សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ឆ្លងចរន្តអគ្គិសនីផ្ទុះឆេះបង្គោលភ្លើងបែកផ្កាភ្លើងយ៉ាងសន្ធោសន្ធៅផ្អើលដល់ប្រជាពលរដ្ឋចេញយកបំពង់ពន្លត់អគ្គិភ័យ មកបាញ់ និងរាយការណ៍ទៅសមត្ថកិច្ចចុះមកអន្តរាគមន៍ហៅរថយន្តពន្លតអគ្គិភ័យចំនួន២គ្រឿង ។
ហេតុការណ៍នេះបានកើតឡើងកាលពីវេលាម៉ោង២ និង៤០នាទី រំលងអធ្រាត្រឈានចូល ថ្ងៃទី៨ ខែឧសភា ឆ្នាំ២០១៩ នៅចំណុច ផ្លូវលេខ៤៩៤កែង និងផ្លូវលេខ៤៣០ ស្ថិតក្នុង សង្កាត់ផ្សារដើមថ្កូវ ខណ្ឌចំការមន ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញមានកាប៊ិនភ្លើងខាងលើបានឆ្លងចរន្តអគ្គិសនីហើយផ្ទុះចេញជាផ្កាភ្លើងបង្កឲ្យមានអណ្តាតភ្លើងឆេះផ្អើលដល់អ្នកជិតខាងនាំគ្នាយកបំពង់ពន្លត់អគ្គិភ័យមកបាញ់ជាច្រើន និងរាយការណ៍ទៅសមត្ថកិច្ចហៅរថយន្តពន្លត់អគ្គិភ័យចំនួន២គ្រឿង ទើបអាចគ្រប់គ្រងបាន ក្នុងហេតុនោះផងដែរមិនមានមនុស្សរងរបួសនោះទេ គ្រាន់តែដាច់ខ្សែភ្លើងតែប៉ុណ្ណោះ ៕ សុខាសែនជ័យ
