សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ ឆ្លៀតឱកាសដែលមន្ត្រីបរិស្ថាន ក្នុងដែនជម្រកសត្វព្រៃភ្នំព្រិចធ្វេសប្រហែសបន្តិចបន្តួច ក្នុងឱកាសបុណ្យចូលឆ្នាំ ជនខិលខូចដែលជាជនជាតិគ្រោល (ឬព្នង) ៨នាក់ ឃុបឃិតជាមួយជនជាតិវៀតណាម២នាក់បានលបលួចធ្វើសកម្មភាពប្រមូលផល និងអនុផលព្រៃឈើនៅក្នុងដែនជម្រកសត្វព្រៃភ្នំព្រិច ។ ពួកគេត្រូវបានកម្លាំងមន្ទីរបរិស្ថាន សហការជាមួយនគរបាលខេត្តចាប់បាន ទាំង១០នាក់ កំពុងធ្វើសកម្មភាពនៅភូមិសាស្ត្រ ភូមិក្តោយ ឃុំរយ៉ ស្រុកកោះញែក ខេត្តមណ្ឌលគិរីកាលពីថ្ងៃទី១៩ ខែមេសា ឆ្នាំ២០១៩ ។
លោក ហាន សាខន នាយកដែនជម្រកសត្វព្រៃភ្នំព្រិចឲ្យដឹងថា ដោយសារកម្លាំងរបស់ដែនជម្រកមានចំនួនតិច ពួកជនខិលខូចតែងតែលួចធ្វើសកម្មភាព ជាងនេះទៅទៀត ក្រុមជនជាតិភាគតិច ដែលមានលំនៅឋាននៅក្នុងតំបន់តែងតែលួចធ្វើសកម្មភាពខុសច្បាប់ជាច្រើន ។ នៅពេលដែលមានការឆកល្វែង ឬថ្លោះធ្លោយបន្តិចបន្តួច ពួកគេតែងតែឆ្លៀតធ្វើសកម្មភាព ដូចជាកាប់ ឬលួចអារឈើជាដើម ។ ជាក់ស្តែងនៅថ្ងៃទី១៩ ខែមេសា កម្លាំងរបស់ដែនជម្រក សហការជាមួយកម្លាំងនៃមន្ទីរបរិស្ថាន និងនគរបាលខេត្ត បានចាប់ជនជាតិវៀតណាម២នាក់, ខ្មែរម្នាក់(អ្នកបកប្រែ) និងជនជាតិភាគតិច៧នាក់ ដោយប្រមូលឈើអាររួចជិត១០០កំណាត់ ។
លោកបានឲ្យដឹងថា បុរសជនជាតិវៀតណាមនោះមានឈ្មោះ ង្វៀង ង៉ុកចូវ អាយុ៦០ឆ្នាំ និងថាត់ យូ អាយុ៤២ឆ្នាំ ។ ពួកគេបានធ្វើសកម្មភាពតាមរយៈជនជាតិភាគតិចនៅក្នុងសហគមន៍តំបន់ភ្នំព្រិច ។ លោកនាយកដែនជម្រកបានអះអាងថា បងប្អូនជនជាតិភាគតិចយើងមួយចំនួនមិនយល់អំពីបញ្ហាច្បាប់ទម្លាប់ ហើយតែងតែបង្កឲ្យមានបញ្ហាលើការងារបរិស្ថាន ។ យ៉ាងណាក៏ដោយជនជាតិភាគតិច ដែលចូលរួមក្នុងការកាប់ឈើនោះ ត្រូវបានធ្វើកិច្ចសន្យា និងដោះលែងឲ្យត្រឡប់ទៅលំនៅឋានវិញហើយ ។
លោក កែវ សុភក្តិ ប្រធានមន្ទីរបរិស្ថានខេត្តមណ្ឌលគិរីអះអាងថា យើងតែងតែខិតខំប្រឹងប្រែងបំពេញការងារ ប៉ុន្តែវាពិតជាមានចំណុចឆកល្វែង ។ តែយ៉ាងណា យើងនឹងបន្តខិតខំ ។ លោកថា ជនជាប់សង្ស័យទាំង១០នាក់ ក្នុងនោះមានជនជាតិវៀតណាម២នាក់ និងអ្នកបកប្រែជាជនជាតិខ្មែរម្នាក់ ត្រូវបានបញ្ជូនទៅសាលាដំបូងដើម្បីចាត់ការតាមច្បាប់ រីឯជនជាតិក្រោល៧នាក់ទៀតត្រូវបានធ្វើកិច្ចសន្យាមិនឲ្យប្រព្រឹត្តបទល្មើសបន្តទៅទៀត ហើយបានដោះលែងឲ្យត្រឡប់ទៅលំនៅឋានវិញហើយ ។
លោកប្រធានមន្ទីរអះអាងទៀតថា បើសិនគ្មានកម្លាំងជួយពីស្នងការនគរបាលខេត្តទេ កម្លាំងរបស់យើងនឹងជួបបញ្ហា ពោលគឺក្រុមជនជាតិភាគតិច (ក្រោល) ប្រុងនឹងផ្ទុះហិង្សាដើម្បីរំដោះយកជនសង្ស័យទាំង១០នាក់នោះទៅវិញ ។ វាជាការលំបាកខ្លាំងណាស់សម្រាប់យើង នេះជាការអះអាងរបស់លោក កែវ សុភក្តិ ។ យ៉ាងណាក៏ដោយ ទាំងប្រធានមន្ទីរបរិស្ថាន និងនាយកដែនជម្រកសត្វព្រៃភ្នំព្រិច អះអាងថា នឹងបន្តខិតខំបំពេញការងារមិនឲ្យក្រសួងបរិស្ថាន ក៏ដូចជារាជរដ្ឋាភិបាលបាក់ទំនុកចិត្តនោះឡើយ ៕ ហេង សូរិយា
