សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលមន្ទីរប្រឆាំងគ្រឿងញៀន នៃក្រសួងមហាផ្ទៃ កាលពីព្រឹកថ្ងៃពុធ ៣កើត ខែពិសាខ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៥ ខែមិថុនា ឆ្នាំ២០១៩នេះ បានបញ្ជូនខ្លួនស្ត្រីម្នាក់ និងគ្រឿញៀន ជិត១គីឡូក្រាម មកកាន់សាលាដំបូងរាជធានីភ្នំពេញ ដើម្បីទទួលទោសតាមច្បាប់ ។
យោងតាមរបាយការណ៍របស់មន្រ្តីនគរបាលមន្ទីរប្រឆាំងគ្រឿងញៀន នៃក្រសួងមហាផ្ទៃ បានឲ្យដឹងថា ជនសង្ស័យមានឈ្មោះ ម៉ា ចាន់ធី ភេទស្រី អាយុ៣៥ឆ្នាំ ជនជាតិខ្មែរ មុខរបរ អ្នកសំអាងការ ហើយត្រូវបានកម្លាំងមន្ទីរប្រឆាំងគ្រឿងញៀនឃាត់ខ្លួនកាលពីថ្ងៃទី៣ ខែមិថុនា ឆ្នាំ២០១៩ នៅចំណុចខាងលិចផ្សារធំថ្មី ផ្លូវលេខ១២៨ កែងផ្លូវលេខ៦៧ សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ ខណៈស្ត្រីសង្ស័យស្ពាយគ្រឿងញៀនយកទៅឲ្យអ្នកទិញ ។
ក្រោយឃាត់ខ្លួនស្រ្តីសង្ស័យរួច សមត្ថកិច្ចបានដកហូតម្ស៉ៅក្រាមពណ៌សថ្លាសង្ស័យថាជាគ្រឿងញៀនប្រភេទមេតំហ្វេតាមីន ICE (ម៉ាទឹកកក) ទម្ងន់ ៩៩៩.៥៦ ក្រាម និងទូរស័ព្ទដៃចំនួន១គ្រឿង ។
បច្ចុប្បន្នជនសង្ស័យ ត្រូវបានបញ្ជូនខ្លួនទៅកាន់ព្រះរាជអាជ្ញាអមសាលាដំបូងរាជធានីភ្នំពេញ សាកសួរនឹងចោទប្រកាន់តាមនីតិវិធី ៕ ស រស្មី
