សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តលឿន បានរេចង្កូត ទៅបុកកន្ទុយរ៉ឺម៉កដឹកអេតចាយ ខ្ទាតទៅកល់ជាប់ពំនូកដីមុខផ្ទះប្រជាពលរដ្ឋ បណ្ដាលឱ្យបុរសស្រ្តីពីរនាក់ប្ដីប្រពន្ធ កំពុងរើសអេតចាយ រងរបួសស្រាលទាំងពីរនាក់ ចំណែករថយន្តធ្លាក់កាងខាងមុខ ហុយផ្សែងទ្រលោម សំណាងល្អម្ចាស់កាច់សោរពន្លត់ទាន់ បង្កការភ្ញាក់ផ្អើលដល់អ្នកជិតខាង រាយការណ៍ប្រាប់សមត្ថកិច្ច ចុះមកពិនិត្យ ។
ហេតុការណ៍គ្រោះថ្នាក់ចរាចរនេះបានកើតឡើងកាលពីម៉ោង រំលងអធ្រាត្រ ឈានចូលថ្ងៃទី០៣ ខែមិថុនា ឆ្នាំ២០១៩នេះ ត្រង់ចំណុចខាងមុខអាជ្ញាធរទន្លេសាប (មុខផ្ទះលក់ចាប់ហួយជាប់ហាងនំចាក់អង្រែ) លើកំណាត់ផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឱ្យដឹងថា នៅមុនពេលកើតហេតុ គេបានឃើញ ២នាក់ប្ដីប្រពន្ធ ជាអ្នករើសអេតចាយ បានបើកម៉ូតូសណ្ដោងរ៉ឺម៉កដឹកអេតចាយ ដើររើសសំបកដប និងកំប៉ុងអេតចាយ ដែលបោះចោលតាមផ្លូវ និងនៅតាមគំនរសំរាមតាមបណ្ដោយផ្លូវជាតិលេខ២ ។ ដោយប្ដីជាអ្នកបើកម៉ូតូសណ្ដោងរ៉ឺម៉ក ប្រពន្ធជាអ្នករើស ខណៈមកដល់ចំណុចកើតហេតុបានឈប់រ៉ឺម៉ក ចុះទៅរើសសំបកកំប៉ុងអេតចាយក្នុងគំនរសំរាម ដោយមិនដឹងខ្លួន ។
ស្រាប់តែមានរថយន្តមួយគ្រឿង ម៉ាកតូយ៉ូតាហាយឡែនឌ័រ ពណ៌ស្ករ ពាក់ស្លាកលេខភ្នំពេញ 2AD-9944 បើកបរដោយបុរសម្នាក់ ទំនងជាស្រវឹងស្រា បានរេចង្កូតទៅបុកកន្ទុយរ៉ឺម៉កដឹកអេតចាយ ខ្ទាតជិត១០ម៉ែត្រ ទៅកល់ជាប់ពំនូកដី នៅមុខផ្ទះប្រជាពលរដ្ឋបណ្ដាលឱ្យពីរនាក់ប្ដីប្រពន្ធ កំពុងរើសអេតចាយ រងរបួសស្រាលទាំងពីរនាក់ ចំណែករថយន្តបធ្លាក់កាងខាងមុខ ។
បន្តិចក្រោយមកគេឃើញរថយន្តហុយផ្សែងទ្រលោម ទើបនាំគ្នាស្រែកឆោឡោ តែសំណាងល្អ ម្ចាស់រថយន្តស្ទុះរត់ឡើងរថយន្តកាច់សោរពន្លត់ទាន់ បង្កការភ្ញាក់ផ្អើលដល់អ្នកជិតខាង និងអ្នកដំណើរតាមផ្លូវ រាយការណ៍ប្រាប់កម្លាំងល្បាតប៉ុស្តិ៍ចាក់អង្រែក្រោម ចុះមកពិនិត្យ ។
បន្ទាប់ពីឃើញសមត្ថកិច្ចចុះមកដល់ ម្ចាស់រថយន្តបង្កបានប្រញាប់ប្រញាល់ និយាយលួងលោម ប្ដីប្រពន្ធ២នាក់ដែលរបួសនោះ ដោយបង្ខំផង លន់តួរផង និងអះអាងថាទើបចេញពីខារ៉ាអូខេ អស់លុយហើយ រួចដកលុយ១០ដុល្លារចេញពីកាបូប មកសំពះសុំទោសថែមទៀត ទើបធ្វើឲ្យ២នាក់ប្ដីប្រពន្ធ ទន់ចិត្ត និងមិនចង់វែងឆ្ងាយ ហើយរងរបួសស្រាល តែបុរសជាប្ដីនៅចុកចុងដង្ហើមទៀត មិនដឹងធ្វើយ៉ាងម៉េច គេសងប៉ុណ្ណឹង ក៏ព្រមទទួលយកដើម្បីបញ្ចប់រឿង និងទុកទិញថ្នាំលេប ៕ ជ្រោយពេជ្រ
