សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ កាលពី ចន្លោះម៉ោង១០ទៅម៉ោង១១ ថ្ងៃទី៤ ខែមេសា ឆ្នាំ២០១៩ មានករណីចងកធ្វើអត្តឃាតមួយកើតឡើងនៅចំណុចភូមិទំនប់អភិវឌ្ឍន៍ ឃុំអូរស្វាយ ស្រុកត្រពាំងប្រាសាទ ។
លោកឧត្ដមសេនីយ៍ត្រី ឡឹក សុខា ស្នងការរងនគរបាលខេត្តបានឲ្យដឹងថា ជនរងគ្រោះ ឈ្មោះថង ឡាថុលើម ហៅ សៀន ភេទប្រុស អាយុ៤៦ឆ្នាំ រស់នៅភូមិស្រែប្រីយ៍ ឃុំប្រាយផាត់ថាណា ស្រុកភូស៊ិញ ខេត្តស៊ីសាកេត ប្រទេសថៃ កាលពីថ្ងៃទី០៣ ខែមេសា ឆ្នាំ២០១៩ នាវេលាម៉ោង៦និង០០នាទីព្រលប់។ ជនរងគ្រោះ និងមិត្តភ័ក្ដិ ០១នាក់ទៀត ឈ្មោះ ប្រាក់ យ៉ាតប៊ុនថា បានចូលមកលេងមិត្តភ័ក្ដិ ឈ្មោះ ផាត់ ចំរើន ជនជាតិខ្មែរ នៅភូមិកើតហេតុខាងលើ ។
ក្នុងនោះដែរ ជនជាតិថៃទាំងពីរនាក់ បានចូលតាមច្រកអន្តរជាតិជាំ សាងុំា ដោយពុំមានលិខិតឆ្លងដែន ឬអត្តសញ្ញាណប័ណ្ណនោះទេ គឺសុំខាងទំនាក់ទំនងព្រំដែនចូលមកលេងមិត្តភ័ក្ដិ និងបានដេកស្នាក់នៅ បានមួយយប់ នៅថ្ងៃទី០៣ មេសា និងនាំគ្នាផឹកស្រា.ស អស់០២លីត្រ លុះព្រឹកថ្ងៃទី០៤ ខែមេសា វេលាម៉ោងប្រហែល០៨និង០០នាទី បាននាំគ្នាហូបបាយ និងបានផឹកស្រាបន្តទៀតអស់ជិត០១លីត្រ ហើយម្ចាស់ផ្ទះ ឈ្មោះ ផាត់ ចំរើន ក៏នាំមិត្តភ័ក្ដិឈ្មោះ ប្រាក់ យ៉ាត់ប៊ុនថា ទៅកន្លែងសិប្បកម្មដើម្បីយកឈើទៅធ្វើឈើច្រត់ ។ រីឯជនរងគ្រោះនៅនឹងផ្ទះជាមួយប្រពន្ធម្ចាស់ផ្ទះ ក្រោយពីបានហូបបាយរួច ស្ត្រីម្ចាស់ផ្ទះ បានទៅបោកខោអាវនៅពាងខាងក្រោយផ្ទះ ចំណែកជនរងគ្រោះដេកលើអង្រឹងមុខផ្ទះ ប្រមាណជាងមួយម៉ោងក្រោយមក ស្ត្រីម្ចាស់ផ្ទះដើរមករកជនរងគ្រោះ ខាងមុខផ្ទះមិនឃើញ ក៏ដើររកឃើញចង.ក ស្លាប់នៅនឹងក្រោលគោខាងមុខផ្ទះទៅវិញ ។
លោក ឡឹក សុខា បានបន្តថា បន្ទាប់ទទួលបានព័ត៌មាន កម្លាំងអធិការនគរបាលស្រុកបានហ៊ុមព័ទ្ធ ការពារកន្លែងកើតហេតុ រង់ចាំជំនាញខេត្តចុះមកពិនិត្យ ។ លុះនៅវេលាម៉ោង១៦និង០០នាទី ថ្ងៃ ខែឆ្នាំដដែល កម្លាំងជំនាញការិយាល័យបច្ចេកទេស និងផ្នែកពិនិត្យវិភាគស្រុកត្រពាំងប្រាសាទ រួមទាំងគ្រូពេទ្យ ដឹកនាំដោយ លោក ឡឹក សុខា បានធ្វើការពិនិត្យទៅលើសាកសព ឃើញថា ស្លៀកខោកីឡាជើងខ្លី ពណ៌ខៀវឆ្នូតក្រហម ពាក់អាវដៃខ្លីពណ៌ប្រផេះនិងអាវយឺតក្នុងវៀលក្លៀក ។ រីឯផ្នែកក្បាលពុំមានស្លាកស្នាមអ្វីគួរឲ្យកត់សំគាល់នោះទេ ហើយមានស្នាមជាំ ដោយខ្សែត្រង់ ក រាងជាអក្សរ Uព័ទ្ធពីមុខមកក្រោយ និងអណ្ដាតលៀនចេញផុតបបូរមាត់០២ cm ។ ផ្នែកដងខ្លួនមុខ,ខ្នងរហូតដល់ចុងជើងពុំមានស្លាកស្នាមអ្វីគួរឲ្យសង្ស័យនោះទេ ។ ចំណែកនៅចុងលិង្គមានលេចចេញទឹកកាម ។
សមត្ថកិច្ចបានប្រមូលព័ត៌មានតាមការបំភ្លឺរបស់ឪពុក និងញាតិជិតខាងដែលមកពីប្រទេសថៃ បានឲ្យដឹងថា ជនរងគ្រោះជាកូនរបស់គាត់ផឹកស្រាជាប្រចាំច្រើនឆ្នាំ មកហើយ នៅពេលផឹកតែងតែវង្វេងវង្វាន់ មានពេលខ្លះរត់ស្រាតក្នុងភូមិ ក៏មាន (សរសៃប្រសាទ) ។
តាមការសន្និដ្ឋាន របស់សមត្ថកិច្ច ពិតជាស្លាប់ដោយចង.ក សម្លាប់ខ្លួនពិតប្រាកដមែន ។ ដោយមូលហេតុ មានបញ្ហាសរសៃប្រសាទ ។ ក្រោយពីសមត្ថកិច្ចពិនិត្យចប់សព្វគ្រប់ ក៏បានប្រគល់សាកសពជូនក្រុមគ្រួសារយកទៅកាន់ប្រទេសថៃវិញ៕ ប៉ែន នួន
