សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ជាក្រឡាបញ្ជី ជិះម៉ូតូ PCX មួយគ្រឿង ឃើញរថយន្តមួយគ្រឿងបត់ចេញមក ក៏មានចិត្តឈប់ម៉ូតូ ចុះទៅជួយបញ្ចៀសចរាចរណ៍កុំស្ទះ ឲ្យបើកទៅផុត កុំឲ្យទើសគ្នា តែបែរជាបុរសម្នាក់ស្រវឹងស្រា បើករថយន្ត TACOMA មួយគ្រឿងទៀត មកឈប់រថយន្ត ហើយចុះមកសម្លុតថា (ហ៊ែងចេះស្អី) រួចក៏រុញម៉ូតូឲ្យដួល ទើបឈានដល់កើតមានការឈ្លោះប្រកែកគ្នា រំខានដល់ការដេកពួនរបស់ប្រជាពលរដ្ឋ បើកទ្វារចេញមកចោមរោមមើលព្រោងព្រាត និងរាយការណ៍ប្រាប់សមត្ថកិច្ចមូលដ្ឋាន ចុះមកជួយអន្តរាគមន៍ទាំងយប់ ។
ហេតុការណ៍ដ៏គួរឲ្យភ្ញាក់ផ្អើលបានកើតឡើងនៅវេលាម៉ោង ២២និង៤០នាទី ថ្ងៃអាទិត្យ ទី០៩ ខែមិថុនា ឆ្នាំ២០១៩ នៅចំណុចក្រោយវត្តស្ទឹងមានជ័យ ផ្លូវបេតុងគ្មានលេខ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញ បុរសម្នាក់ទំនងជាស្រវឹងស្រាជោកជាំ បានបើករថយន្តមួយគ្រឿង ប្រភេទមួយបាំងកន្លះ ម៉ាក TOYOTA TACOMA ពណ៌ស បិទពណ៌ខ្មៅ ពាក់ស្លាកលេខ ភ្នំពេញ 2T-5737 ធ្វើដំណើរតាមបណ្ដោយផ្លូវបេតុង ក្រោយវត្តស្ទឹងមានជ័យ ទិសដៅពីត្បូងទៅជើង លុះដល់ចំណុចកើតហេតុដែលជាផ្លូវបំបែកជាបួន ស្រាប់តែមានរថយន្តមួយគ្រឿងទៀត (មិនចាំម៉ាក) បានបើកចេញមក ហើយឃើញបុរសម្នាក់ ជិះម៉ូតូ PCX មួយគ្រឿង ពណ៌ស ពាក់ស្លាកលេខ ភ្នំពេញ 1GR-1659 មកឈប់ម៉ូតូអែបពីក្រោយ រួចចុះដើរទៅជួយបញ្ចៀសឲ្យបើកទៅផុត កុំឲ្យទើសគ្នា តែបែរជាបុរសម្នាក់ស្រវឹងស្រា បើករថយន្ត TACOMA មួយគ្រឿងទៀត ខឹងមិនបានទៅមុន ទើបឈប់រថយន្ត ហើយចុះមកសម្លុតថា (ហ៊ែងចេះស្អី) រួចក៏រុញម៉ូតូ PCX នោះឲ្យដួល ទើបឈានដល់កើតមានការឈ្លោះប្រកែកគ្នាឡើង បង្កការរំខានដល់ដំណេករបស់ប្រជាពលរដ្ឋ ទើបនាំគ្នាបើកទ្វារចេញមកចោមរោមមើល និងរាយការណ៍ប្រាប់សមត្ថកិច្ចមូលដ្ឋានប៉ុស្តិ៍ស្ទឹងមានជ័យទី១ ចុះមកជួយអន្តរាគមន៍ទាំងយប់ ។
ក្រោយមកគេឃើញសមត្ថកិច្ចប៉ុស្តិ៍ស្ទឹងមានជ័យទី១ ចុះមកកន្លែងកើតហេតុ ហើយបានសួរនាំភាគីទាំងសងខាង និងបងប្អូនប្រជាពលរដ្ឋនៅកន្លែងកើតហេតុ ហើយភាគីទាំងសងខាងនៅតែប្រកែកគ្នា ដោយម្ខាងអាងខ្លួនជាក្រឡាបញ្ជីសាលាដំបូងរាជធានី និងម្ខាងអាងមានខ្នងធំ ទើបឡាំប៉ាមិនសុខចិត្តរៀងខ្លួន បង្កការភ្ញាក់ផ្អើលកាន់តែខ្លាំងឡើង រហូតមានក្រុមអ្នកសារព័ត៌មានជាច្រើននាក់មកដល់បន្តបន្ទាប់គ្នា ហើយបានសួរនាំឲ្យភាគីខាងម្ចាស់ម៉ូតូរៀបរាប់ប្រាប់ពីដំណើររឿងហេតុបានដឹងហើយ ក៏នាំគ្នាទៅសាកសួរ បុរសដែលស្រវឹងស្រា ជាអ្នកបើករថយន្ត TACOMA នោះ តែបុរសនោះ ប្រាប់តែមួយម៉ាត់ពីរម៉ាត់ ហើយព្យាយាមដើរគេចចេញបានបន្តិច ក៏មានបុរសម្នាក់ទៀតដែលអះអាងថា ជាអ្នកស្គាល់គ្នាជាមួយម្ចាស់រថយន្តខាងលើ មករៀបរាប់ប្រាប់ថា ភាគីទាំងសងខាងសុទ្ធតែស្រវឹងរៀងខ្លួន ដូច្នេះហើយទើបបានជាពិបាកនិយាយគ្នាបែបនេះ ។
ប្រភពបន្តថា ភ្លាមនោះបុរសដែលស្រវឹងស្រានោះ ដើរត្រឡប់មកវិញ រួចឡើងបញ្ឆេះរថយន្ត ទោះជាសមត្ថកិច្ចព្យាយាមរារាំងឃាត់រថយន្តដែរ តែបុរសនោះមិនខ្វល់ឡើយ បានជាន់ហ្គែរបើករថយន្តចេញទៅកៀរទាំងសមត្ថកិច្ចនគរបាលដែលកំពុងរារាំងនោះស្ទើរដាច់ផ្ងារ តែមិនបណ្ដាលឲ្យរបួសនោះទេ ហើយក៏បើកចេញទៅលឿនស្លេវតែម្ដង ។ ភ្លាមនោះក៏មានក្រុមអ្នកយកព័ត៌មានចេញម៉ូតូជិះប្រដេញតាមពីក្រោយដែរ តែដោយសារតែមិនសូវស្គាល់ផ្លូវក្នុងភូមិសាស្ត្រនេះច្បាស់ ទើបរថយន្តបើកទៅបាត់ស្រមោលឈឹង ។
បច្ចប្បន្នក្រោយពេលកើតហេតុ បុរសវ័យចំណាស់ដែលអះអាងថាខ្លួន ជាក្រឡាបញ្ជីនៅសាលាដំបូងរាជធានីភ្នំពេញ បានប្រាប់ថា លោកនិងយកវិដេអូសកម្មភាពនៅក្នុងកាមេរ៉ាសុវត្ថិភាព(Go Pro) ដែលភ្ជាប់លើមួកសុវត្ថិភាពរបស់លោក យកមករៀបចំជាឯកសារ រួចទើបមកដាក់ពាក្យបណ្ដឹងនៅប៉ុស្តិ៍ស្ទឹងមានជ័យទី១នៅព្រឹកស្អែក ៕ ភារ៉ា ដង្កោ
