សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ចោរលួចគាស់ជញ្ជាំងកញ្ចក់ផ្សារទំនើប AEON Max Valu Express ហើយជនសង្ស័យបានចូលទៅដល់ខាងក្នុង តែមិនទាន់លួចបានអ្វីនៅឡើយទេ គឺប្រញាប់ដើរសំដៅទៅកន្លែងគិតលុយភ្លាម នៅពេល ដើរជិតដល់ ស្រាប់តែសំឡេងស៊ីរ៉ែនរោទិ៍លាន់ពេញផ្សារ ហើយអំពូលភ្លើងលោតបើកភ្លឺចែស ធ្វើឲ្យជនសង្ស័យភ័យស្ទុះចេញមកវិញ រត់គេចខ្លួនបាត់ ។
ហេតុការណ៍នេះ បង្កការភ្ញាក់ផ្អើលដល់ក្រុមសន្តិសុខចុះមកពិនិត្យមើល និងរាយការណ៍ប្រាប់កម្លាំងល្បាតប៉ុស្តិ៍ចាក់អង្រែក្រោមចុះមកជួយអន្តរាគមន៍ កាលពីម៉ោងជិត៣ទៀបភ្លឺ ឈានចូលថ្ងៃអាទិត្យ ទី៥ ខែឧសភា ឆ្នាំ២០១៩ នៅផ្សារទំនើប AEON Max Valu Express ស្ថិតនៅមជ្ឈមណ្ឌលទេសចរណ៍ និងកម្សាន្ត WB-ARENA (ទល់មុខសាលាសង្កាត់ និងប៉ុស្តិ៍នគរបាលចាក់អង្រែក្រោម) នៅតាមបណ្ដោយផ្លូវជាតិលេខ២ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
ប្រភពពីកម្លាំងល្បាតប៉ុស្តិ៍ចាក់អង្រែក្រោម បាន ឲ្យដឹងថា នៅមុនកើតហេតុ កម្លាំងល្បាតប៉ុស្តិ៍ចាក់អង្រែក្រោម បានចេញល្បាតពួនស្ទាក់ និងត្រៀមលក្ខណៈអន្តរាគមន៍ ទប់ស្កាត់បទល្មើសផ្សេងៗ ដើម្បីការពារសុវត្ថិភាពជូនបងប្អូនប្រជាពលរដ្ឋក្នុងមូលដ្ឋាន ដោយចល័តពីភូមិ១ ចូលទៅភូមិ១ រួចចល័តឡើងមកលើផ្លូវជាតិ និងច្រកដឿងហែមនានា ដោយឆ្លងកាត់ ផ្សារទំនើបកើតហេតុនេះដែរ ដោយពុំឃើញមានអ្វីទេ ហើយក៏ល្បាតចល័តបន្តតាមភូមិផ្សេងទៀត ដូចសព្វដង ។ ក្រោយមកក៏ទទួលបានដំណឹងថា មានករណីចោរលួចគាស់ហាង ទើបកម្លាំងល្បាតត្រឡប់មកវិញ តែជនសង្ស័យបានគេចខ្លួនបាត់ទៅហើយ ។
បើតាមសន្តិសុខម្នាក់ បានបង្ហើបថា បើតាមគាត់បានមើលកាមេរ៉ាសុវត្ថិភាព ជាមួយក្រុមបច្ចេកទេស ប្រព័ន្ធសុវត្ថិភាព ដែលចុះមកបើកពិនិត្យមើល រួមទាំងមានប៉ូលិសមកសហការ និងបើកមើលឃើញក្រោយពីគាស់ចូលបានហើយ គេឃើញ សកម្មភាពជនសង្ស័យម្នាក់ តែមិនដឹងថា មានបក្ខពួកទៀតឬអត់នោះទេ បានចូលទៅដល់ខាងក្នុងតែមិនទាន់បានលួចយកអ្វីនៅឡើយទេ ឃើញដើរសំដៅទៅកន្លែងគិតលុយ ហើយនៅពេលដើរជិតដល់ ស្រាប់តែសំឡេងស៊ីរ៉ែនរោទិ៍ រួមទាំងអំពូលភ្លើងលោតបើកភ្លឺចែសពេញហាងតែម្ដង ធ្វើឲ្យជនសង្ស័យមានការភ័យស្លន់ស្លោ ទើបស្ទុះចេញមកក្រៅវិញ ហើយរត់គេចខ្លួនបាត់ បង្កការភ្ញាក់ផ្អើលដល់ក្រុមសន្តិសុខចេញមករកមើល និងរាយការណ៍ប្រាប់សមត្ថកិច្ចមូលដ្ឋានឲ្យបានដឹងផងដែរ ។
បន្ទាប់ពីកើតហេតុ សមត្ថកិច្ចមូលដ្ឋាន និងក្រុមបច្ចេកទេសប្រព័ន្ធសុវត្ថិភាព និងក្រុមសន្តិសុខ បានរាយការណ៍ជូនថ្នាក់លើរាងខ្លួន ដើម្បីរង់ចាំខាងសមត្ថកិច្ចស្រាវជ្រាវតាមជំនាញបន្ត ដើម្បីកំណត់មុខសញ្ញាតាមចាប់ខ្លួនជនសង្ស័យយកមកផ្ដន្ទាទោសតាមច្បាប់ ៕ ជ្រោយពេជ្រ
