សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ បានធ្វើកម្មភាពលួចម៉ូតូរបស់ជនរងគ្រោះពីខណ្ឌច្បារអំពៅ តែសំណាងមិនល្អ មកជាប់អន្ទាក់សមត្ថកិច្ចខណ្ឌសែនសុខ ។ ហេតុការណ៍នេះ បានកើតឡើងកាលពីវេលាម៉ោង៩ និង៤០នាទីព្រឹក ថ្ងៃទី២៨ ខែមេសា ឆ្នាំ២០១៩នៅចំណុចខាងក្រោមស្ពានអាកាសផ្សារដីហុយ តាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែនសុខ ។
ជនសង្ស័យខាងលើមានឈ្មោះ ឈុន ឈីម ភេទប្រុស អាយុ៤០ឆ្នាំ មុខរបរមិនពិតប្រាកដ ស្នាក់នៅផ្ទះលេខ១៧៤E ផ្លូវលេខ១៨២ សង្កាត់ទឹកល្អក់ទី៣ ខណ្ឌទួលគោក និងមានស្រុកកំណើត ស្រុកបាធាយ ខេត្តកំពង់ចាម ។ ចំណែកជនរងគ្រោះមានឈ្មោះ ផូ ភក្ត័ ភេទប្រុស អាយុ៣២ឆ្នាំ ជាជាងសំណង់ ស្នាក់នៅសង្កាត់ចោមចៅទី១ ខណ្ឌពោធិ៍សែនជ័យ ។
ប្រភពពីជនរងគ្រោះបានរៀបរាប់ប្រាប់សមត្ថកិច្ចថា នៅមុនពេលកើតហេតុ កាលពីថ្ងៃទី២៧ ខែមេសា ជនរងគ្រោះបានជិះម៉ូតូមួយគ្រឿងម៉ាក ហុងដាឌ្រីម ស៊េរី០១៥ ពណ៌ខ្មៅ ពាក់ស្លាកលេខ ព្រៃវែង1J-3166 ទៅធ្វើការនៅការដ្ឋាសំណង់មួយកន្លែង ដែលស្ថិតនៅចំណុចខាងក្រោយវត្តនិរោធ សង្កាត់និរោធ ខណ្ឌច្បារអំពៅ ដោយទុកម៉ូតូនៅខាងមុខដូចសព្វដងរួច ក៏ចូលទៅធ្វើការ លុះដល់វេលាម៉ោង៥ល្ងាចថ្ងៃដដែល ជនរងគ្រោះក៏បានចេញមកពីកន្លែងធ្វើការវិញ ស្រាប់តែមិនឃើញម៉ូតូរបស់ខ្លួន ។ ភ្លាមៗនោះជនរងគ្រោះក៏បានសួរនាំអ្នកដែលធ្វើការជាមួយគ្នា ប៉ុន្តែគ្មាននរណាម្នាក់ដឹងទេ ទើបជនរងគ្រោះដឹងថា ម៉ូតូរបស់ខ្លួនត្រូវបានចោរលួច ។
ជនរងគ្រោះ ក៏ឆោឡោរត់ទៅដាក់ពាក្យបន្តឹងនៅប៉ុស្តិ៍នគរបាលរដ្ឋបាលនិរោធ ដើម្បីឲ្យសមត្ថកិច្ចជួយស្វែងរក ។
ប្រភពដដែលបន្តថា លុះស្អែកឡើងថ្ងៃទី២៨ ខែមេសា ជនរងគ្រោះ ក៏បានទាក់ទងទៅសួរនាំក្រុមហ៊ុនជីភីអេះ ដែលជនរងគ្រោះបានដាក់ភ្ជាប់នៅលើម៉ូតូរបស់ខ្លូនដែលត្រូវចោរលួច ។
បន្ទាប់មកខាងក្រុមហ៊ុនជីភីអេះ ក៏បានប្រាប់ថា ប្រព័ន្ធជីភីអេះដែលភ្ជាប់នៅលើម៉ូតូរបស់ខ្លួនកំពុងលោតដំណើរការនៅម្តុំចំណុចកើតហេតុខាងលើ ដោយបញ្ជាក់ប្រាប់ម៉ូតូនោះកំពុងត្រូវអ្វីម្យ៉ាងដឹកយកទៅ ព្រោះម៉ាស៊ីនម៉ូតូមិនមានការបញ្ឆេះដំណើរការនោះទេ ។ ភ្លាមៗនោះជនរងគ្រោះ ក៏បាន ទាក់ទងរាយការណ៍ជូនសមត្ថកិច្ចមូលដ្ឋានប៉ុស្តិ៍ទឹកថ្លាដែលកំពុងជិះល្បាត ពីភិនភាគម៉ូតូរបស់ខ្លូនដែលបានបាត់ ។ ស្របគ្នានេះដែរសមត្ថកិច្ចមូលដ្ឋានប៉ុស្តិ៍ទឹកថ្លា ក៏បានប្រទះឃើញរថយន្តមួយគ្រឿងម៉ាក តូយូតាតាកូម៉ា ពណ៌ក្រហម ពាក់ស្លាកលេខ កំពង់ចាម2A-3424 ដែលបើកបរដោយជនសង្ស័យខាងលើ តាមបណ្ដោយផ្លូវសហព័ន្ធរុស្ស៊ី ក្នុងទិសដៅពីកើតទៅលិច និងមានដឹកម៉ូតូមួយគ្រឿងម៉ាក ហុងដាឌ្រីម ស៊េរី០១៥ ពណ៌ខ្មៅ ពាក់ស្លាកលេខ ភ្នំពេញ1CI-5698 រួមជាមួយ និងឥវែឥវ៉ាន់មួយចំនួនទៀតចង់ជាប់នៅពីក្រោយរថយន្ត ។
ខណៈនោះដោយមានការសង្ស័យ ព្រោះត្រូវនឹងភិនភាគដែលជនរងគ្រោះបានប្រាប់ ហើយសមត្ថកិច្ចក៏ឃាត់ដើម្បីធ្វើការសាកសួរនាំ ។ បន្ទាប់មកសមត្ថកិច្ចក៏បានទាក់ទងជនរងគ្រោះអោយចុះមកកន្លែងកើតហេតុខាងលើ ដើម្បីយកកាតគ្រីម៉ូតូដែលបាត់ យកមកត្រួតពិនិត្យផ្ទៀងផ្ទាត់លេខតួ និងលេខម៉ាស៊ីនម៉ូតូដែលនៅលើរថយន្តខាងលើ ។ ក្រោយពីធ្វើការផ្ទៀងផ្ទាត់ ទើបដឹងថា ម៉ូតូនោះជាម៉ូតូរបស់ជនរងគ្រោះពិតប្រាកដមែន ។
ក្រោយពេលកើតហេតុជនសង្ស័យខាងលើរួមទាំងវត្ថុតាងត្រូវបានសមត្ថកិច្ចប៉ុស្តិ៍នគរបាលរដ្ឋទឹកថ្លានាំយកទៅសាកសួរនាំនៅអធិការដ្ឋាននគរបាលខណ្ឌសែនសុខ ដើម្បីប្រគល់ទៅឲ្យសមត្ថកិច្ចខណ្ឌច្បារអំពៅយកទៅសាកសួរជាបន្ត និងចាក់ការទៅតាមនីតិវិធីច្បាប់ជាបន្តទៀត ៕ តុង សីហា
