សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ នៅព្រឹកថ្ងៃទី១០ ខែឧសភា ឆ្នាំ២០១៩ មន្ត្រីជាន់ខ្ពស់របស់បញ្ជាការដ្ឋានកងរាជអាវុធហត្ថខេត្តកណ្តាលបានប្រាប់ភ្នាក់ងារនគរវត្តថា ឃាតក ដែលបានសម្លាប់នារីជាគូស្នេហ៍ នៅផ្ទះសំណាក់ឈ្មោះរំចង់នៅខេត្តព្រៃវែងនោះ បានឃាត់ខ្លួនបានហើយនៅចំណុចឃុំសំរោងធំ ស្រុកកៀនស្វាយ ដោយកម្លាំងកងរាជអាវុធហត្ថខេត្តកណ្តាលសហការជាមួយកងរាជអាវុធហត្ថខេត្តព្រៃវែង ។
ជនសង្ស័យឈ្មោះ ជា ជាង ភេទប្រុស អាយុ៣០ឆ្នាំ រស់នៅភូមិជ្រោយដង ឃុំសំរោងធំ ស្រុកកៀនស្វាយ ខេត្តកណ្តាល។ នារីជនរងគ្រោះឈ្មោះ ផៃ ស្រីម៉ាក់ អាយុ២៥ឆ្នាំ មានទីលំនៅ ភូមិព្រែបាក់ ឃុំព្រែកទម្លាប់ ស្រុកលើកដែក ខេត្តកណ្តាល (មានប្ដី មុខរបរមន្ត្រីបេអឹមលើផ្ទៃប្រទេស) ។
សមត្ថកិច្ចបានឲ្យដឹងថា នារីរងគ្រោះ បានស្លាប់យ៉ាងអាណោចអាធ័ម ក្នុងបន្ទប់ផ្ទះសំណាក់ខាងលើ បន្ទាប់ពីជនសង្ស័យ ប្រើល្បិចលួងហៅទៅដេក រួចយកខ្សែកាបូបរឹកកសម្លាប់ ហើយជិះម៉ូតូគេចខ្លួនបាត់ កាលពីល្ងាចថ្ងៃទី៨ ខែឧសភា ឆ្នាំ២០១៩ ស្ថិតក្នុងឃុំអ្នកលឿង ស្រុកពាមរក៍ ខេត្តព្រៃវែង។
បច្ចុប្បន្នជនសង្ស័យខាងលើ ត្រូវបានកម្លាំងអាវុធហត្ថខេត្តកណ្តាល ប្រគល់ជូនកម្លាំងអាវុធហត្ថខេត្តព្រៃវែង បន្តចាត់ការនីតិវិធី ៕ ឆ ដា
