សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន និងលោកស្រី ខៀវ ទេពរង្ស៊ី កាញារីទ្ធិ កាលពីនៅព្រឹកថ្ងៃចន្ទ១០កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី១៣ ខែឧសភា ឆ្នាំ២០១៩ បានអញ្ជើញ ប្រគល់អំណោយ សប្បុរសធម៌ ជាស្បៀង អាហារ ស្រាយបួស ជូនបងប្អូនខ្មែរឥស្លាមចំនួន៤៥០គ្រួសារ នៅឃុំព្រែក តានង់ ស្រុកកោះសូទីន ខេត្តកំពង់ចាម ក្នុងកញ្ចប់អំណោយនីមួយៗ មានអង្ករ៥០គីឡូក្រាម, មី១កេះ, ប្រេងឆា២លីត្រ,ស្ករស២គីឡូក្រាម,មីឡូ១កំប៉ុង, ទឹកដោះគោ២កំប៉ុង, សាប៊ូ១កញ្ចប់ និងថ្នាំដុសធ្មេញ ៤ប្រអប់ ។ ក្នុងនោះ លោករដ្ឋមន្រ្តីក្រសួងព័ត៌មានក៏បានផ្តល់ថវិកា សម្រាប់ដោះស្រាយចាក់ដីតារាងបាល់ទាត់ភូមិតានង់ទី៧ ចំនួន៣០០ឡានផងដែរ ។
លោក ខៀវ កាញារីទ្ធ បានបញ្ជាក់ថា៖ ប្រទេសកម្ពុជា មានសុខសន្ដិភាព ដឹកនាំដោយសម្ដេអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា គោល នយោបាយសុខដុមបនីយកម្មថ្មីមួយទៀត ក្នុងចំណោមគោលនយោបាយសុខដុមនីយកម្មនានា ជាច្រើន ដែលសម្តេចតេជោ កាលពីថ្ងៃទី ០៧ ខែឧសភា ឆ្នាំ២០១៩ កន្លងទៅ នៅក្នុងពិធីទទួលទានអាហារស្រាយបួសជាមួយសាសនិកឥស្លាមជិត ៥០០០នាក់ បានប្រកាសឲ្យមន្ទីរពេទ្យរដ្ឋ និងបង្អែកគ្រប់ខេត្តក្រុង ជួយសម្រួលដោះស្រាយបន្ទប់ថ្វាយបង្គំដល់សាសនិកឥស្លាម ដែលមកទទួលសេវាព្យាបាល ក៏ដូចជាបុគ្គលិកពេទ្យដែលកាន់សាសនាឥស្លាម ដែលពួកគាត់ធ្លាប់តែមានកង្វល់ នៅពេលដល់វេលាថ្វាយបង្គំតែមិនមានបន្ទប់ត្រឹមត្រូវនៅតាមទីសាធារណៈ ជាពិសេសមន្ទីរពេទ្យ ខណៈនៅអាកាស យាន្តដ្ឋាន និងទីប្រជុំធំៗ មួយចំនួនបាន ដោះ ស្រាយរួចរាល់ជាបណ្តើរៗ ។
លោកបន្តថា៖ ទោះបីសាសនាព្រះពុទ្ធ ជាសាសនារបស់រដ្ឋ ក៏ប៉ុន្តែគោលនយោបាយសុខដមបនីយកម្មបានកំពុងផ្តល់សិទ្ធិសេរីភាពគ្រប់បែបយ៉ាង ជាមួយការផ្តល់ភាពកក់ក្តៅ និង ចូលរួមដោះស្រាយរាល់ទុក្ខលំបាកដល់សាសនិកនានាទៀត ក្នុងក្របខណ្ឌនៃប្រជាជាតិតែមួយដែលរួមរស់រួមសុខក្នុងម្លប់សន្តិភាពតែមួយ ។
សូមបញ្ជាក់ថា៖ អំណោយខាងលើជាការឧបត្ថម្ភពីសប្បុរសជន សាសនិកឥស្លាមនៅ ប្រទេសបារាំង តាមរយៈអង្គការ LiFE សហការជាមួយអង្គការមូលនិធិអភិវឌ្ឍន៍មុស្លិមកម្ពុជា និងមានការចូលរួមសហការពីថ្នាក់ដឹកនាំ ក្រុមការ ងាររបស់ក្រសួងព័ត៌មានផងដែរ ៕ សំរិត
