សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នគរបាលខណ្ឌសែនសុខ បានឃាត់ខ្លួន ជនសង្ស័យបន្ថែមមម្នាក់ទៀត នៅថ្ងៃទី៤ ខែឧសភា ឆ្នាំ២០១៩ វេលាម៉ោង១៦៖០០នាទី ពាក់ព័ន្ធករណីលួចមានស្ថានទម្ងន់ទោស ឆក់យកទូរស័ព្ទដៃ កាលពីថ្ងៃ២៣ ខែមេសា ឆ្នាំ២០១៩ វេលាម៉ោង២៣៖០០នាទី នៅចំណុចមុខហាងប៉េស្តា ផ្លូវ៥៩៨ ភូមិទំនប់ សង្កាត់ភ្នំពេញថ្មី ខណ្ឌសែនសុខ បង្កឡើងដោយជនសង្ស័យ ចំនួន៤នាក់ ដែលគេចខ្លួនម្នាក់ ប្រើមធ្យោបាយម៉ូតូ៣គ្រឿង ។
ជនសង្ស័យឈ្មោះ សរ សំណាង ភេទប្រុស អាយុ១៧ ឆ្នាំ ស្នាក់នៅផ្ទះសង់ថ្មី ភូមិគោកឃ្លាង សង្កាត់គោកឃ្លាង ខណ្ឌសែនសុខ មានសារធាតុញៀន ។
ជនរងគ្រោះឈ្មោះ ម៉ៅ ស្រីណាវ ភេទស្រី អាយុ២៩ ឆ្នាំ មុខរបរបុគ្គលិកហាងសំរិតពេជ្រ ស្នាក់នៅបន្ទប់ជួល ផ្លូវលំ សង្កាត់បឹងកក់២ ខណ្ឌទួលគោក ។ សម្ភារៈបាត់បង់ ៖ ទូរស័ព្ទដៃមួយគ្រឿង ម៉ាកសាំសុងផ្លើស ។
មុនពេលកើតហេតុ ថ្ងៃទី២៣ ខែមេសា ឆ្នាំ២០១៩ វេលាម៉ោង២៣៖០០នាទី ជនរងគ្រោះ និងមិត្តភក្តិបានជិះម៉ូតូមួយគ្រឿង ចេញពីកន្លែងធ្វើការ ដោយធ្វើដំណើរដល់ចំណុចកើតហេតុ ស្រាប់តែមានជនសង្ស័យមួយក្រុមមានគ្នា៤នាក់ ជិះម៉ូតូ៣គ្រឿង មកជិតជនរងគ្រោះរួចធ្វើសកម្មភាពឆក់យកទូរស័ព្ទដៃពីជនរងគ្រោះបាន រួចបម្រុងជិះម៉ូតូគេចខ្លួន តែដៃចង្កូតម៉ូតូរបស់ជនសង្ស័យ បានទាក់ជាមួយដៃចង្កូតជាម៉ូតូរបស់រងគ្រោះបណ្តាលឲ្យម៉ូតូទាំងដួល ហើយជនសង្ស័យបានរត់ឡើងជិះម៉ូតូបក្ខពូកគេចខ្លួន ដោយបន្សល់ទុកម៉ូតូជនសង្ស័យដួលមួយគ្រឿង នៅកន្លែងកើតហេតុ រួចជនរងគ្រោះបានមកដាក់ពាក្យបណ្តឹងនៅប៉ុស្តិ៍រដ្ឋបាលភ្នំពេញថ្មី ។
បន្ទាប់មកសមត្ថិកិច្ច បានស្រាវជ្រាវ លុះដល់ថ្ងៃទី២ ខែឧសភា ឆ្នាំ២០១៩ វេលាម៉ោង១១៖០០នាទី បានឃាត់ខ្លួនជនសង្ស័យសេដ្ឋា មិនារិទ្ធ , ជា ករុណា , សុខ ចន្ទ័រង្សី យកមកសាកសូរនៅអធិការដ្ឋាននគរបាលខណ្ឌសែនសុខតែម្តង ។
រហូតដល់ថ្ងៃទី៤ ខែឧសភា ឆ្នាំ២០១៩ វេលាម៉ោង ១៦៖០០នាទី អធិការដ្ឋាននគរបាលខណ្ឌសែនសុខបានបន្តឃាត់ខ្លួន ជនសង្ស័យឈ្មោះ សរ សំណាង ក្នុងផ្ទះរបស់ខ្លួន ស្ថិតនៅចំណុចក្នុងផ្ទះសង់ថ្មី ភូមិគោកឃ្លាង សង្កាត់គោកឃ្លាង ខណ្ឌសែនសុខ យកមកសាកសួរនៅអធិការដ្ឋាននគរបាលខណ្ឌសែនសុខ ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីចាត់ការតាមនីតិវិធី ៕ ចេស្តា
