សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីម្នាក់ជិះម៉ូតូចេញពីធ្វើការបំណងទៅផ្ទះ ខណៈមកដល់ពាក់កណ្តាលផ្លូវ ក៏ត្រូវជនសង្ស័យដងកាំភ្លើងភ្ជង់ប្លន់យកម៉ូតូទៅបាត់ដោយសុវត្ថិភាព តែលោកចោរបានទុកម៉ូតូកញ្ចាស់ឲ្យជនរងគ្រោះជិះទៅប្តឹងប៉ូលិស ។
ហេតុការណ៍នេះ បានកើតឡើងកាលពីវេលាម៉ោង៤និង៣០នាទីល្ងាច ថ្ងៃទី១០ ខែមេសា ឆ្នាំ២០១៩ ស្ថិតនៅដីវាលខាងជើងវត្តតាភេម ភូមិតាភេម សង្កាត់កំបូល ខណ្ឌពោធិសែនជ័យ រាជធានីភ្នំពេញ ។
ជនរងគ្រោះមានឈ្មោះ សុឹម ចាន់ថន ភេទស្រីអាយុ៣០ឆ្នាំ មុខរបរ កម្មការនីរោងចក្រ សាព្រីណា មានប្តីឈ្មោះ សាក់ សិទ្ធ អាយុ៣១ឆ្នាំ មុខរបរ កម្មករសំណង់ មានទីលំនៅភូមិរំដួល សង្កាត់ស្នោ ខណ្ឌពោធិសែនជ័យ ។ ចំណែកម៉ូតូ ដែលចោរដៃឆើត យកទៅបាត់ ម៉ាក ហុងដា សេ១២៥ សេរី២០១៨ ពណ៌ខ្មៅ ពាក់ស្លាកលេខ ភ្នំពេញ 1GY-9538 ជាកម្មសិទ្ធរបស់ឪពុកឈ្មោះ កាន សាក់ មានទីលំនៅ ក្នុងភូមិជាមួយគ្នា ។
ស្ត្រីរងគ្រោះបានឲ្យដឹងថា មុនកើតហេតុ គាត់ចេញពីធ្វើការ ឈប់ទិញម្ហូបមុខរោងចក្រហើយ ជិះម៉ូតូឆ្ពោះទៅផ្ទះ តាមផ្លូវបេតុង ជាប់ប៉ុស្តិ៍កំបូល ឆ្ពោះទៅវត្តតាភេម លុះទៅដល់ ដីវាលខាងជើងវត្ត ក្រៅភូមិ ជិតឡើងដល់ផ្លូវចូលភូមិរំដូលហើយ ស្រាប់តែជនសង្ស័យម្នាក់ ជិះម៉ូតូ ម៉ាក វ៉េវ កញ្ចាស់ ពណ៌ស្លែ ពាក់ស្លាកលេខ ភ្នំពេញ 1C-1388 ជែងទៅឈប់ស្ទាក់ពីមុខ ឃាត់ឲ្យឈប់ ដកកាំភ្លើងខ្លី ពណ៌ខ្មៅ ប្រផេះ ភ្ជង់គំរាមឲ្យចុះ ត្រូវបាននាងសូមអង្វរ សុំយកកាតក្រោមកែបម៉ូតូ ជនសង្ស័យយល់ព្រម ចាក់សោបើកកែប យកកាតរោងចក្រ គ្រវែងចោលនៅដីហើយ បើកម៉ូតូរត់គេចទៅបាត់ ដោយបន្សល់ទុកម៉ូតូអាវ៉េវកញ្ចាស់ នៅកន្លែងកើតហេតុ ។
ក្រោយកើតហេតុ លោកចោរប្លន់យកម៉ូតូថ្មីទៅបាត់ ទុកអាកញ្ចាស់ឲ្យជនរងគ្រោះ ផ្អើលដល់សមត្ថកិច្ចចុះទៅ សាកសួរ ពិនិត្យដល់កន្លែងកើតហេតុ រួចនាំជនរងគ្រោះ រួមជាមួយម៉ូតូជនល្មើសមួយគ្រឿង មកបន្តសាកសួរ និងដាក់ពាក្យបណ្តឹងនៅប៉ុស្តិ៍កំបូល ដើម្បីបន្តស្រាវជ្រាវ ៕ សុខាសែនជ័យ
