សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ កម្លាំងការិយាល័យសេដ្ឋកិច្ច នៃស្នងការនគរបាលខេត្តសៀមរាប សហការជាមួយកម្លាំងជំនាញ និងកម្លាំងចម្រុះមូលដ្ឋានស្រុកវ៉ារិន នៅថ្ងៃទី៤ ខែមិថុនា ឆ្នាំ២០១៩ វេលាម៉ោង១១និង៥៨នាទីព្រឹក បានចុះបង្ក្រាបទីតាំងការដ្ឋានកាយយកដីក្រហម១កន្លែង គ្មានច្បាប់អនុញ្ញាតពីមន្ត្រីជំនាញ ស្ថិតនៅចំណុចអន្លង់ត្រាង ភូមិស្វាយស ឃុំស្វាយស ស្រុកវ៉ារិន ខេត្តសៀមរាប ។
លោកវរសេនីយ៍ឯក សឿន សេន ប្រធានការិយាល័យសេដ្ឋកិច្ចបានបញ្ជាក់ឲ្យដឹងថា ក្នុងកិច្ចប្រតិបត្តិការនេះសមត្ថកិច្ចបានធ្វើចំណាត់ការទៅលើម្ចាស់ទីតាំងដូចជា៖ ធ្វើកំណត់ហេតុបិទទីតាំងការដ្ឋានជាបណ្តោះអាសន្ន ដើម្បីឲ្យម្ចាស់ចូលខ្លួនដើម្បីធ្វើការផាកពិន័យអន្តរកាល ដោយអនុលោមទៅតាម ច្បាប់ស្តីពីការគ្រប់គ្រង និងការធ្វើអាជីវកម្ម ធនធានរ៉ែ ព្រមទាំងដាក់ពាក្យស្នើសុំ លិខិតអនុញ្ញាតឲ្យបានត្រឹមត្រូវពីស្ថាប័នជំនាញទើបអនុញ្ញាតឲ្យដំណើរការឡើងវិញ ។
ចាប់យកវត្ថុតាង រថយន្តកង់ដប់ ម៉ាក HINO ០១គ្រឿង, រថយន្តកង់ដប់ពីរ ម៉ាក HYUNDAI ០២គ្រឿង និងអេស្កាវ៉ាទ័រ ម៉ាក KOMAT’SU ០១គ្រឿង ។
កម្លាំងបាននាំខ្លួនកម្មករបើកគ្រឿងចក្រ និងអ្នកធ្វើការនៅក្នុងការដ្ឋាន ០៥នាក់ មកសាកសួរនៅអធិការដ្ឋាននគរបាលស្រុកវ៉ារិន ។
ក្រោយពេលសួរនាំរួច បច្ចុប្បន្នកម្មករទាំង៥នាក់បានធ្វើកិច្ចសន្យាអប់រំណែនាំ ហើយបានឲ្យត្រឡប់ទៅកាន់លំនៅដ្ឋានវិញ ។ រីឯវត្ថុតាងរថយន្ត៣គ្រឿង សមត្ថកិច្ចបានយកមករក្សាទុកនៅអធិការដ្ឋាននគរបាលស្រុកវ៉ារិន ចំពោះអេស្កាវ៉ាទ័រកាយដី១គ្រឿង បានរក្សាទុកនៅទីតាំងការដ្ឋាន ៕ ប៊ុនរិទ្ធី
