សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ បទល្មើសព្រៃឈើនៅស្រុកភ្នំក្រវាញ ខេត្តពោធិ៍សាត់ គ្មានការថមថយនោះឡើយ ។ ពួកមន្ត្រីជំនាញរដ្ឋបាលព្រៃឈើកំពុងសំលៀងកាំបិត និងកម្លាំងដើម្បីកាប់បំផ្លាញបទល្មើសទាំងនោះ ។ អ្វីដែលសំខាន់ជាងនេះ បទល្មើសដែលអាចមើលដោយផ្ទាល់ភ្នែកឃើញ ជារៀងរាល់ថ្ងៃនៅនឹងកន្លែងនោះ គឺសិប្បកម្មកែច្នៃឈើប្រណីតច្រើនស្អេកស្កះ ទាំងមានច្បាប់ និងគ្មានច្បាប់ ។ មន្ត្រីជំនាញរដ្ឋបាលព្រៃឈើកំពុងរៀបចំផែនការ និងយុទ្ធសាស្ត្រមាំទាំ ដើម្បីចុះបង្ក្រាបផ្តាច់ពូជរោងសិប្បកម្មកែច្នៃឈើនៅក្នុងស្រុកភ្នំក្រវាញនេះ បន្ទាប់ពីបុណ្យចម្រើនព្រះជន្មព្រះមហាក្សត្រនៅក្នុងពេលប៉ុន្មានថ្ងៃខាងមុខនេះ ។
ប្រភពព័ត៌មានពីប្រជាពលរដ្ឋនៅស្រុកភ្នំក្រវាញ ខេត្តពោធិ៍សាត់ រាយការណ៍ថា សិប្បកម្មកែច្នៃឈើប្រណីត ដែលបានមកពីការកាប់បំផ្លាញព្រៃឈើនៅក្នុងតំបន់ អូសចូលរោងសិប្បកម្ម ទាំងមានច្បាប់ និងអត់ច្បាប់នៅក្នុងស្រុកភ្នំក្រវាញ មានច្រើនរាប់រយកន្លែង ។ បើទោះបីជារោងសិប្បកម្មទាំងនោះ មានច្បាប់ ក៏ត្រូវបង់លុយឲ្យមេព្រៃ ហើយរោងសិប្បកម្មដែលអត់ច្បាប់ ក៏ត្រូវតែបង់លុយដែរ គ្រាន់តែថា អ្នកអត់ច្បាប់បង់ច្រើនបន្តិច ។ ប្រភពបន្ថែមថា លោក ពាក្យ មនោ នាយសង្កាត់រដ្ឋបាលព្រៃឈើភ្នំក្រវាញ ជាអ្នកដែលពង្រាយកម្លាំង ចុះប្រមូលប្រាក់ពីតាមរោងសិប្បកម្មកែច្នៃឈើប្រណីត ទាំងមានដាក់ខែ, បង់សប្តាហ៍ តិច ឬច្រើនទៅតាមទំហំការងាររបស់សិប្បកម្មនីមួយៗ ។
ម្ចាស់រោងសិប្បកម្មមួយរូបនិយាយថា «បងអើយ! បើមិនបង់លុយឲ្យមេព្រៃ តើគេឲ្យយើងធ្វើស្រួលៗឬ?» ។ ម្ចាស់សិប្បកម្មនេះបានបន្ថែមថា ក្រៅតែពីបង់ប្រាក់ឲ្យជំនាញ មានទាំងនាយផ្នែក នាយសង្កាត់ ក៏នៅមានសមត្ថកិច្ចផ្សេងៗទៀត មកទារលុយវក់វី ជារៀងរាល់ថ្ងៃ ។ ប្រភពខាងលើបន្ថែមថា របររកស៊ីបើមិនបង់ប្រាក់ឲ្យសមត្ថកិច្ច ជំនាញ គឺមិនបានសុខនោះឡើយ ។ យ៉ាងណាក៏ដោយ ការចំណាយប្រាក់ មិនមានលិខិតស្នាមអ្វីទេ គឺទៅតាមលទ្ធភាពជាក់ស្តែង អ្នកខ្លះយូរៗមកម្តង អាចបានលុយច្រើន ប៉ុន្តែសមត្ថកិច្ចខ្លះ មកញឹកញាប់ពេក គ្រាន់តែបានកាហ្វេ គុយទាវ ប៉ុណ្ណោះ ។
លោកពាក្យ មនោ នាយសង្កាត់រដ្ឋបាលព្រៃឈើភ្នំក្រវាញ អះអាងថា សមត្ថកិច្ចរបស់លោក បានរៀបចំផែនការ និងយុទ្ធសាស្រ្តជាយូរមកហើយ ជាពិសេសបានសុំគោលការណ៍ថ្នាក់លើចុះបង្ក្រាប សិប្បកម្មកែច្នៃឈើនៅក្នុងមូលដ្ឋានស្រុកភ្នំក្រវាញនេះហើយ ។ លោកថា បើកុំតែជាប់រវល់ព្រះរាជពិធីបុណ្យចម្រើនព្រះជន្មព្រះមហាក្សត្រ កុំអីកម្លាំងរបស់លោកចុះទៅបង្ក្រាបរោងសិប្បកម្មទាំងនោះគ្មានឲ្យរត់រួចមួយទេ ។ លោកបញ្ជាក់ប្រាប់អ្នកកាសែតថា សង្ឃឹមចុះ បន្ទាប់ពីបុណ្យចម្រើនព្រះជន្មហើយ យើងចុះបង្ក្រាបមិនឲ្យរួចខ្លួនឡើយ ។
ប៉ុន្តែម្ចាស់សិប្បកម្មភាគច្រើនអះអាងថា ពួកគេដំណើរការបើករោងសិប្បកម្មនៅក្នុងមូលដ្ឋានស្រុកភ្នំក្រវាញនេះជាយូរឆ្នាំមកហើយៗ ក៏បានចំណាយប្រាក់ទាំងស្របច្បាប់ និងមិនស្របច្បាប់ឲ្យពួកមន្ត្រីមេព្រៃអស់ច្រើនហើយដែរ ។ ដូច្នេះចំពោះការលើកឡើង ឬការប្តេជ្ញាចិត្តរបស់លោក ពាក្យ មនោ គឺជារឿងដោះសា ឬជាការសន្យាជាមួយអ្នកកាសែតបោកប្រាស់តែប៉ុណ្ណោះ ។ គេថា បន្ទាប់ពីបុណ្យ ចម្រើនព្រះជន្មរួច មុខជាមានលេះអ្វីដោះសាជាមិនខាន ។ ក្រុមអ្នករកស៊ីដឹកជញ្ជូនឈើ ក៏ដូចជាម្ចាស់រោងសិប្បកម្មកែច្នៃឈើប្រណីតនានានៅស្រុកភ្នំក្រវាញអះអាងថា គ្មាននរណាល្ងង់ទៅវាយបំបែកឆ្នាំងបាយខ្លួនឯងនោះទេ ។
លោកឡាយ វិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់អះអាងថា លោកបានប្រជុំពីរលើករួចមកហើយអំពីបញ្ហាខាងលើនេះជាមួយមន្ត្រីជំនាញរដ្ឋបាលព្រៃឈើ បន្ទាប់ពីក្រុមមន្ត្រីអធិការកិច្ចចុះពិនិត្យបញ្ហាបទល្មើសនៅស្រុកភ្នំក្រវាញនោះ ។ ទោះយ៉ាងណាក៏ដោយ លោកនឹងកោះហៅ មន្ត្រីព្រៃឈើមកសួរនាំរឿងនេះ ឲ្យបានច្បាស់លាស់ ។ លោកប្រធានមន្ទីរបញ្ជាក់ថា បញ្ហានេះ ក្រុមមន្ត្រីអធិការកិច្ចបានចុះធ្វើការដោយចំណាយពេលជាយូរ ប៉ុន្តែក៏មិនទាន់ឃើញមានលទ្ធផលអ្វីយកមកផ្សព្វផ្សាយនោះដែរ ៕ ប៉ឹម ពិន
