ឃាត់ខ្លួនជនសង្ស័យម្នាក់ ពាក់ព័ន្ធនឹងករណីលួចម៉ូតូ នៅសង្កាត់ក្បាលកោះ

ភ្នំពេញ៖ កាលពីព្រឹកថ្ងៃទី៦ ខែមិថុនា ឆ្នាំ២០១៩ ម៉ោង០៩និង៣០នាទី កម្លាំងនគរបាលខណ្ឌច្បារអំពៅ បានឃាត់ខ្លួនជនសង្ស័យម្នាក់ ពាក់ព័ន្ធនឹងករណីលួចម៉ូតូ នៅមុខសិប្បកម្មឡឥដ្ឋ ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ដែលប្រព្រឹត្តិឡើងកាលពីវេលាម៉ោង៩និង១៣នាទីព្រឹក ថ្ងៃទី៣ ខែឧសភា ឆ្នាំ២០១៩ ។

ជនសង្ស័យឈ្មោះ ខុម សត្យា ភេទប្រុស អាយុ២១ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិព្រែកធំ១ សង្កាត់ក្បាលកោះ ខណ្ឌច្បារអំពៅ ។ ចំណែកជនរងគ្រោះឈ្មោះយី សំណាង ភេទប្រុស អាយុ៦០ឆ្នាំ ជនជាតិខ្មែរ មុខរបរ រត់ម៉ូតូឌុប ស្នាក់នៅផ្ទះលេខ១៩២ស្ទួន ភូមិតាងៅកណ្តាល សង្កាត់និរោធ ខណ្ឌច្បារអំពៅ ។

តាមប្រភពពីមន្រ្តីនគរបាលខណ្ឌច្បារអំពៅ បានប្រាប់ពីដំណើររឿងថា មុនពេលកើតហេតុ ជនរងគ្រោះ បានទុកម៉ូតូម៉ាក Honda C125 ពណ៌ខ្មៅ ស្លាកលេខ ភ្នំពេញ១BQ-៨៧០៨ នៅចំណុចកើតហេតុ រួចចូលទៅបេះស្លឹកគន្ធុំថេត ស្រាប់តែមានជនសង្ស័យ ០២នាក់ ឈ្មោះខុម សត្យា និងឈ្មោះ ខុម ចាន់ណេង ជិះម៉ូតូ០១គ្រឿង ម៉ាកយ៉ាម៉ាហាអ៊ិចសងទ័រ ពណ៌ខ្មៅ ស្លាកលេខ ភ្នំពេញ ១GB-២៩៣១ មកឈប់ក្បែរ រួចជនសង្ស័យឈ្មោះ ខុម ចាន់ហេង ធ្វើសកម្មភាពលួចម៉ូតូជនរងគ្រោះជិះគេចខ្លួនបាត់ ។

បន្ទាប់មក ជនរងគ្រោះ ឆែកកាមេរ៉ាសុវត្ថិភាពប្រជាពលរដ្ឋក្បែរនោះ ឃើញជនសង្ស័យទាំង០២នាក់ ខាងលើលួចម៉ូតូ ក៏មករាយការណ៍ប្រាប់សមត្ថកិច្ចតែម្តង ។ លុះដល់ថ្ងៃទី០៦ ខែឧសភា ឆ្នាំ២០១៩ ម៉ោង០៩និង៣០នាទី សមត្ថកិច្ចរកឃើញជនសង្ស័យឈ្មោះ ខុម សត្យា ជិះម៉ូតូម៉ាក Honda C125 ពណ៌ខ្មៅ ស្លាកលេខ ភ្នំពេញ ១CY-០៦៤២ នៅភូមិព្រែកធំ សង្កាត់ក្បាលកោះ ខណ្ឌច្បារអំពៅ ក៏ឃាត់ខ្លួន រួចត្រួតពិនិត្យនៅសាលាឆទានមួយកន្លែង ដែលជនសង្ស័យស្នាក់នៅបណ្តោះអាសន្ន រកឃើញម៉ូតូម៉ាក Honda Zomer-X ពណ៌ក្រហម ស្លាកលេខ ភ្នំពេញ ១CR-២៣៧៤, កាងម៉ូតូ២គូ, ចង្អើម៉ូតូ០១, កូនកន្រ្តៃ០១, ម៉ូទ័រឆាប០១,ម៉ាល្វេន ម៉ូតូ០២, ដែកទួរណឺវីស០២, ដង្កាប់០១, កូនសោ០៨ ,មួកសុវត្ថិភាពពណ៌ស១ និងអាវក្រៅពណ៌ឈាមជ្រូក១ (ជនសង្ស័យពាក់ធ្វើសកម្មភាព) រួចក៏បញ្ជូនខ្លួនមកអធិការដ្ឋាននគរបាលខណ្ឌច្បារអំពៅ ចាត់ការតាមច្បាប់ ៕ សណ្ដោស