សារព័ត៌មាន នគរវត្ត តែងតែនាំមុខគេជានិច្ច
គេរាយការណ៍ថា ឈ្មួញឈើផ្តាច់មុខពីររូប នៅស្រុកវាលវែងកំពុងធ្វើសកម្មភាពដឹកឈើចេញរៀងរាល់យប់ ដោយមានការឃុបឃិតត្រូវរ៉ូវជាប្រព័ន្ធពីលោក ជា ហួត នាយផ្នែករដ្ឋបាលព្រៃឈើវាលវែង ។ ឈ្មួញឈើពីរនាក់ដែលឈរជើងយ៉ាងរឹងមាំ ដឹកឈើបកសម្បកនៅស្រុកវាលវែង គឺចែ អូន និងលោក សីហា ។ ចែអូនមានរថយន្តដឹកឈើ៣គ្រឿង និងលោក សីហា ដែលជាបងប្អូនដែរនោះមានរថយន្តដឹកឈើ២គ្រឿង ។ បន្ទាប់ពីបានផ្តាច់មុខក្នុងរបររកស៊ីឈើបកសម្បកនៅស្រុកវាលវែង ចែអូន និងលោក សីហា ដឹកឈើចេញជារៀងរាល់យប់មិនដែលខកខានទេ ។ គេរាយការណ៍ថា មុនៗ មានឈ្មួញប្រជែងឈរទិញឈើនៅស្រុកវាលវែងនោះដែរ ដូច្នេះ ចែអូន និងលោក សីហា ប្រមូលឈើរយៈពេល២ថ្ងៃ ឬ៣ថ្ងៃទើបចេញម្តង ។ ប៉ុន្តែឥឡូវនេះ ឈ្មួញទាំងពីរនាក់ដឹកឈើចេញជារៀងរាល់យប់ ។
បើតាមសេចក្តីរាយការណ៍បានឲ្យដឹងថា លោក ជា ហួត នាយផ្នែករដ្ឋបាលព្រៃឈើវាលវែង មិនដែលខ្វល់ចំពោះបទបញ្ជាថ្នាក់លើនោះទេ ។ ផ្ទុយទៅវិញ ពួកឈ្មួញដែលមានប្រាក់ និងការសន្យាច្បាស់លាស់ គឺត្រូវទទួលបាននូវការយកចិត្តទុកដាក់ពីលោក ជា ហួត ។ មានន័យថា ការរកស៊ីដឹកជញ្ជូនឈើត្រូវសម្តែងការស្មោះត្រង់ជាមួយសមត្ថកិច្ច(ជា ហួត) បើដឹកឈើចេញបីរថយន្ត គឺត្រូវទូរស័ព្ទថា បីរថយន្តឲ្យច្បាស់លាស់ មិនមែនផុតពីក្រសែភ្នែកលោកជា ហួត យករួចខ្លួននោះទេ ។ ភាពម៉ត់ចត់របស់ចែអូន និងលោក សីហា ធ្វើឲ្យលោកជា ហួត ទុកចិត្ត ពីព្រោះឈ្មួញទាំងពីរនាក់ មិនបោកសមត្ថកិច្ច ។ ហេតុដូច្នេះហើយបានជាចែកអូន និងលោក សីហា អាចផ្តាច់ជើងឈ្មួញរកស៊ីមិនស្មោះត្រង់ជាមួយសមត្ថកិច្ចបានជាច្រើននាក់នៅស្រុកវាលវែង ។ នៅស្រុកវាលវែងគឺមានឈ្មួញតែពីរនាក់នេះទេ ដែលមានសិទ្ធិដឹកឈើចេញ ។
ស្ថាប័នជំនាញ ពោលគឺមន្ទីរកសិកម្មខេត្តហាក់ដូចជាមិនបានយកចិត្តទុកដាក់ឲ្យគ្រប់គ្រាន់ក្នុងការចាត់វិធានការចំពោះមន្ត្រីក្រោមអំណាច ឲ្យមានប្រសិទ្ធភាពនោះឡើយ ។ ការរង់ចាំមើលវិធានការរបស់លោក ឡាយ វិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ហាក់ដូចជាមិនឃើញមានអ្វីជាដុំកំភួននោះឡើយ ។ ពោលគឺផ្តេកផ្តួលរមួលផ្សំគ្រេចលាយឡំជាមួយផលប្រយោជន៍ដែលពួកឈ្មួញបោះឲ្យ ។ ដូច្នេះមានតែក្រសួងកសិកម្ម ជាពិសេសអគ្គនាយកដ្ឋានរដ្ឋបាលព្រៃឈើតែប៉ុណ្ណោះ ទើបអាចចាត់វិធានការមន្ត្រីពុករលួយនៅថ្នាក់ក្រោមនោះបាន ។ បើរំពឹងទៅលើលោកឡាយ វិសិដ្ឋ ព្រៃឈើនៅខេត្តពោធិ៍សាត់មុខជារលាយសូន្យបង់ជាក់ជាមិនខាន ៕
