បើករថយន្តទំនងងងុយដេក ងោកមួយភាំង បុកម៉ូតូហុងដា រងរបួសធ្ងន់២នាក់ នៅក្រុងស្វាយរៀង

ខេត្តស្វាយរៀង៖ យ៉ាងហោចណាស់មនុស្សស្រី២នាក់ បានរងរបួសធ្ងន់ ដោយសារករណីគ្រោះថ្នាក់ចរាចរណ៍ បង្កឡើងដោយរថយន្តមួយគ្រឿង ទំនងងងុយដេករេចង្កូតបុកម៉ូតូបញ្ច្រាសគ្នា ពេញទំហឹង បង្កការភ្ញាក់ផ្អើលដល់អ្នក ភូមិ និងអ្នកធ្វើដំណើរ ជួយហៅ រថយន្តសង្គ្រោះដឹកទៅកាន់មន្ទីរពេទ្យបង្អែក កាលពីវេលាម៉ោង៥រសៀល ថ្ងៃទី៣ ខែឧសភា ឆ្នាំ ២០១៩ នៅលើផ្លូវជាតិលេខ១ ចន្លោះគីឡូម៉ែតលេខ ១៣១ និង១៣២ ស្ថិតក្នុង ភូមិស្វាយតឿ សង្កាត់ ស្វាយតឿ ក្រុង ស្វាយរៀង ខេត្តស្វាយរៀង ។

យោងតាមសមត្ថកិច្នគរបាលក្រុងស្វាយរៀងបានឲ្យដឹងថា ស្ត្រី២នាក់ ដែលជិះម៉ូតូរងរបួស មានឈ្មោះ ឡឹក សារ៉េន អាយុ៣៥ ឆ្នាំ មុខរបរ លក់ដូរ និងអ្នករួមដំណើរម្នាក់ទៀតឈ្មោះ រស់ ធីតា ភេទ ស្រី អាយុ ៤០ ឆ្នាំ មុខរបរ លក់ដូរ អ្នកទាំង២ រស់នៅ ភូមិកៀនសាំង សង្កាត់ស្វាយរៀង ក្រុង ស្វាយរៀង ខេត្តស្វាយរៀង ខណៈជិះម៉ូតូម៉ាក ហុងដា zomerx ពណ៌ខ្មៅ និងក្រហមពាក់ស្លាកលេខ ស្វាយរៀង ១K ៦០៧៥ ខូចខាតយ៉ាងដំណំ ។

ចំណែកអ្នកបើករថយន្តបង្កហេតុ ត្រូវបានស្គាល់ឈ្មោះ ចាន់ កញ្ញា ភេទស្រី អាយុ៣៥ ឆ្នាំ មុខរបរមន្ត្រីជាប់កិច្ចសន្យា មន្ទីរកិច្ចការនារី រស់នៅ ភូមិ ចុងព្រែក សង្កាត់ស្វាយរៀង ក្រុងស្វាយរៀង ខេត្ត ស្វាយរៀង ។

តាមសាក្សីបានឲ្យដឹងថា នៅមុនពេលកើតហេតុគេឃើញមានរថយន្ដមួយគ្រឿងម៉ា TACOMA ពណ៌ សំបកឪឡឹក ពាក់ស្លាកលេខ ភ្នំពេញ ២AA ២៩២៨ បើកបរដោយស្ត្រីម្នាក់ក្នុងទិសដៅពីកើតទៅលិច លុះមកដល់ចំណុចកើតហេតុខាងលើ ទំនងងងុយដេក ក៏រេចង្កូតទៅខាងត្បូងផ្លូវបុកម៉ូតូម៉ាកហុងដា zomerx ពណ៌ខ្មៅ និងក្រហមពាក់ស្លាកលេខ ស្វាយរៀង ១K ៦០៧៥ ជិះគ្នា២នាក់ ពីចំហៀងខាងស្តាំពេញទំហឹង បណ្តាលឲ្យរងរបួសធ្ងន់ បង្កការភ្ញាក់ផ្អើលតែម្ដង ។

ក្រោយមក សមត្ថកិច្ចមូលដ្ឋានបានមកដល់ ដោយយកជនរងគ្រោះទាំង២នាក់ មកកាន់មន្ទីរពេទ្យ និងវាស់វែង និងអូសយកមធ្យោបាយធ្វើដំណើរទាំង២គ្រឿង មករក្សាទុកនៅការិយាល័យនគរបាលចរាចរណ៍ ខត្តស្វាយរៀង ដើម្បីដោះស្រាយពេលក្រោយ ៕ យឹម សុថាន