សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តឡិចស៊ីស RX300មួយគ្រឿងទៀតហើយ ពាក់ព័ន្ទទៅនឹង ការទិញ ជួល លក់ បង់រំលស់ ជាមួយក្រុមហ៊ុន ណំ ហម និង សេង ហួត ល្បីសុះសាយទៅហើយ ជាក្រុមហ៊ុនបោកប្រាស់ ប្រជាពលរដ្ឋរាប់រយនាក់រងគ្រោះ ត្រូវបានប្រទះជួប នាព្រឹកថ្ងៃទ២២ ខែឧសភា ឆ្នាំ២០១៩ នៅមុខព្រលានយន្តហោះ ពោធិចិនតុង ផ្លូវសហព័ន្ធរុស្សី ភូមិក្បាលដំរី១ សង្កាត់កាកាប១ ខណ្ឌពោធិសែនជ័យ ហើយមានមនុស្សចំនួន៤នាក់ អះអាងថាជាម្ចាស់ បានជួល និងទិញបង់រំលស់ ពីក្រុមហ៊ុនទាំងខាងលើ ប្រកែកតឹងមាត់ដាក់គ្នាផ្អើល តាមផ្លូវ រហូតសមត្ថកិច្ចចុះទៅអន្តរាគមន៍ ។
រថយន្តមួយគ្រឿងជាប់ពាក់ព័ន្ធលើកនេះម៉ាក ឡិចស៊ីស RX300 ពណ៌ខ្មៅ ពាក់ស្លាកលេខ ភ្នំពេញ 2P-6210 ។
តាមស្ត្រីចំណាស់ម្នាក់ អះអាងថាជារថយន្តខ្លួន បានជួលឲ្យទៅ ក្រុមហ៊ុន ណំ ហម នៅសង្កាត់គោកឃ្លាង ខណ្ឌសែនសុខ ហើយជួលមិនទាន់បានលុយផង បាត់រថយន្ត បែជារកឃើញ រថយន្ត ក្រុមហ៊ុន សេង ហួត យកទៅបង់រំលស់ឲ្យអ្នកផ្សេង ពីម្នាក់ទៅម្នាក់បាត់ ។
តាមបុរសចំនួន៣នាក់ទៀត បានឲ្យដឹងថា រថយន្តឡិចស៊ីស មួយគ្រឿងខាងលើ ខ្លួនបានទិញបង់រំលស់ ពីក្រុមហ៊ុន សេង ហួត ដែលមានលោកអគ្គនាយក ជំនាញខាងឆបោក ឈ្មោះ សេង សុភគ៌ មានទីតាំងនៅ ផ្ទះជួល៦២៧ តាមផ្លូវលំ ភូមិជ្រៃកោង សង្កាត់ចោមចៅ២ ខណ្ឌពោធិសែនជ័យ ។ ហើយក្នុងម្នាក់ៗ បង់លុយអស់ចំនួនជិត១មុឺនដុល្លាទៅហើយ ។ ដោយផ្ទុះរឿង ករណី ទិញ លក់ ជួល បង់រំលស់ រថយន្ត ពីក្រុមហ៊ុន សេង ហួត និងក្រុមហ៊ុន ណំ ហម សុទ្ធតែក្រុមហ៊ុនឆបោកលុយប្រជាពលរដ្ឋ រាប់លានដុល្លា រហូតដល់ សមត្ថកិច្ច ចាប់ខ្លួនបាន ជនសង្ស័យ អគ្គនាយក សេង សុភគ៌ ឡើងតុលាកា ឃុំខ្លួនដាក់គុកបាត់ទៅហើយ តែរថយន្ត នៅតែឃើញ ជាបន្តបន្ទាប់ មួយគ្រឿង ម្ចាស់ពី៣នាក់ទៅ៦នាក់ ។
ក្រោយពីមនុស្ស៤នាក់ ឆ្លើយជាម្ចាស់រថយន្ត ឡិចស៊ីស ខាងលើ បង្កឲ្យភ្ញាក់ផ្អើលទាំងព្រឹក សមត្ថកិច្ច ហៅនាំអ្នកពាក់ព័ន្ធ រថយន្តទៅសម្របសម្រួលនៅប៉ុស្តិ៍កាកាប១ ផ្ទៀងផ្ទាត់ឯកសារ ម្ចាស់រថយន្តម្នាក់ឈ្មោះ ហៀង វីរៈ អាយុ៣៧ មានទីលំនៅ ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ មានពាក្យបណ្តឹង នៅក្រសួងមហាផ្ទៃ មានដឺកាសម្រេចពីតុលាកា សុំប្រើប្រាស់រថយន្តមួយគ្រឿងខាងលើ ទើបសមត្ថកិច្ច ប្រគល់រថយន្ត ឡិចស៊ីស RX300 មួយគ្រឿងខាងលើ ទៅឲ្យម្ចាស់អ្នកប្រើប្រាស់បច្ចុប្បន្ន ប្រើជាបន្តទៀត ដើម្បីបញ្ចប់រឿង ហើយក្នុងករណីអ្នកអះអាងថាជាម្ចាស់ មិនសុខចិត្តយ៉ាងណា ទៅដាក់ពាក្យបណ្តឹង នៅក្រសួងមហាផ្ទៃ ខណៈដែលតុលាកា សម្រេចឃុំខ្លួន ជនសង្ស័យ សេង សុភគ៌ បាត់ទៅហើយ ៕ សុខាសែនជ័យ
