សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តារាកំប្លែងស្រីល្បីឈ្មោះនាង ស្រេង សុកាន់ដា ហៅនាងខ្ញុងបានបង្ហាញរថយន្តស៊េរីទំនើប ឡង់គ្រីស័រតម្លៃរាប់ម៉ឺនដុល្លារ ដែលនាងទើបនឹងដូរ ជាមួយនឹងការអះអាងថា នេះជាញើសឈាមរបស់នាង ដែលបានខិតខំប្រឹងប្រែងកន្លងមក គ្មានស្គាល់យប់ថ្ងៃនោះ ។
មិនចាញ់តារាសិល្បៈរួមជំនាន់ នាងខ្ញុងបានសម្រេចក្តីសុបិន្តមានរថយន្តទំនើបជិះទៅបំពេញការងារ តារាកំប្លែងស្រីរូបនេះ បានអះអាងថា ខ្លួន និង គ្រួសារបានខំប្រឹងស្ទើរស្លាប់ស្ទើររស់ហើយ ទើបទទួលបានលទ្ធផលបែបនេះ ។ ជាមួយគ្នានោះដែរ តារាកំប្លែងស្រីរូបនេះ ក៏ទទួលបានការសាទរចំពោះភាពជោគជ័យរបស់នាង និង គ្រួសារផងដែរ ។
ក្រៅពីតារាកំប្លែង ខ្ញុង ក៏ជាតារាចម្រៀងនៅក្នុងផលិតកម្មថោន និង បានចូលរួមសម្តែងរឿងជាច្រើន ហើយក្រៅពីការងារសិល្បៈ នាងក៏មានមុខរបរបន្ទាប់បន្សំដែលមានដូចជាការលក់ដីឡូត៍ ផលិតផលរក្សាសម្រស់ និង សាច់ក្រក ផ្អកជាដើម ។
ពេលនេះគេអាចនិយាយបានថា តារាកំប្លែង ខ្ញុង មិនត្រឹមជោគជ័យលើអាជីព និង របររកស៊ីទេ សូម្បីតែជីវិតស្នេហារបស់នាងក៏មានសេចក្តីសុខមិនធម្មតាដែរ ក្រោយពីនាងភ្ជាប់ស្នេហ៍ជាមួយតារាកំប្លែង នាយកៃដផងដែរ ។
ទោះជាយ៉ាងណាតារាស្រីរូបនេះ នៅមិនទាន់ទទួលយកកំណើតកូន ដែលជាតំណត់ឈាមរួមគ្នាជាមួយនាយកៃដនៅឡើយដែរ ៕ វឌ្ឍនា
