លាក់ពីភ្នំគូលែន ធ្លាប់តែមានទឹកថ្លាល្អ តាំងតែពីមុន ធ្វើឲ្យពលរដ្នប្រើប្រាស់មិនដែលមានបញ្ហាទេ តែបច្ចុប្បន្ន ផ្ទុយស្រឡះពីមុន ដែលទឹកស្ទឹងសៀមរាប ក្លាយជាទឹកខ្មៅ មានក្លិនស្អុយ មិនអាចប្រើប្រាស់បាននោះទេ ។

បើតាមប្រភពពីពលរដ្ន ក៏ដូចជាមន្ត្រីរាជការបានឲ្យដឹងថា ក្នុងរយះពេលចុងក្រោយនេះ គ្មានការយកចិត្តទុកដាក់ពីអាជ្ញាធរ ក្រុង ឬមន្រ្ដីពាក់ព័ន្ធនោះទេ ទុកបណ្ដោយឲ្យតាមបណ្ដា ផ្សារ ផ្ទះសំណាក់ សណ្ឋាគារ និងភោជនីយដ្ឋាន មួយចំនួន ដាក់លូរបង្ហូរទឹកស្អុយចូលក្នុងស្ទឹង ទើបទឹកស្ទឹងនេះ ប្រែពណ៌ខ្មៅ និងមានក្លិនស្អុយបែបនេះ ។

លោក នួន ពុទ្ធារ៉ា អភិបាលក្រុងដែលទើបតែឡើងកាន់តំណែង ធ្លាប់បានប្រាប់ក្នុងកិច្ចសម្ភាសថា លោកបានចាត់ក្រុមការងារឲ្យពិនិត្យហើយ ដើម្បីធ្វើការជាមួយម្ចាស់ផ្សារ ឲ្យគាត់រៀបចំជាបឋមសិនចំពោះមុខ តែយើង ក៏កំពុងតែរង់ចាំគម្រោងធំរបស់ខេត្ត ដែលបានសិក្សារួចហើយ ដោយមាន ក្រុមជំនាញរបស់ អាដេ ជួយរៀបចំប្រព័ន្ធចម្រាញ់ដាក់តាមបណ្ដាយស្ទឹង ដើម្បីឲ្យទឹកស្ទឹងស្អាត ទៅថ្ងៃក្រោយ លែងមានទឹកកខ្វក់ ទឹកស្អុយទៀតហើយ ។

ពលរដ្នសំណូមពរសុំឲ្យអាជ្ញាធរខេត្តដោះស្រាយកុំទុកចោល ហើយកុំឲ្យគិតតែប្រយោជន៍បុគ្គល ត្រូវគិតពីប្រយោជន៍ សាធារណៈ និងគិតពីសុខភាពពលរដ្នទូទៅផង ៕ ប៊ុនរិទ្ធី