សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍ភ្ញាក់ផ្អើលមួយបន្ទាប់ពីប្រទះឃើញនារីម្នាក់ធ្វើអត្តឃាត ដោយចងកសម្លាប់ខ្លួនក្នុងបន្ទប់ជួលជាន់ទី៦ ស្ថិតនៅតាមបណ្តោយផ្លូវ៤៨៨ សង្កាត់ផ្សារដើមថ្កូវ ខណ្ឌចំការមន វេលាម៉ោង៧យប់ថ្ងៃទី២២ ខែមេសា ឆ្នាំ២០១៩ ។
នារីរងគ្រោះឈ្មោះ ខន ស្រីលិន អាយុ២៣ឆ្នាំ មុនរបរជានិស្សិត និងជាអ្នកគិតលុយ ហាងភីហ្សាមួយកន្លែង ស្នាក់នៅទីតាំងកើតហេតុខាងលើ មានស្រុកកំណើតនៅស្រុកត្រាំកក់ ខេត្តតាកែវ ។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុម្តាយនារីរងគ្រោះបានខលទៅតែមិនចូល បន្ទាប់មក ក៏ឲ្យប្អូនប្រុសទៅមើលកន្លែងធ្វើការ តែមិនឃើញ ទើបទៅរកមើលនៅបន្ទប់ជួល តែជាប់សោខាងក្រៅ ។
ប្រភពព័ត៌មានបានបន្តថា ក្រោយមក ក៏ហៅម្ចាស់ផ្ទះឲ្យយកកូនសោមកចាក់មើល ទើបប្រទះឃើញនារីរងគ្រោះចងកសម្លាប់ជាប់ និងចម្រឹងបង្អូចបាត់ទៅហើយ ។
សមត្ថកិច្ចបានបញ្ជាក់ឲ្យដឹងថា សពនារីរងគ្រោះមានសភាពស្អុយទៅហើយ មិនដឹងថាសម្លាប់ខ្លួនពីពេលណានោះទេ ។
ក្រោយកើតហេតុសមត្ថកិច្ចមូលដ្ឋានបានទំនាក់ទំនងជំនាញ់រាជធានីបានចុះមកកោសល្យវិច័យជាក់ស្តែង តែមិនមានការបញ្ជាក់ថា សពស្លាប់ដោយចងកមែន ឬមិនមែននោះទេ ។
ប្រជាពលរដ្ឋមានចម្ងល់ថា គ្រាន់តែសពចងកសោះ ហេតុអីបានជាកម្លាំងសមត្ថកិច្ចលាក់បាំង មិនឲ្យសារពត៌មានថតយករូបភាព ឬ ក៏ជាករណីផ្សេង ដោយនៅលើសពមានឈាមទៀតផង សូម្បីតែសព ក៏នាំគ្នាសែងរត់ចូលរថយន្តដឹកសពបើករត់ទៅបាត់ ៕ សុខាសែនជ័យ
