សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិចិនបើករថយន្តឡិចស៊ីស RX300 លឿនជ្រុលបុករថយន្តឡិចស៊ីសGS300បណ្តាលឲ្យរងការខូចខាតអស់មួយចំហៀងខាងឆ្វេង ហើយបន្តទៅបុកដើមឈើមួយដើមគៀបជាប់ទៅមុខលែងរួច កាលពីវេលាម៉ោង១ និង៣០នាទីរំលងអធ្រាត្រឈានចូល ថ្ងៃទី៣ ខែឧសភា ឆ្នាំ២០១៩ នៅចំណុចស្តុបបូកគោ តាមបណ្តោយផ្លូវមុនីវង្ស ស្ថិតក្នុង សង្កាត់បឹកកេងកងទី១ ខណ្ឌចំការមន រាជធានីភ្នំពេញ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តម៉ាកឡិចស៊ីស GS300 ពណ៌ខ្មៅ ពាក់ស្លាកលេខ ភ្នំពេញ2AT 8059 ធ្វើដំណើរតាមបណ្តោយផ្លូវមុនីវង្ស ក្នុងទិសដៅពីត្បូងទៅជើង ខណៈមកដល់ចំណុចកើតហេតុស្រាប់តែមានរថយន្តម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ2T 0376 បើកបរដោយបុរសជនជាតិចិនម្នាក់ ធ្វើដំណើរតាមបណ្តោយផ្លូវម៉ៅសេទុង ទិសដៅពីលិចទៅកើត ក្នុងល្បឿនលឿន ក៏ជ្រុលបុកពីចំហៀងរថយន្តឡិចស៊ីស GS300 បណ្តាលឲ្យរេចង្កូតទៅដើមឈើគៀបជាប់ទៅមុខលែងរួច រងការខូចខាតតែមិនមានមនុស្សរងរបួសនោះទេ ។
ក្រោយកើតហេតុ សមត្ថកិច្ចបានចុះមកដល់ចំណុចកើតហេតុ និងទំនាក់ទំនងទៅជំនាញចរាចរណ៍ជើងគោក រាជធានីភ្នំពេញ មកវាស់វែងយកទៅរក្សាទុក រង់ចាំដោះស្រាយតាមច្បាប់ ៕ សុខាសែនជ័យ
