ខ្យល់កន្ត្រាក់រលំបង្គោលភ្លើង និងដើមឈើ បាក់សង្កត់លើផ្ទះពលរដ្ឋ៩ខ្នង ម៉ូតូ និងរថយន្តយីឌុប ១គ្រឿង ខូចខាត

ភ្នំពេញ ៖ ហេតុការណ៍គ្រោះធម្មជាតិមួយ បានកើតឡើង ធ្វើឲ្យផ្ទះប្រជាពលរដ្ឋ ៩ខ្នង; រថយន្តយីឌុប១គ្រឿង ម៉ូតូ១គ្រឿង និងប៉ុស្តិ៍សន្តិសុខយាមនៅបុរីអង្គរចំនួន ១កន្លែង ខូចខាតយ៉ាងដំណំដោយសារតែភ្លៀងមួយមេលាយឡំនឹងខ្យល់កន្ត្រាក់ បណ្ដាលឲ្យបង្គោលភ្លើង និងដើមឈើចំនួន៣ដើមរលំសង្កត់លើ ។

ករណីខាងលើនេះ បានកើតឡើងកាលពីវេលាម៉ោង៣រសៀល ថ្ងៃអង្គារ ២រោច ខែពិសាខ ឆ្នាំកុរសំរឹទ្ធិស័ក ព.ស.២៥៦៣ ត្រូវនឹងថ្ងៃទី ២១ ខែឧសភា ឆ្នាំ២០១៩ នៅចំណុចផ្លូវលេខ១៧២០ភូមិទួលពពែ សង្កាត់ទួលសង្កែទី ២ ខណ្ឌឫស្សីកែវ និងនៅផ្លូវ១៨០០ក្រុម ៤ភូមិបឹងរាំង សង្កាត់ទួលសង្កែទី ២ និងទីតាំងមួយកន្លែងទៀត គឺរលំដើមឈើខូចខាតម៉ូតូអូសធុងការ៉េមមួយគ្រឿង និងប៉ុស្តិ៍យាម របស់សន្តិសុខ នៅផ្លូវចូលបុរីអង្គរភ្នំពេញ ។ ចំណែករថយន្តសណ្ដោង ត្រូវបង្គោលភ្លើងសង្កត់លើនោះម៉ាកហ៊ីណូ ពណ៌លឿង ពាក់ស្លាកលេខ ភ្នំពេញ3A-2227 ខូចខាតយ៉ាងដំណំ និងម៉ូតូមួយគ្រឿងទៀត ជាម៉ូតូដឹកភេសជ្ជខូចខាតស្ទើរទាំងស្រុង ។

ក្រោយហេតុការណ៍ គេឃើញអាជ្ញាធរ និងសមត្ថកិច្ច បានចេញជួយអន្តរាគមន៍ នៅទីតាំងកើតហេតុផងដែរ ៕ អារុណរះ