សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់សង្ស័យស្រវឹងបើករថយន្តលឿនមិនប្រយ័ត្នជ្រុលបុករថយន្តយីឌុប ពីក្រោយពេញទំហឹង បណ្តាលឲ្យរងការខូចខាតយ៉ាងដំណំ កាលពីវេលាម៉ោង១០យប់ ថ្ងៃទី៨ ខែឧសភា ឆ្នាំ២០១៩ នៅចំណុចខាងត្បូងស្តុបបូកគោ តាមបណ្តោយផ្លូវព្រះមុនីវង្ស ស្ថិតក្នុងសង្កាត់បឹងត្របែក ខណ្ឌចំការមន ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តយីឌុបមួយគ្រឿងមិនចាំស្លាកលេខធ្វើដំណើរ តាមបណ្តោយផ្លូវព្រះមុនីវង្ស ក្នុងទិសដៅពីជើងទៅត្បូង ខណៈមកដល់ចំណុចកើតហេតុស្រាប់តែមានរថយន្តម៉ាកកាមរីហាយប្រីត ពណ៌ត្រីឆ្លូវ ពាក់ស្លាកលេខភ្នំពេញ 2U 2727 ធ្វើដំណើរមកពីក្រោយក្នុងល្បឿនលឿនក៏ជ្រុលបុកគូទរថយន្តយីឌុបពេញទំហឹងបណ្តាលឲ្យរងការខូចខាតខ្លួនឯងចំណែករថយន្តយីឌុបមិនខូចខាត ក៏បន្តដំណើរទៅមុខបាត់ ។
ក្រោយពេលកើតហេតុដោយសារតែមិនមានខូចខាតដល់ទ្រព្យសម្បត្តិរដ្ឋ និងអ្នកដទៃ ក៏សមត្ថកិច្ចប្រគល់រថយន្តឲ្យម្ចាស់ស្ទូចយកទៅជួសជុលខ្លួនឯង ៕ សុខាសែនជ័យ
