សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ បានទុកម៉ូតូ រួមទាំងសោ ចតចោលហើយបានដើរទៅរកចាប់មាន់ ដើម្បីយកទៅធ្វើម្ហូប ស្រាប់តែចេញមកវិញ បាត់ម៉ូតូ មិនដឹងទៅណា ។
ហេតុការណ៍នេះ បានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី៥ ខែមេសា ឆ្នាំ២០១៩ នៅក្រោយសាលាជម្ពូវ័ន ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះឈ្មោះ ហ៊ាន់ ហេង ភេទប្រុស អាយុ៤៧ឆ្នាំ មុខរបរកសិករ ស្នាក់នៅក្រោយវត្តជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើត នៅភូមិកំពង់ប្រាសាទ ឃុំកំពង់ប្រាសាទ ស្រុកពាមជ័រ ខេត្តព្រៃវែង ។ ម៉ូតូដែលបាត់ម៉ាកហុងដាឌ្រីម សង់ស៊េរីឆ្នាំ ២០១៦ ពណ៌ខ្មៅ ពាក់ស្លាកលេខ ភ្នំពេញ 1FS 4175 ។
តាមសម្តីជនរងគ្រោះបានឲ្យដឹងថា មុនពេលកើតហេតុ រូបគាត់បានជិះម៉ូតូទៅកន្លែងរោងចិញ្ចឹមមាន់ ក្បែរផ្ទះជួលដែលបំណងយកទៅធ្វើម្ហូប នៅស្រុកកំណើត ហើយបានចតម៉ូតូចម្ងាយប្រហែល៥០ម៉ែត្រ ដោយគិតថា ទៅមួយភ្លែត ក៏ខ្ជិលដកសោចេញ លុះពេលចាប់មាន់រួចមករកម៉ូតូវិញ ស្រាប់តែបាត់មិនដឹងទៅណា ទើបរត់មកប្តឹងសមត្ថកិច្ចជួយអន្តរាគមន៍ ៕ សុខាសែនជ័យ
