ម៉ូតូ២គ្រឿងបុកគ្នា របួសធ្ងន់២នាក់ នៅក្រុងបាវិត

ខេត្តស្វាយរៀង៖ ប្រុសស្រី២នាក់ បានរងរបួសធ្ងន់ ដោយសារករណីគ្រោះថ្នាក់ចរាចរណ៍គួរឲ្យរន្ធត់ រវាងម៉ូតូ២គ្រឿង បុកគ្នាក្នុងទិសដៅស្របគ្នាពេញទំហឹងលាន់សូរដូចរន្ទះ បង្កការភ្ញាក់ផ្អើលដល់អ្នកភូមិ និងអ្នកធ្វើដំណើរចោមរោមមើល និងរាយការណ៍ មកសមត្ថកិច្ចមូលដ្ឋានកាលពីថ្ងៃទី២៤ ខែមេសា ឆ្នាំ២០១៩ វេលាម៉ោង៧ និង៤០នាទីព្រឹក នៅលើផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៥១-១៥២ ស្ថិតក្នុងភូមិសាលាទាន សង្កាត់ច្រកម្ទេស ក្រុងបាវិត ខេត្តស្វាយរៀង ។

បើតាមសមត្ថកិច្ចនគរបាលក្រុងបាវិតបានឲ្យដឹងថា ម៉ូតូបង្កហេតុ ម៉ាក HYOSUNG ពណ៌ខ្មៅ ពាក់ស្លាកលេខ ស្វាយរៀង 1M 7825 បើកបរដោយ ឈ្មោះសូ វិរះ ភេទប្រុស អាយុ២៨ឆ្នាំ ជនជាតិខ្មែរ មុខរបរកម្មករ រោងចក្រ មានទីលំនៅភូមិចក ឃុំចក ស្រុករំដួល ខេត្តស្វាយរៀង ។

ចំណែកភាគីរងគ្រោះមាន ឈ្មោះឯក រិន ភេទស្រី អាយុ៥៦ឆ្នាំ ជនជាតិខ្មែរមុខរបរកសិករមានទីលំនៅ ភូមិព្រៃអង្គុញ សង្កាត់ព្រៃអង្គុញ ក្រុងបាវិត ខេត្តស្វាយរៀង ដោយជិះម៉ូតូ ម៉ាកហុងដាវ៉េវ ពណ៌ក្រហម ពាក់ស្លាកលេខវៀតណាម 47-M1 354-19 ខូចខាតយ៉ាងដំណំ ។

បើតាមសាក្សីបានឲ្យដឹងថា មុនកើតហេតុមានបុរសម្នាក់បានជិះម៉ូតូមួយគ្រឿងម៉ាក HYOSUNG ពណ៌ខ្មៅពាក់ស្លាកលេខ ស្វាយរៀង1M 7825 ក្នុងទិសដៅពីកើតទៅលិចក្នុងល្បឿនលឿនក៏បុក និងម៉ូតូមួយគ្រឿង ម៉ាកហុងដាវ៉េវ ពណ៌ក្រហម ពាក់ស្លាកលេខ វៀតណាមវៀតណាម 47-M1 354-19 បើកបរដោយស្ត្រីម្នាក់យ៉ាងពេញទំហឹងលាន់ដូចរន្ទះបាញ់បង្កការភ្ញាក់ផ្អើលតែម្ដង ។

បច្ចុប្បន្ន អ្នករងរបួសទាំង២នាក់ ត្រូវបានបញ្ជូនមកសម្រាកព្យាបាលនៅមន្ទីរពេទ្យបង្អែកស្វាយរៀង និងវាស់វែង និងអូសយកមធ្យោបាយម៉ីតូទាំង២គ្រឿងមករក្សាទុក នៅប៉ុស្តិ៍នគរបាលរដ្ឋបាលច្រកម្ទេស ដើម្បីបំពេញសំណុំរឿងបញ្ជូនទៅអធិការរដ្ឋាននគរបាលក្រុងបាវិតចាត់ការតាមច្បាប់ ៕ យឹម សុថាន