សារព័ត៌មាន នគរវត្ត តែងតែនាំមុខគេជានិច្ច
ក្នុងពេលដែលទំនាក់ទំនងរវាងឥណ្ឌា និងប៉ាគីស្ថាន កំពុងតែតានតឹងខ្លាំងឡើង នៅតំបន់ព្រំដែនកាស្មៀរ ដោយប្រទេសទាំងពីរអាចនឹងផ្ទុះសង្គ្រាមគ្រប់ពេលវេលា ។ ទាំងនោះហើយបានជាប្រទេសមហាអំណាច អាមេរិក អង់គ្លេស ស្នើដល់ពលរដ្ឋរបស់ខ្លួនបញ្ជៀសទៅកាន់ ប្រទេសប៉ាគីស្ថាន ។
អាមេរិក និងអង់គ្លេសបានលើកឡើងហេតុផលថា ក្រុមភេរវកម្មបានបង្កើនការវាយប្រហារនៅក្នុងប្រទេសប៉ាគីស្ថាន ជាមូលហេតុដែលប្រទេសទាំងពីរ អំពាវនាវដល់ ពលរដ្ឋកុំទៅកាន់ទីនោះ។ ជាមួយគ្នានេះ ក្រុមភេរវកម្ម បានបង្កើនសកម្មភាពនៅក្នុងប្រទេសនេះ ដោយអាចចាប់អ្នកទេសចរណ៍បរទេសធ្វើជាចំណាប់ខ្មាំង។
ចំណុចទាំងនោះហើយ បានជា ក្រសួងការបរទេសអង់គ្លេស បានអំពាវនាវដល់ពលរដ្ឋអង់គ្លេស មិនត្រូវទៅកាន់ប្រទេសប៉ាគីស្ថាន នាពេលនេះឡើយ ដោយអាចប្រឈមមុខនឹងហានិភ័យផ្សេងៗជាច្រើន ក្នុងនោះមានអំពើហិង្សាជាតិសាស្ត្រ ភេរវកម្ម ជាដើម។
ការប្រកាសខាងលើរបស់ក្រសួងការបរទេសអង់គ្លេសកើតឡើង ក្រោយពេល មានព័ត៌មានថាក្រុមភេរវកម្មអាចវាយប្រហារនៅក្នុងប្រទេសប៉ាគីស្ថាន ។ ក្រៅពីនេះ អាចនឹងមានអំពើហិង្សាជាតិសាស្ត្រ នៅទូទាំងប្រទេសប៉ាគីស្ថាន ក្នុងនោះមានទីក្រុង Islamabad, Rawalpindi, Lahore និង Karachi។ លើសពីនេះទៅទៀត អាចមានបាតុកម្មកើតឡើង ក្លាយទៅជាអំពើហិង្សា ហើយពលរដ្ឋរបស់បណ្តាប្រទេសលោកខាងលិច ងាយក្លាយជាជនរងគ្រោះនៅក្នុងអំពើហិង្សាទាំងនោះ ។
កន្លងមកថ្មីៗ អាមេរិកក៏បានអំពាវនាវដល់ពលរដ្ឋរស់ខ្លួន មិនត្រូវទៅកាន់ប្រទេសប៉ាគីស្ថាននោះឡើយ ដោយខ្លាចរងការវាយប្រហារភេរវកម្ម និង ចាប់ជំរិត ជាដើម។
ក្នុងពេលជាមួយគ្នានេះ ទំនាក់ទំនងរវាងឥណ្ឌា និងប៉ាគីស្ថាន ប្រឈមមុខតានតឹងដាក់គ្នា ហើយនាយករដ្ឋមន្ត្រីឥណ្ឌា ប្រកាសថានឹង វាយប្រហារ ទៅលើទីក្រុងក្រុមភេរវកម្ម ដែលបានលាក់ខ្លួននៅក្នុងទឹកដីប៉ាគីស្ថានផងដែរ ៕
